Dilema e Ramës: PS si zyrë avokatie apo si 'SPAK'?

Grupi parlamentar i PS duket se është kthyer në një zyrë avokatie për deputetët socialistë nën hetim nga SPAK, por edhe për rektorin e Universitetit Bujqësor, Fatbardh Sallaku.

Ky i fundit pranoi në dëgjesën me grupin e PS se deklaratën mbi korrupsionin dhe masat e sigurisë që SPAK lëshoi për stafin e UBT, mund ta kishte bërë edhe në konferencë, por jo pa qëllim zgjodhi të japë llogari para Ramës.

“Jam këtu në grupin e mazhorancës qeverisëse, nuk është e rastësishme, mund të dilja edhe në konferencë shtëpi, por nuk duhet të shkëputet asgjë nga konteksti, e kam detyrim për stafin akademik, për studentët, për prindërit, për partnerët”, tha Sallaku nga dëgjesa.

Mirëpo edhe pse ka pranuar që PS të bëhet dhomë rrëfimi për të hetuarit dhe jo vetëm, Rama u shfaq sot kontradiktor kur tha se PS s’mund të marrë rolin e SPAK.

“Çdo person është i pafajshëm dhe i takon autoriteteve të tregojnë fajësinë e tij. Kështu që me shumë keqardhje për z Afrim, dua t’i them se kjo parti nuk merr rolin e gjykatës, prokurorisë, s’ka për ta marrë kurrë. Sa të jetë kjo parti, prokurorët dhe gjykatësit mund të bëjnë punën e tyre të pavarur, por ama nuk jemi shurdh memec”, deklaroi Rama.

Më tej, kryeministri vijoi si këshillues i Prokurorisë së Posaçme duke i kërkuar distancë nga mediat, madje, edhe se si të organizojnë deklaratat për shtyp, që sipas kryeministrit, e kanë kthyer në ‘redaksi lajmesh’.

“Kam një sugjerim për prokurorët e SPAK, në vend që të merren me deklaratat e mia dhe sa herë që bëj deklarata të bëjnë njoftime për shtyp, të bëjnë punën e tyre, e kanë gjithë mbështetjen tonë. Ti dëgjojnë këto që themi si kritika dhe shqetësime konstruktive. Të mos ndjekin mediat sikur janë parti politike, të ndërpresin marrëdhëniet me gazetarët speciale të mos furnizojnë miletin me sekrete hetimore, të mos bëhen redaksi gazetash dhe të bëjnë punën e tyre. Sa herë kurdoherë, kudo qoftë që do të kapin korrupsion atë shpatën ta hapin krahun me të gjithë forcën, por korrupsion ama”, tha Rama.

Kryeministri, me ose pa dashje, e ka kthyer grupin e partisë së vet në një zyrë avokatie apo seancë gjyqësore, fillimisht për Klotilda Bushkën. Deputetja socialiste është marrë nën hetim nga SPAK nën dyshimin se ka penguar hetimet e Prokurorisë së Posaçme, në dosjen “Veliaj”. Shpjegimet mbi hetimin e nisur ndaj saj, Rama ia imponoi t'i jepte para grupit të PS.

Sot, Rama përdori grupin socialist për të nxjerrë si viktimë të SPAK, jo vetëm 24 anëtarë të stafit të UBT për të cilët SPAK dha masat e sigurisë, por edhe rektorin Sallaku, kur ky i fundit pohoi se BKH i ka sekuestruar telefonin.

Dilema e pazgjidhur e kryeministrit mbetet nëse PS do të mbajë pozicionin e një zyre avokatie apo të kthehet në një 'SPAK'.