Osmani jep mesazhin e fundit si presidente: Kosova është e pathyeshme, nuk dorëzohet kurrë

Vjosa Osmani ka përmbyllur mandatin e saj pesëvjeçar si presidente e Kosovës.

Gjatë një ceremonie të mbajtur në Presidencë, ajo i dorëzoi  mandatin, kryekuvendares Albulena Haxhiu dhe nga sot do të jetë ushtruese e detyrës së presidentes.

Osmani gjatë fjalimit përmbyllës tha mes tjerash se Kosova nuk është e fortë vetëm kur fiton dhe është e pathyeshme sepse nuk dorëzohet kurrë.

Më poshtë fjalimi përmbyllës i mandatit të Presidentes së Republikës, Vjosa Osmani: 

Të dashur qytetarë të Republikës së Kosovës,
E nderuar mërgatë, forca që e mban Kosovën të lidhur me botën!

Nuk ka nder më të madh se t’i shërbesh Republikës.
Nuk ka përgjegjësi më të madhe, por edhe më fisnike, sesa të mbash mbi supe besimin e qytetarëve të tu.

Falë përkushtimit tuaj ndaj vlerave demokratike dhe këmbëngulësisë për të krijuar institucione të qëndrueshme, unë e kam pasur këtë nder dhe përgjegjësinë madhore që të sigurohem se vullneti i juaj e zëri juaj do të përfaqësohen denjësisht.

Që nga dita e parë, e kam marrë këtë detyrë me një bindje të qartë: se integriteti nuk negociohet, se shteti nuk përkulet dhe se besimi i qytetarëve nuk shpërdorohet.

Kjo ka qenë busulla ime edhe kur rruga nuk ka qenë e lehtë e jashtëzakonisht sfiduese.

Mbështetja juaj ka qenë e qartë, e zëshme dhe e vazhdueshme.
E kam ndjerë në çdo lagje, në çdo fshat e qytet, në çdo takim, në çdo mesazh dhe në çdo mundësi që kam pasur t’ju takoj.

Ajo mbështetje, mbi të gjitha, ishte besim.

Dhe për këtë besim, përulem para jush me mirënjohjen më të thellë e të përjetshme.

Sepse besimi i qytetarëve është forca që i jep kuptim çdo përgjegjësie publike. Atë besim unë e kam kthyer në besnikëri, ndaj jush, ndaj parimeve të shtetit, ndaj vlerave tona të përbashkëta kombëtare e demokratike. Besnikëri, vetëm e vetëm ndaj Republikës së Kosovës, sovranitetit të saj, pavarësisë së saj e paprekshmërisë së kufijve të saj.

Për mua, thelbësore ka qenë dhe mbetet mbrojtja e interesit të shtetit dhe të qytetarëve tanë, ndërlidhja e historisë së mundimshme e sakrificës së popullit tonë me vizionin e atit themeltar të Republikës, Presidentit Rugova, nderimi i luftës sonë çlirimtare dhe mbrojtja e aleancave me aleatët tanë të sigurisë të cilët edhe 27 vite pas lufte, së bashku me institucionet tona ende e mbrojnë kufirin tonë me Serbinë. Mbrojtja e aleancës së lirisë me SHBA-të, me vendet evropiane dhe të gjitha vendet paqedashëse gjithandej globit ka qenë dhe mbetet themeli i qëndrueshëm për mbrojtjen e paqes. Unë nuk lëviz nga ky vizion, sepse ky është vizioni i shtetit tonë, ky është vizioni i qytetarëve të vendit tim.