Dy ditë në Tiranë, mesazhet e Michael Roth për Ramën dhe Bashën

Ministri gjerman i Shtetit për Europën, Michael Roth zbarkoi të enjten për një vizitë dy-ditore në Tiranë.

Fillimisht u takua dhe më pas mbajti një konferencë të përbashkët me kryeministrin Edi Rama, pasditen e djeshme.

Roth rikonfirmoi mbështetjen e qeverisë gjermane ndaj mbajtjes së Konferencës Ndërministrore.  

"Të dyja shtetet, në këndvështrimin tonë kanë përmbushur kushtet për nisjen e negociatave të anëtarësimit dhe për këtë arsye duhet që me të dy shtetet të nisin këto negociata. Më së fundi

Duhet të fillojë ky proces dhe pikërisht për këtë ne po punojmë me vendosmëri. Jam sigurisht optimist e kështu do të mbetem dhe shpresoj që kjo të mund të mbërrihet në 22 qershor,” tha Roth.

Ai u pyet nëse mosmbajtja e premtimeve nga BE dhe lënia peng e Shqipërisë për një kohë të pacaktuar për shkak të mosmarrëveshjeve mes Bullgarisë dhe MV vë në rrezik kredibilitetin e BE.

Ministri gjerman u përgjigj se "Bashkimi Europian duhet të mbajë premtimet e veta dhe këtë e them në mënyrë autokritike".

Roth u ndal edhe te çështja e liberalizimit të vizave për Kosovën. Ai tha se BE duhet të mbajë premtimet e veta dhe se kjo do të duhej të ishte bërë prej kohësh, pasi kushtet janë përmbushur.

"BE duhet të mbajë premtimet e veta dhe këtë e them si autokritikë. Liberalizimi i vizave me Kosovën duhet të ishte bërë prej kohësh. Kjo sepse kushtet janë përmbushur. Edhe në këtë rast është e njëjta logjikë. Unë nuk mund të ndryshoj traktatet e BE-së, Bashkimi Evropian është ndërtuar mbi konsensusin dhe unë nuk mund të ankohem në këtë drejtim", tha ai.

Zyrtari gjerman shprehu urimet e tij për kryeministrin Edi Rama, duke e përgëzuar për fitoren dje përcolli nga Kryeministria një mesazh për opozitën.  

“Shpreh urimet e mia edhe për kryeministrin që arriti që një shumicë të qartë. Si social-demokrat mund ta them se kjo nuk është diçka e vetëkuptueseshme. Dua që edhe këtu të ketë një marrëdhënie mes partisë që qeveris dhe opozitës. Konkursi i ideve është eliksiri i jetës për demokracinë. Duhej që të arrihej një gatishmëri minimale kompromisi. Kjo do të jetë edhe kërkesa e palës tjetër. Kam ardhur të dëgjoj se ku mund të ndihmojmë më mirë. Ti kushtojmë vëmendje të rinjve që po largohen gjithnjë e më shumë. Uroj që të kthehen sepse do të shohin që ia vlen,”-tha Roth.

Takimi me Bashën  

Paraditen e së premtes, ministri Roth i shkon në seli kreut të PD, Lulzim Basha. Pas takimit, ata u prononcuan për mediat.  

Basha bëri me dije se në fokus të diskutimit kanë qenë zgjedhjet e 25 prillit, ku e ka informuar mbi atë që ai e cilëson si masakër zgjedhore. Kryedemokrati shtoi më tej se i ka kërkuar ministrit gjerman të denoncojë masakrën e 25 prillit para se të jetë vonë.

"Ajo që i kam kërkuar ministrit Roth është të flasin dhe denoncojnë masakrën zgjedhore të 25 prillit, para se të jetë vonë për demokracinë dhe Shqipërinë, përpara se Shqipëria të vazhdojë të jetë e mbushur me kriminelë në parlament. Gjermania ka qenë dhe është mbështetëse e madhe e Shqipërisë në çdo front”, deklaroi Basha.

Ndërsa, ministri i Jashtëm gjerman, Michael Roth, tha se për zgjedhjet i beson raportit të dalë nga OSBE/ OHDIR, duke e cilësuar këtë të fundit si një institucion të paanshëm. Ai theksoi më tej se e ardhmja e Shqipërisë është në BE dhe se kjo rrugë nuk varet vetëm nga qeveria, por edhe nga opozita.

 “Natyrisht që të gjitha kritikat që do të adresohen në këtë drejtim duhet të qartësoheshin e kjo duhet bërë nëpërmjet institucioneve. Ne i besojmë raportimeve të OHDIR-it, që është i pavarur. Jam dakord me Bashën që e ardhmja e Shqipërisë gjendet në BE dhe askund tjetër. Nëse kjo rrugë do të jetë e suksesshme kjo nuk varet vetëm nga qeveria, por edhe Parlamenti dhe opozita.

Shpresoj që nga debatet e së shkuarës të gjendet një qasje më e drejtë mes palëve. Unë jam në politikën aktive prej 23 vitesh, prej tetë vite në qeveri, kam qenë dhe në opozitë dhe qeveri, këto elemente janë të rëndësishëm në një shtet. Ne nuk jemi armiq, por kundërshtarë. Shërbimi zotin Basha, ka qenë për mua tejet e rëndësishëm për këtë sërish faleminderit. KE ka vlerësuar në mënyrë të kujdesshme nëse janë plotësuar kushtet e Shqipërisë për hapjen e negociatave dhe nisjen e Konferencës së Parë Ndërqeveritare”, tha Roth.