Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Ja përse zonja Marku prishi “ekuilibrin e terrorit”

Politiko 16 Mars 2018, 20:14

Ja përse zonja Marku prishi “ekuilibrin e terrorit”

Gentian Gaba

Nga paraditja e sotme një nga gjashtëdhjetë e një bashkitë e Shqipërisë drejtohet nga mbrapa kangjellave të një burgu. Qytetari i parë i Lezhës, nënkryetari i Bashkisë, si dhe njëzet e një zyrtarë të tjerë janë ndaluar për 'shpërdorim detyre' dhe 'tjetërsim prone'.

Nuk është aspak mëkat të kesh dyshime të arsyeshme, jo vetëm mbi pafajësinë, e cila është e drejtë themelore e çdo qytetari, deri në shkallën e fundit të procesit gjyqësor, por mbi orientimin që po merr kjo drejtësi. “Eppur si muove"... por në ç'drejtim?

Pas ish-drejtorëve të rrugëve, furtunës mbi bashkinë e Rrogozhinës, flladi i ri që fryn në drejtësi, i cili mishërohet nga zonja Arta Marku, u përplas si stuhi mbi një tjetër përfaqësues të opozitës.

Sigurisht, operacioni i ndërrmarë nga Prokuroria duhet të bëjë drejtësi me të gjithë ata që kanë hedhur dorë mbi atë mrekulli që është “Rana e Hedhun”; megjithatë, për ata që janë vigjilentë ndaj aktualitetit dhe drejtimit nga fryn era, nuk është mëkat të mendosh keq.

Ata që në këto njëzet e tetë vite nuk kanë fjetur gjumë, nuk surprizohen nga këto arrestime, madje presin edhe të tjera, sepse të gjithë e dinë impaktin që ka pasur politika në xhepat dhe pronat e çdo shqiptari.

Gjithsesi, duke injoruar militantët e verbër që kanë futur kokën 'në ranë', qytetarët që kanë sy për të parë, kuptojnë se nuk jemi përballë një drejtësie daltonike, por të vëmendshme ndaj ngjyrave partiake.

Në këtë xhungël, ku mesa duket nuk sundon më ligji i xhunglës, ekuilibri midis politikës dhe drejtësisë ka ndryshuar, dhe jo për vullent të atyre që e votuan me 140 vota pro; por të ndërkombëtarëve, të cilët investuan kohë dhe para të taksapaguesve amerikanë dhe europianë në Reformën në Drejtësi.

Por, nuk është ende koha që qytetarët e ndershëm të këtij vendi të brohorasin 'fitore', pasi jemi ende në përplasjen e parë, ku një pjesë e politikës po i jep vetes një rol mesianik, duke krijuar dikotominë 'të mirët' dhe 'të këqijtë' që realisht nuk qëndron.

“Pala” tjetër, siç i quajti mbrëmë në prime time zonja Arta Marku ata që e ndezën flakë Parlamentin ditën që ajo u betua, nuk është më e korruptuara, është thjesht më e ekspozuara.

Largimi i Adriatik Llallës, me apostile ndërkombëtare, prishi status quo që mbizotëronte deri në atë moment. Prokuror pas prokurori pandëshkueshmëria ishte ngritur në totem, sepse dihej që rotacioni politik do të prodhonte ndëshkime selektive. Askush nuk kishte interes që të zhvillonte një betejë totale, me përdorimin e drejtësisë, sepse kur të ishte zhveshur nga pushteti, do të binin viktima të hakmarrjes për (sh)përdorimin e detyrës.

Një “ekuilibër terrori”, ku secili mund të bëhej xhelati i tjetrit, të ngritur mbi konceptin e bashkëfajtorëve dhe frikës të ndërsjelltë. I tmerrshëm, por perfekt, sistemi ra.

Ardhja e zonjës Marku shkatërroi simetrinë midis palëve.

Partia që gëzonte mazhorancën kur po ngrihej 'drejtësia e re', dhe sot që kjo po implementohet, fitoi një garë të “padukshme” në sytë e ndërkombëtarëve. Jo sepse Prokurorja e Përgjithshme e Përkohëshme e ngre ose e ul gishtin e madh sipas vullentit të Kryeministrit, por sepse pushteti qendror dhe lokal të lehtëson mundësinë për të lëvizur ingranazhet duke hedhur në tryezën e drejtësisë dosjet, informacionet, shkeljet apo edhe dyshimet e kundërshtarëve të tu.

Kështu ndodhi për rrugën Tiranë – Elbasan, për bashkinë Rrogozhinë, dhe sot për bashkinë e Lezhës. Ky do te jetë edhe skenari për ditët dhe muajt në vijim. Drejtësia do të furnizohet nga mazhoranca, do të nxirren të korruptuarit përpara opinionit publik, për të goditur me forcën maksimale kundërshtarin sepse, herët apo vonë, era e drejtësisë do të ndryshojë.

Por, nëse era e drejtësisë nuk ndryshon, ose ndryshon tepër vonë, rreziku bëhet edhe më i madh.

Për të cituar z. Lubonja, nga dy banda që luftojnë për pushtet, do të gjendemi përballë një bande të vetme, atë që goditi e para.

Për vetëmbrojte, jo për drejtësi.