Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

A do ia kthejë dekriminalizimi 'partinë e humbur' Shpëtim Idrizit?

Politiko 27 Dhjetor 2017, 20:03

A do ia kthejë dekriminalizimi 'partinë e humbur'

Alfred Lela

Ka dy ironi, jo fort të holla, në pasojat që solli një lëvizje e papritur e Prokuorisë, e cila çoi në heqjen e mandateve të dy deputetëve të Kuvendit të Shqipërisë. E para është se, burra 'të fortë', që lëvizin me makina luksoze dhe mbështillen nga perceptimi i statusit të biznesmenëve të paprekshëm, janë të detyruar të lënë një prej zyrave më të larta të shtetit për 'çikërrima'. Në këtë rast, ngritja politike ishte një akt force, ndërsa rënia thuajse banale.

Dekriminalizimi po funksionon, mund të thotë dikush. Edhe pse përjashtimi i deputetëve për 'dënime 10 ditëshe' në Itali, na bën të dukemi një vend puritan si Danimarka, gjë që nuk është e vërtetë.

Ironia e dytë është se dekriminalizimi po shpëton edhe 'shpëtimët' e vet, ata që i përdorën instrumentet shoqërorë, që është një parti politike, apo dhe instrumentet 'e shenjta', siç është çështja kombëtare, për të futur në listat e kandidatëve për deputetë biznesmenë lokalë me të shkuar të dyshimtë.

Shpëtim Idrizi është shembulli pasqyrues i kësaj ironie.

Gjatë pranverës ai voziste në ngazëllim dhe bubullonte me deklarata të fryra, që kishin në pëqi interesin e demokracisë së cënuar prej të tjerëve, por që do e mbronte ai me PDIU. Gjithë ai trafik i rënduar prej ëndrrës se nga përplasja e më të mëdhenjve do të pikonte ar edhe për të tretët a të katërtit e interesuar, u shua papritur pas zgjedhjeve, kur Idrizi e pa veten jashtë Kuvendit fillimisht dhe më pas, thuajse, edhe jashtë partisë.

Ata që kryetari i PDIU kish futur nga dera, e nxorën nga dritarja. Në një deklaratë emblematike të deputetit të qarkut të Elbasanit në listën e PDIU, Aqif Rakipi, u shfaq krisja, pse jo edhe bezdia, që Idrizi i shkaktonte. Deputeti i sapozgjedhur e quante përtac kryetarin e siglës nën të cilën garoi në Elbasan, dhe madje shtonte se nuk ia dedikonte kësaj të fundit fitoren. Në një intervistë për të përditshmen 'Panorama' z.Rakipi fliste me autoritetin e dikujt që është pesha më e rëndë në parti. Në këtë e ndihmonte ndoshta edhe fakti se Shpëtim Idrizi kishte mbetur jashtë parlamentit, duke mos mundur të siguronte një mandat për veten në garën e Tiranës.

Pas kësaj shenje të drejtpërdrejtë, të tjera erdhën edhe nga deputetja e re, Reme Lala, e cila i ofroi 'besnikëri' kryeministrit Rama në emër të grupit parlamentar të PDIU. Këtë dorë znj. Lala e shtrinte edhe në emër të Bujar Muçës, deputetit tjetër të PDIU, edhe ai nga qarku i Elbasanit, i cili u tërhoq vullnetarisht para një muaji.

Një element tjetër që e ngroh pokerin e kësaj loje politike është edhe zhdukja nga radarët e Shpëtim Idrizit, i cili me mungesën e tij u kthye praktikisht në ish-kryetar të PDIU. Një politikan që e kërkonte protagonizmin me qiri, Idrizi ka marrë mungesa në gjithë ato orë të nxehta skandalesh e debatesh që kanë bërë palët të ndeshin brirët në muajt e një vjeshte luftarake, e cila duket se ka mbjellë farën e një dimri të acartë politik.

Për Shpëtim Idrizin, këto kohë, mund të thuhet se ka qenë një kryetar në hije, ose një kryetar pa parti. Ndoshta, dekriminalizimi ia kthen atë që humbi në zjarrin dantesk të lakmisë për më shumë, për më fort, për më lart dhe për më larg.

Nëse jo, karma is a bitch!