Panairi i librit, lexuesit mes dëshirës për të lexuar dhe (pa)mundësisë

Të lexuarit për disa është rutinë. Për disa të tjerë pjesë e kohës së lirë. E për të tjerë është një zakon që thuajse është harruar pas përfundimit të shkollës.

Panairi i Librit ndoshta mund të jetë një mundësi për të rikujtuar lexuesit e vjetër t’i rikthehen habitatit.

Këtë vit panairi çeli në Tiranë edicionin e tij të 25-të. Nga data 14 nëntor e deri më 20 nëntor, panairi do të qëndrojë hapur për të gjithë lexuesit në Pallatin e Kongreseve. Stendat e rreth 100 shtëpive botuese nga Shqipëria, Kosova, Maqedonia e Veriut dhe Mali i Zi do të qëndrojnë për 4 ditë të hapura.

Politiko vendosi t’i hedhë një vështrim panairit në ditën e tij të tretë. Pjesëmarrja ishte masive në dhe spikasnin më shumë moshat e treta, prindër me fëmijë dhe shumë pak të rinj.

Pjesa më e madhe afroheshin te stendat e shtëpive botuese, i hidhnin një sy të shpejtë përmbajtjes së librit dhe largoheshin.

“Kam ardhur thjesht për të parë, nuk kam në plan të ble një libër”. Kështu pohoi për Politiko, një vajzë e cila ishte në vitin e tretë të studimit në fakultetin e Mjekësisë.

“Bleva dy libra, kam bërë një listë jo shumë të gjatë. Po mendoj për periudhën e dimrit. Është ideale për të lexuar”, pohoi një student i Gjuhë-Letërsisë.

 

Megjithëse shumë pak pranonin të jepnin një koment, nga vështrimi që ne bëmë në ambientet e Pallatit të Kongreseve në disa stenda, dukej se pak prej tyre preferonin autorët shqiptarë. Më shumë ishin të prirur drejt romaneve apo librave me autorë të huaj.

“Nuk është se nuk më pëlqen letërisa shqiptare, por jam më e fokusuar tek autorët e huaj si Danielle Steel, Dostoevsky apo Bukoëski”, tha për Politiko Blegina, studente e gazetarisë.

“Më pëlqejnë librat fantazi-thriller. Por i kam në listë edhe autorët shqiptarë”, u shpreh një tjetër.

Një sondazh i fundit tregoi se 74.8% e shqiptarëve nuk kanë lexuar asnjë libër për vitin 2022. Por, çfarë thonë qytetarët në Panair për Politiko?

“Nuk lexojmë. Rinia sot e ka mendjen te telefoni te rrjetet sociale”, tregoi një i moshuar.

“Lexoj ndonjëherë kur kam kohë të lirë, më shumë preferoj t’i lexoj në internet”.

“Kam lexuar thuajse nga 1 libër çdo muaj. Nuk mendoj se angazhimet bëhen pengesë. Varet edhe nga dëshira për të lexuar”.

“Nuk kam kohë të lexoj”, pohoi një studente e infermierisë.

“Mendoj se pjesa më e madhe e të rinjve e kanë humbur fokusin nga libri. Ka të bëjë shumë me kulturën e të lexuarit.”

   

Por, ndryshe nga të tjerët, Alberti një djalë 24-vjeçar pohoi se nuk i mungon dëshira për të lexuar, por nuk ka mundësi financiare të kursejë çdo muaj për të blerë një libër.

“E kam të pamundur. Mund të kursej 1 herë në tre muaj maksimumi, por jo gjithmonë. Kjo s’do të thotë se s’dua të lexoj”.

Edhe për Gertën, studente e Inxhinierisë, blerja e një libri thuajse çdo muaj ishte e pamundur.

“Ndoshta duket absurde, por jam student. Përpos shpenzimeve të përditshme, kam edhe librat që studioj në fakultet. Të ble një libër për ta lexuar për qejf, e kam disi të pamundur”./ K.T