Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

'Huqet' e leximit të Lutfi Dervishit: Po lexoj 5 libra njëherësh...

Politiko 14 Korrik 2017, 18:09

'Huqet' e leximit të Lutfi Dervishit: Po lexoj 5 libra

-Librat i zgjidhni nga autori apo zhanri?

Zhanri.

-I keni lexuar të gjithë librat që keni në bibliotekë?

Jo. Ndaj ka vite që ato libra që blej i lexoj. “Sa shumë libra, sa pak kohë”.

-Libri i parë që keni lexuar…

Nuk më kujtohet titulli, libër për fëmijë.

-Libri i parë që keni kursyer për ta blerë…

Nuk kam kursyer. Kam marrë rrogën e parë dhe librarinë e kisha 100 metra larg vendit të punës.

-Me kë i ndanit librat kur ishit gjimnazist apo student?

Astriti, një shok i fëmijërisë, me të cilin kemi qenë bashkë në 8 vjeçare, bashkë në Politeknikum dhe bashkë kemi studiuar për inxhinjeri nafte.

-A keni patur kartë anëtarësimi në Bibliotekën e qytetit?

Po, në Bibliotekën Kombëtare, por më shumë për të shfrytëzuar sallën e leximit.

-A shkonit në Bibliotekë dikur, dhe a vazhdoni ta frekuentoni edhe sot?

Jo. Ka ndryshuar gjithçka. Librat i porosis kryesisht në Amazon dhe ka vite që lexoj në formatin digjital.

-I keni marrë ndonjëherë një mikeshe apo miku një libër dhe nuk ia keni kthyer më? Nëse po, cili është ai libër?

Një libër me ese. Kur ma kanë kërkuar nuk po e gjeja, kur e gjeta, thashë le të rrijë edhe pak. Kanë kaluar 10 vjet.

-Keni humbur libra që i keni pasur shumë të dashur?

Vetëm një. Por e zëvëndësova me ndihmën e një kolegu danez.

-A lexonit dikur libra të ndaluar? Mund të na përmendni ndonjë titull dhe si i siguronit?

Nuk di mund të quhet libër i ndaluar një “dispencë” që qarkullonte kur isha në shkollë të mesme.

-Dhurimin e librave është një rit që e vlerësoni, apo librat preferoni t’i zgjidhnit vetë?

Dhuroj dhe rekomandoj libra të mirë. Sikundër çmoj shumë rekomandimet. Ka vite që i besoj pothuaj verbërisht rekomandimeve të Ermal Gjinaj, botuesit të bota.al

-Cilat janë zakonet tuaja të leximit? Lexoni shtrirë në kurriz, përmbys, në tryezën e punës… ?

Lexoj ku të mundem. Edhe në kafe. Koha më produktive janë pushimet, ose udhëtimet jashtë. Në avion ose në kohën e pritjes nga një avion tek tjetri.

-A lexoni në banjë?

Kjo është pyetje retorike.

-Në çfarë gjuhe tjetër përveç shqipes lexoni?

Anglisht.

-Mbani shënime kur lexoni?

Po. Në librat në Kindle, kjo është më e lehtë, pasi në fund, të gjitha shënimet dhe nënvizimet i ke në një file më vete.

-Në letërsi ju tërheq më shumë proza apo poezia? Kur shenjoni një autor që ju pëlqen, lexoni gjithçka të tij/saj?

Cilësia. Jo domosdoshmërisht. Vendosa njëherë të lexoj librat e Philip Roth. Por, te libri i 4 apo i 5 ndërrova mendje.

-Cilët janë ata libra apo autorë që ju rekomandoni se duhen lexuar patjetër?

Rekomandim për kë? Për disa miq tani rekomandoj Yuval Noah Harari, “Homo Sapiens, brief history of mankind…”, dhe “Homo Deus, brief history of tomorrow”; për ata që studiojnë PR do të rekomandoja “Father of Spin”, për të apasionuarit pas politikës, “Faktori Churchill”. Ka disa libra të mirë të botuar së fundmi për Luftën e Dytë Botërore, një prej tyre: Wine &War. Dhe nuk duhet humbur një nga librat më të mirë për Luftën e Parë Botërore: “Sleepwalkers, how Europe went to war in 1914”. Për gazetarët: 'A na duhen më gazetarët të Eric Scherer'; ose 'Intelektualët' të Paul Johnson.

-A ka një libër që ju e konsideroni si Librin Total?

Jo.

-Po t’ju thonë se në Arkën e Noes së Librave duhet të shtini 3 libra për t’i shpëtuar nga Apokalipsi cilët do ishin?

Bibla, Kurani dhe Odiseja.

-Na thoni një maksimë për librat që e mbani mend ose e përsërisni shpesh...

'Televizioni është shumë edukues. Sa herë dikush e ndez, shkoj në dhomë dhe lexoj një libër. *G

-Na thoni një varg të preferuar poezie…

'Fort po shndrit ai diell e pak po nxen…'. Do të shtoja këtu “Deri n’dek besnik ke s’thohet…” të Plakut të Tulës të Gëtes, në përkthimin e Ndre Mjedës.

-Cili është personazhi i preferuar i romaneve që keni lexuar?

Mikael Blomvskit, i Stieg Larsson.

-Autografi më i çmuar apo më i çuditshëm që keni në bibliotekën tuaj?

Disa autografe të Ismail Kadaresë.

-Çfarë po lexoni?

Lexoj disa libra.... “Havel, një jetë”. “Lenini në tren”, “Made to stick”, po rilexoj “1984” dhe “Majat e Shalës” të Rose Wilder Lane.

©Politiko.al