Kur shteti ikën në drejtim të paditur...

Kur shikon ministrat e qeverisë që bëjnë punë vullnetare duke pastruar mbetjet në fusha e male thua se e kanë ndritur punën në krye të ministrive që drejtojnë, nuk ndjen gjë tjetër veçse neveri për këtë qeveri.

Kur shikon mësuesin e anglishtes mbi shpatullat e vogla të të cilit kemi varur fatet e ekonomisë së vendit, që pozon duke u zgërdhirë teksa pastron fushat nga mbetjet, të vjen keq se ende jeton në këtë vend.

Këto skena të pështira që ofrojnë ministrat e kësaj qeverie aktorësh humori janë një mesazh i qartë për çdo shqiptar se vota është e shenjtë dhe vendos shumë për të ardhmen e tyre.

Dje u sekuestruan pronat e Klement Balilit në Sarandë, por asnjë nga politikanët që morën pjesë në përurimin e resortit të tij turistik nuk kërkoi ndjesë. Tigri i financave të ‘Rilindjes’ Arben Ahmetaj, në fjalën e tij në këtë përurim fliste për rritje ekonomike dhe zhvillim, ndërsa sot fshihet si struci nëpër ara dhe justifikon ditën e punës duke mbledhur plehra e kositur barin.

Mos të flasim për ‘Policinë që Duam’ që nën drejtimin e Edi Ramës, Saimir Tahirit dhe çunave të tij, u kthye në bandën kriminale më të rrezikshme në vend.

Populli dhe opozita denonconte kanbizimin e vendit dhe kërkonte trafikantët për ti burgosur, ndërkohë që policia i strehonte, u bënte edhe transportin e drogës dhe i mbronte.

Nuk ka asnje shqiptar që ta besojë se ata tre shefa policie që i shërbenin Habilajve vepronin në kokën e tyre. Ata thjesht zbatonin urdhrat e ‘të madhit’ në Tiranë.

Arratisja e tyre është e mirë përgatitur pasi eprorët e tyre ishin të papërgatitur nëse ata do ruanin sekretin që e dinë gjithë shqiptarët nga Vermoshi në Konispol, se kanabizimi i vendit ishte politikë shtetërore për të blerë votat në zgjedhje.

Keqardhje për ata policë që shërbejnë me korrektesë, mbi të gjitha keqardhje për ata policë që kanë dhënë jetën për këtë vend, teksa pasardhësit e tyre shohin se si horrat e bijtë e tyre mbretërojnë në këtë truall pa ju hyrë ferrë në këmbë.

Komunistët e shkatërruan këtë vend, ndaj s’kemi ç’të presim tjetër nga bijtë e tyre. Koha është flori thotë populli ynë i mënçur që po nëpërkëmbet pa mëshirë nga oligarkët e ‘Rilindjes’, ndaj duhet të mobilizohemi rreth PD, të vetmes forcë politike që ka kapacitetet dhe vullnetin ti kthejë dinjitetin e nëpërkëmbur popullit shqiptar.