Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Ke prova, ke fotografi?

Politiko 22 Qershor 2019, 16:17

Dritan Shano

Politikanit i jepet pushteti në mirëbesim, pa prova për zotësinë, aftësinë, apo qëllimet e tij, vetëm mbi bazën e premtimeve. Minimalisht, përmbushja e tyre janë përgjegjësia morale e politikanit. Po mbi këtë bazë i kërkohet largimi, kur ai jo vetëm nuk arrin të përmbushë premtimet, por e zhyt vendin në varfëri dhe depresion.

Për shkak të keq-qeverisjes në vitet e fundit janë larguar nga vendi rreth 500.000 shqiptarë. Ky është krimi politik. Kryeministri mund të jetë i pafajshëm penalisht në raport individual, por mbetet fajtor politik kundrejt tërësisë që përfaqëson largimi i i tyre.

Kaq mjafton që Kryeministri të japë dorëheqjen. Për "krim politik". Por jo, Kryeministri dhe gjithë të tjerët të kapur tek ushkuri i tij, refuzojnë të largohen "për mungesë provash penale". Duke lënë mënjanë për një moment shkatërrimin e sistemit politik në Shqipëri, prej ndërmjetësimit të krimit në marrjen pushtetin, a thua që vdekja e 91 vjeçares Barbulla Pepa nga i ftohti, për shkak të politikave të qeverisë është "mungesë provash"?!

Faji i një politikani nuk mund të trajtohet njësoj me fajin individual të kriminelit që të quhet faj, pra që të kesh prova të pakundërshtueshme, të prekshme, flagrante etj., sipas përcaktimeve të Kodit Penal.

Duhet bëre dallimi midis Krimit politik dhe Krimit Penal. Njerëzit gjykojnë për të parin. Politikani nuk mund t'i fusë njerëzit në kurthin e gjetjes së provave individuale penale, siç tenton të bëjë Kryeministri dhe gjithe koreano-veriorët e tjerë të Rilindjes. Njerëzit nuk mbledhin prova. Ata janë në mirëbesim. Provat i mbledh prokuroria, jo populli. Populli nuk është hetues. Populli të jep besimin, populli mund të të heqë besimin. Kjo është drejtësia e popullit. Ajo tjetra është penale.

Krimineli ordiner nuk do ta pranojë kurrë fajin me shpresën se organet e hetimit nuk do i gjejnë provat e fajit të tij, se ai i ka fshehur ato, i ka zhdukur ato, apo është i sigurtë në omertá-n e bashkëpunëtorëve të vet. Ai do vazhdojë të thotë se është i pafajshëm, se nuk ka asnjë faj, se nuk ka prova për fajin e tij, se është "akullore"; se nuk ka "bir kurve", dhe "bir nëne" të provojë se, se ka zero lidhje, se ...

Por kur një politikan, shmang përgjegjësinë morale, i përvidhet krimit politik, shfajësohet duke thënë se këto janë indicje, nuk janë prova (gjuhë penale) dhe i kërkon njerëzve që t'i provojnë fajin penal, pra fillon dhe mbrohet njësoj siç mbrohet një kriminel, atëhere ky politikan është individualisht kriminel.

Ne kemi arritur në pikën kur dialogu i Kryeministrit dhe gjithë Rilindjes me shqiptarët nuk është më një dialog politik, por është nje dialog penal. Eshtë e qartë së kjo mazhorancë e ka humbur debatin politik me shqiptarët, dhe po tenton ta shmangë rezultatin duke hapur një debat penal me ta. Ky zhvillohet rreth ekzistencës apo mungesës së provave të krimit. Në fakt njerëzit diskutojnë, flasin, protestojnë politikisht, jo penalisht!

Diskutimi politik ka mbaruar. Ndërsa "diskutimi" penal nuk mund të zhvillohet as në sheshe, e as në studio televizive, por vetëm në institucione të specializuara kushtetuese. Ky është momenti që populli të zbret nga karrikja dhe të çon në shtëpi. Kjo është detyra e popullit. Të të çojë në shtëpi. Në burg, sipas provave të krimit, të çon Prokuroria dhe Gjykata - këto të dyja, për momentin, ne shqiptarëve nuk na ndodhen.