Nga zgjedhjet, vula e PD-së te sfidat e SPAK, ngjarjet 'e nxehta' që priten në arenën e politikës gjatë vitit 2023

Viti që sapo lamë pas ishte një 'tërmet' sa i përket zhvillimeve të forta në politikën shqiptare

Edhe 2023-shi nuk na premton 'qetësi' në politike. Në 365 ditët në vijim priten përplasje dhe zhvillime të forta, që do të përcaktohen vendime të rëndësishme, duke përfshirë zgjedhjet lokale, unifikimi i plotë i  Partisë Demokratike, largimi i ambasadores së SHBA, Yuri Kim apo zhvillimet nga SPAK tashmë me një drejtues të ri.

Zgjedhjet lokale

Shqiptarët pritet të votojnë për pushtetin vendor më 14 maj të vitit 2023, në një palë zgjedhjesh që vijnë pas zgjedhjeve të bojkotuara të vitit 2019 dhe pas kontrollit të 60 prej 61 bashkive nga ana e Partisë Socialiste.

Partia Socialiste pritet të garojë e vetme përballë opozitës dhe beteja duket se po udhëhiqet personalisht nga kryeministri Edi Rama.

Ndërkohë mos arritja e një marrëveshje mes grupit të Sali Berishës dhe atij të Enkelejd Alibeajt për të dalë me një kandidat në zgjedhjet vendore, duket se do e çojë PD të përçarë në procesin zgjedhor.

Megjithatë, për herë të parë përzgjedhja e kandidatëve të Partisë Demokratike të drejtuar nga Sali Berisha është kryer përmes procesit të primareve në 4 dhjetor. Ata u votuan nga anëtarët dhe simpatizantët e PD.  

Gara e fortë pritet të jetë në bashkinë e Tiranës ku përballë kryebashkiakut aktual Erion Veliaj, i cili synim mandatin e tretë do të jetë Belind Këlliçi.

Vula e PD

Gjykata e Apelit e shtyu seancën e radhës gjyqësore për shqyrtimin e statutit të PD-së për në 17 janar 2023.

Procesi i statutit ka nisur në muajin shtator por ende nuk është mbajtur seanca e parë , duke qenë se në gjyqet e kaluara kanë munguar ose avokatët , dhe së fundmi edhe një gjyqtar.

Në PD ka një përplasje statutesh pasi më herët gjykata ka regjistruar vendimet e Kuvendit të 11 dhjetorit të organizuar nga mbështetësit e Berishës duke njohur kështu Komisionin e Rithemelimit si drejtues të partisë dhe jo nënkryetarët dhe drejtuesit e tjerë.

Ndërkohë, nëse gjykata miraton ndryshimet e vendosura nga Kuvendi i 18 dhjetorit atëherë Sali Berisha është përfundimisht i përjashtuar nga Partia Demokratike, ndërkohë që mbetet në fuqi deri në një vendim të dytë vendimi për njohjen e Komisionit të Rithemelimit si drejtues të partisë. 

Sfidat e SPAK

Pasuesi i Arben Krajës në krye të SPAK-ut, Altin Dumani, ka paralajmëruar luftë agresive kundër korrupsionit në të gjitha nivelet.

Gjatë vitit 2023, SPAK do të vijojë hetimet për çështjen e inceneratorëve për implikimin e personave të tjerë, përfshirë zyrtarë dhe ish zyrtarë të lartë, të cilët mund të kenë favorizuar apo marrë pagesa të paligjshme nga shoqëria koncesionare e inceneratorëve. Në hetim nga SPAK janë edhe tre koncesione me vlerë mbi 300 milionë euro në shëndetësi; Check-Up-i, laboratorët dhe sterilizimi, ndërsa i në pyetje është marrë ish ministri i Shëndetësisë, Ilir Beqja.

Largimi i Yuri Kim

Ambasadorja e SHBA në Tiranë, Yuri Kim ka deklaruar se do të jetë ‘edhe ca më gjatë në Shqipëri’, edhe pse në Janar të 2023 i mbaron zyrtarisht mandati.

Ndërkohë në Shqipëri, procedurat për zëvendësimin e ambasadores Kim u njoftuan nga Ministria e Jashtme, ngjarje që kjo që u cilësua si një skandal diplomatik.

Kujtojmë se fillimisht është DASH që i dërgon emrin për pëlqim Ministrisë së Punëve të Jashtme dhe pasi të jetë dakortësuar emri i propozuar, nominohet për postin e ambasadorit nga Presidenti i SHBA-së.

Shqipëria pritet të ketë borxhin më të lartë publik në rajon

Sipas raporti të fundit të Komisionit Europian për vendet kandidate, në vitin 2023 vendi pritet të ketë një nivel të borxhit publik prej 73.9% të prodhimit të brendshëm Bruto (PBB), që vlerësohet se është më i larti në rajon, duke ia kaluar dhe Malit të Zi, që deri tani mbante rekordin.

Në vitin 2021, borxhi publik i vendit tonë theu rekordin historik në vitin 2021 duke arritur nivelin më të lartë të shënuar ndonjëherë, në 78.1 për qind të Prodhimit të Brendshëm bruto (PBB), sipas të dhënave zyrtare nga Ministria e Financave.

Stoku në vlerë i borxhit arriti në 1,38 triliardë lekë me një rritje 1,5 miliardë lekë (1.3 miliardë euro) në raport me vitin e kaluar. Ky është zgjerimi vjetor më i lartë i ndërmarrë nga qeveritë shqiptare ndër vite.

Plotësimi i vendeve vakante në Gjykatën e Lartë

Tre vendet vakante pritet të plotësohen në muajt e parë të 2023. 

Gjykata e Lartë ka aktualisht 16 anëtarë nga 19 që parashikohet të ketë. Zëvendësimi i anëtarëve nga KLGJ ka marrë disa vite, ndërsa procedura e ndjekur është kritikuar sidomos sa i përket zgjedhjes së anëtarëve nga jashtë sistemit të cilët nuk i janë nënshtruar një procesi rivlerësimi publik si kolegët e tyre që ishin në pozicione të gjyqtarëve.

Defender 2023

Vitin e kaluar, stërvitja më e madhe ushtarake ballkanike në tre dekadat e fundit, Defender Europe, e përmbylli misionin në Shqipëri, por menjëherë, puna ka nisur që vendi të mirëpresë sërish një stërvitje tjetër, nën emrin Defender 2023.

Stërvitje të tilla, tregojnë rëndësinë strategjike të Shqipërisë. Po ashtu, edhe angazhimin e madh të vendit në NATO. /Politiko/