Raporti/ 60 email-e të dyshimta dhe vetëm 17% e digjitalizuar...Trashëgimia e RTSH-së në rrezik

Suela Gjidede

Radio Televizioni Shqiptar duket se ka kaluar një vit të vështirë në 2024, sipas raportit zyrtar të paraqitur së fundmi në Kuvendin e Shqipërisë.

Një nga problemet më të theksuara në raportin vjetor të RTSH është gjendja e dobët teknologjike e institucionit dhe ritmi i ngadaltë i digjitalizimit të arkivës historike.

Sipas raportit, procesi i digjitalizimit të arkivës ka nisur, por ka mbetur në nivele minimale.

“Gjithsej në total në periudhën janar–dhjetor 2024 janë digjitalizuar 71,987 minuta, që përbëjnë vetëm 17% të materialeve në total,” thuhet në raportin e Drejtorisë së Arkivës.

Kjo do të thotë se mbi 80% e materialeve historike të RTSH-së mbeten të paaksesueshme në formë digjitale.

"Problematika kryesore është mungesa e investimeve dhe vonesa e procesit të digjitalizimit të
materialeve arkivore që ndodhen në formate te teknologjisë së vjetër ku përfshihen formati: film
16 mm, Ampex 2 inch, Bosch I inch.
Drejoria e Arkivit ka një shqetësim tepër të madh në lidhje me sigurinë e File digjital të
materialeve që ndodhen në storage e RTSH-së", thuhet po ashtu në raport. 

Materialet e digjitalizuara përfshijnë kryesisht:

Koncerte muzikore të Orkestrës Simfonike të RTSH-së
Festivale të rretheve dhe konkurse të zërave të rinj
Emisione të Teatrit në Mikrofon dhe Fjala Artistike

Megjithatë, raporti thekson se “një nga potencialet më të rëndësishme të pazhvilluara ishte digjitalizimi i arkivës blaiv…”, duke nënvizuar se kjo mbetet një rezervë strategjike e pa-shfrytëzuar.

60 email-e të dyshimta me përmbajtje të dëmshme

Në aspektin teknologjik, RTSH përballet me një infrastrukturë të amortizuar.

“Sistemet ekzistuese të IT-së dhe rrjetet transmetuese ishin të amortizuara dhe të papërshtatshme për një institucion të këtij niveli,” thuhet në raport.

Kjo gjendje e ka ekspozuar institucionin ndaj sulmeve dhe humbjes së të dhënave.

"Nëkuadër të masave të sigurisë, janë zbatuarpolitika filtrimi dhe monitorimi të avancuar që kane
rezultuar efektive në identifikimin dhe bllokimin e rreth 60 email-eve të dyshimta me përmbajtje
të dëmshme ose virus", thuhet në raport.

Raporti evidenton se “nuk janë kryer investime të tilla për mungesë të fondeve financiare dhe gjendjes jo të mirë ekonomike të RTSH-së.” 

Këto mangësi jo vetëm që pengojnë zhvillimin profesional dhe efikasitetin e transmetimeve, por rrezikojnë edhe sigurinë kibernetike dhe ruajtjen e trashëgimisë kulturore audiovizive./ Politiko.al.