Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Gongut që i ra Basha

Politiko 2 Tetor 2017, 11:03

Fatbardh Kadilli

Mjaftoi një debat i drejtpërdrejtë mes Kryeministrit dhe Kryetarit të opozitës, që edhe më skeptikët ta shikojnë nga një kënd tjetër opozitën.

Fjala e Bashës dhe replikat me Ramën, në seancën e fundit në Kuvend, më shumë se të nevojshme për ata vetë, ishin të nevojshme për ata që i ndiqnin. Veçanërisht e rëndësishme është për opozitën tek e cila, kjo përballje ndezi shkëndijën e parë të optimizmit. Më në fund, shumë paqartësi në opinionin publik papritur e humbën peshën e tyre dhe gjykimi përftoi dimensionin e munguar nga veprimi politik i qartë. Një fjalim dhe një replikë çelën udhën e përkufizimit të opozitës nëpërmjet vetpërcaktimit dhe qartësisë e forcës së qëndrimit. Edhe pse pa një kauzë të re e të dallueshme, aksioni i opozitës përftoi peshë.

Që nga zgjedhjet e në vijim u krijua një pështjellim në gjykim dhe vlerësim për sjelljen e aktorëve kryesorë politikë, sa u duk sikur u humbën kufijtë dhe u vagëllua profili që na dallon qartë njërin nga tjetri, pushtetin nga opozita. Nuk qe marrëveshja politike e 18 majit shkak për këtë paqartësi. Të pamësuar me marrëveshje politike, edhe vetë aktorët politikë, e jo më ndjekësit e tyre, e patën të vështirë ta kuptojnë atë si pjesë dhe jo si e tërë. Të merresh vesh me kundërshtarin për rregullat e garës, nuk do të thotë se ke lënë ndeshjen. Për krahasim, marrja vesh për rregullin e ofsaidit, nuk do të thotë se nuk ka më futboll. Ishte mënyra si u përcoll në publik marrëveshja, bashkë me mënyrën se si e interpretoi aksionin e vet politik opozita në periudhën pas marrëveshjes, që e shkaktuan këtë pështjellim. Pasojë e menjëhershme e përhumbjes gati denatyruese të misionit dhe rolit konkret të opozitës ishte rezultati i zgjedhjeve që kaperceu çdo parashikim. Por, rënia duket se nuk u ndal. E padukshme, edhe pse e pamatur në mënyrë të besueshme, rënia dhe tkurrja e opozitës ndihej në qëndrimin e përgjithshëm të qytetarëve ndaj opozitës. Ngecja në spiralen rënëse ndihej edhe nga vetë opozitarët.

Incidenti i votimit për Kryetarin e Parlamentit e shtoi edhe më tepër ndjesinë rënëse. Debati i zgjatur mes protagonistëve politikë të opozitës po e shndërronte grindjen e brendshme në një fabul fatale të ekzistencës së opozitës. Këtu hyn edhe debati i ndershëm dhe racional me dilemat për kohën e bërjes së analizës, si dhe për zgjedhjet dhe për çështje të organizimit të partisë. E përthithur brenda kësaj fabule, opozita rrezikoi që të përkufizohej me konfliktet e saj të brendshme, me krizën e besimit brenda saj.

Por, çdo debat për punët e brendshme të PD-së nuk mund të vlejë më shumë se detyrimi i PD-së për të bërë opozitë. Misioni ynë nuk është të krijojmë një organizatë politike perfekte, me rregulla e statut që respektohet plotësisht, dhe që i bën të lumtur anëtarët e vet me këto. Qëllimi ynë është të bëjmë politikë, të bëjmë opozitë. Këtë presin qytetarët. Analizat vlejnë për të pasur një organizatë sa më efektive, pikërisht për qëllimin e madh për të bërë opozitë. Rregullimet e brendshme vlejnë për të motivuar më shumë antarësinë e partisë, por kjo është shumë më pak se të bërit opozitë. Ne ekzistojmë, jo për të pasur një organizatë, por për të patur një opozitë në këtë vend. Ne ekzitojmë se duam të marrim përgjegjësitë e opozitës. Njerëzit nuk do të na ndjekin se respektojmë rregullat e statutin. Njerëzit do na ndjekin vetëm nëse i bindim se kemi aksion politik. Njerëzit do na ndjekin vetëm nëse i bindin se jemi të vendosur. Ndaj, pavarësisht temës dhe vlerësimeve për cilësinë e interpretimit, debati i seancës së fundit, veçanërisht fjala dhe qëndrimi i Bashës dhanë shkëndijën e parë të optimizmit opozitar.

Sot, duhet më shumë se kurrë që të forcohet aksioni opozitar në parlament. Argumenti i opozitës, kauzat e opozitës, interesi publik, bindjet dhe vizioni i opozitës shpalosen dhe mbrohen në parlament. Atje është skena e politikës. Atje përplasen jo ligjërimet dhe jo ligjëruesit, por idetë, qëndrimet që ndajnë pushtetin nga alternativa tjetër, ajo e opozitës. Kjo është alternativa që trysnon mbi qeverinë, mbi vendimet dhe sjelljet e saj. Kjo është alternativa që u jep shpresën shqiptarëve që ka më shumë se një rrugë dhe se rrugën nuk e përcakton "timonieri", por pasagjerët. Kjo betejë nuk bëhet vetëm nga deputetët. Kjo betejë bëhet nga të gjithë. Kërkon energjinë dhe kontributin e gjithkujt brenda dhe jashtë sallës së Kuvendit, brenda dhe jashtë PD-së.

Fjala e Bashës dhe përballja e tij e parë e fortë me Ramën e ndihmoi profilizimin dhe vetpërkufizimin e opozitës. Ky është vetëm gongu i parë i ndeshjes. Çdo seancë e Kuvendit duhet të përcojë fort tingullin e këtij gongu. Demokratët dhe çdo qytetar që vetpërcaktohet si opozitar ringrihen vetëm kur dëgjon gongun e ndeshjes.