Nga ‘Ballkani i Hapur’ te Konferenca e Parë Ndërqeveritare, mesazhet e Ursula von der Leyen në Tiranë

Presidentja e Komisionit Evropian Ursula von der Leyen e nisi nga Shqipëria turin e vizitave në 6 vendet e rajonit.

Gjatë vizitës disa-orëshe në tokën shqiptare, von der Leyen përcolli disa mesazhe konkrete.

Ballkani i Hapur

Në konferencën e përbashkët për shtyp me kryeministrin Edi Rama, presidentja e KE tha se "Ballkani i Hapur" duhet të jetë një proces i hapur, gjithëpërfshirës dhe që thellon bashkëpunimin ekonomik mes vendeve të rajonit.

Ajo u shpreh se mirëpret çdo nisëm të vendeve të Ballkanit Perëndimor për bashkëpunim, për aq kohë sa ato respektojnë parimet e Procesit të Berlinit.

“Mendoj që po shohim ecurinë ekonomike dhe thellimin e marrëdhënieve ekonomike, si edhe tregun e përbashkët rajonal. Mendoj se procesi i Berlinit po e shtyn procesin e integrimit para, si kuadër në të cilin 6 vendet e rajonit do të përfitojnë. Çdo iniciativë që është brenda procesit të Berlinit dhe që sjell bashkëpunimin, mirëpritet prej nesh. Ju keni angazhimin tim për të shtyrë përpara procesin e Berlinit. Këto nisma duhet të jenë gjithëpërfshirëse dhe të respektojnë objektivat e përbashkëta”, tha Von Der Leyen.

Nisja e bisedimeve brenda vitit

Von der Leyen deklaroi po ashtu se po përpiqet që konferenca e parë ndërqeveritare me Shqipërinë dhe Maqedoninë e Veriut të mund të realizohet para fundit të këtij viti.

Të dyja vendet kanë marrë dritën jeshile nga Këshilli europian për hapjen e bisedimeve për anëtarësim, por organizimi i konferencës ndërqeveritare e cila shënon dhe nisjen zyrtare të këtij procesi është bllokuar nga Bullgaria, për shkak të kërkesave të saj ndaj Maqedonisë së Veriut.

“Unë mbështes plotësisht ecjen përpara të negociatave të pranimit me Shqipërinë dhe Maqedoninë e Veriut sa më shpejt të jetë e mundur.

Jam vërtet ë vendosur ta realizoj, që të kemi Konferencën tonë të parë Ndërqeveritare, në mënyrë që të fillojmë bisedimet e pranimit para fundit të vitit. Ky është qëllimi”, tha Presidentja e Komisionit Europian.

Investimet

Presidentja e KE, Ursula von der Leyen ka dhënë detaje nga plani i investimeve të BE për Ballkanin Perëndimor dhe Shqipërinë veçanërisht.

Ajo foli mbi dy projektet e rehabilitimit të hekurudhës Tiranë-Durrës-Podgoricë dhe hidrocentralit të Fierzës.

Deri më tani sipas Presidentes janë 9 miliardë euro, synimi është për të sjellë dhe 20 miliardë të tjera, teksa deri më tani kanë ardhur 500 milion euro dhe do të propozohen edhe 600 milion euro brenda vitit

‘’Duhet të rrisim ritmin e vaksinimit, e dëgjojmë në BE dhe Ballkan. Besimi, shkenca janë shumë të rëndësishme. Edhe ne mund t’ju ndihmojmë, të rikrijojmë këtë besim.

Sa i përket pandemisë, më lejoni të them dhe t’ju përgëzoj se Shqipëria është bërë pjesë e BE për certifikatën e vaksinimit. Ky është lajm i mirë. Që të jeni plotësisht të vaksinuar, me vaksina nga EMA, dhe ju duhet vetëm kodi QR”, tha presidentja