Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Kryediplomatja e Austrisë refuzon “Ballkanin Perëndimor”: Është një term teknik i çuditshëm

Politiko 6 Qershor 2018, 12:18

Kryediplomatja e Austrisë refuzon “Ballkanin Perëndimor”:

Vitet e fundit ka hyrë në përdorim termi “Ballkani Perëndimor”, që i referohet gjashtë shteteve ballkanike: Shqipërisë, Kosovës, Maqedonisë, Malit të Zi, Serbisë dhe Bosnje-Hercegovinës.

Ky term përpiqet të bëjë ndarjen midis shteteve të Ballkanit që nuk janë ende pjesë e Bashkimit Evropian dhe atyre që janë anëtarësuar në union. Megjithatë, ministrja e Jashtme e Austrisë, Karin Kneissl refuzon ta përdorë këtë term dhe e konsideron teknikisht të çuditshëm.

Në intervistën për ‘Deutsche Welle’, Kneissl i ka konsideruar shtetet e Ballkanit si pjesë të Evropës dhe ka theksuar se procesi integrues i tyre do të jetë në qendër të presidencës austriake të Bashkimit Evropian.

Zonja ministre, cilat janë objektivat që keni për Presidencën e radhës të Këshillit të BE?

Në pikëpamje të politikës së jashtme bëhet fjalë para së gjithash për afrimin e shteteve të Evropës Juglindore me Bashkimin Evropian. Ky rajon është i rëndësishëm për ne, atë e kanë lënë keq pas dore në njëzet vjetët e fundit. Unë vetë e shmang përdorimin e termit "Ballkan Perëndimor", ai është një term teknik i çuditshëm dhe për mua qytete si Sarajeva dhe Beogradi janë gjithashtu qytete evropiane.

Ju flisni për "afrim". Pas takimit të nivelit të lartë në Sofje është përhapur një zhgënjim relativisht i thellë në gjashtë shtetet, të cilët ndodhen me statuse të ndryshme kandidatësh ose jo kandidatësh. Çfarë do të ofroni konkretisht? Çfarë do të përpiqeni të arrini?

Ne këtu mund të shfrytëzojmë vetëm dinamikën. Shtetet vetë duhet të vënë në jetë një sërë reformash. Në rastin e Bosnjë-Hercegovinës bëhet fjalë para së gjithash për reformën e ligjit zgjedhor përpara zgjedhjeve të 7 tetorit, dhe ne nuk mund të ofrojmë këtu diçka, ne vetëm mund t'i kujtojmë shtetet që duhet t'i vazhdojnë reformat e tyre. Ne do të angazhohemi para së gjithash te kolegët tanë në ato kryeqytete, të cilët gjeografikisht dhe historikisht janë pak më larg, që ata ta kuptojnë se ky rajon është i rëndësishëm.

Kjo do të thotë se ju jeni për një vazhdim të procesit të pranimit ose të integrimit të gjashtë vendeve?

Ne mbështesim që ata, të cilët kanë sot pozicione vendimmarrëse, të zbatojnë reforma, në mënyrë që të kemi afrim me Bashkimin Evropian. Këtu kemi të bëjmë me shtete shumë të ndryshme me parakushte shumë të ndryshme përsa i përket numrit të popullsisë dhe nga pikëpamja administrative. Nuk mund t'i hidhni në një kusi të gjitha këto shtete, po ata do të vazhdojnë në një proces pozitiv gare me njëri-tjetrin procesin e tyre të reformave.

Ditët e fundit, në prag të presidencës së radhës së BE në Austri ka pasur një debat të nxehtë për temën e migrimit dhe për kontrolle të mundshme kufitare. Çfarë duhet të kuptojmë me këtë?

Liria bazë në Bashkimin Evropian, tek e cila mbështetemi - pra në integrim deri brenda në Bashkimin Evropian - duhet mbajtur natyrisht në një balancë të mençur. Por në këtë debat nuk duhet të ketë as tabu në mendime.