Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Lapsi pa gomë i Andi Bushatit

Politiko 4 Janar 2018, 13:11

Alfred Lela

Dua ta bëj këtë replikë me kolegun Andi Bushati, pa një dëshirë dhe për dy arsye. E para lidhet me një shkelje etike flagrante të portalit lapsit.al, që ai bashkëdrejton me kolegun tjetër, Armand Shkullakun.

E dyta, ka të bëjë me klasifikimin e një lajmi që Politiko.al, media që unë drejtoj, si të pavlerë apo, në termat e tij, 'telenovelë' turke.

Politiko, siç e lajmëroi dje rreth mesditës, do të publikonte në ora 19 të së njëjtës ditë dy materiale audio të 'dosjes Habilaj' që ishin, në fakt, pjesë e përgjimeve italiane, një tekst tërësor (integral) i të cilave është bërë publik në fillim nga Partia Demokratike, dhe më pas nga Top Channel, dhe me radhë të gjitha mediat. Kjo më lejon t'ia nis nga arsyeja e dytë, dhe të them se Bushati ka të drejtë në këtë pikë. Publikimi i materialeve të politiko.al ishte pjesë e këtij 'seriali'.

Çfarë sillnin të re ato? Nga një këndvështrim gazetaresk, ne vepruam si gazetat perëndimore në rastin e dosjeve Wikileaks. Duke mos bërë vetëm një zbardhje integrale, por duke i shtuar asaj edhe një komentar, apo shpjegues. Për të hulumtuar se çfarë ka të re në këtë gjë 'të vjetër'. Politiko këtë ka edhe moton e vet: Lajmet nuk janë të reja, çfarë fshihet pas tyre po. Synojmë ta bëjmë këtë 'specialitetin' tonë.

Këtë bëmë edhe me audiot. Më poshtë do të shtjelloj se cilët elementë të rinj gjetëm ne në këtë lajmi 'të vjetër'.

Gjëja e parë, e pahasur apo e patrajtuar në copëzat e mëparshme të përgjimeve italiane, është një element që del qartë dhe që zbulon se ish-ministri Tahiri ka patur kontakte, jo vetëm me Habilajt, por edhe me ortakët italianë të tyre. Me sa duket, ai nuk ka qenë vetëm një 'lehtësues' me infrastrukturë, pushtet dhe influencë shtetërore, por ka zbritur edhe në 'terren'. Kjo trajtë shfaqet në dialogjet mes dy të përgjuarve, kur njëri prej tyre gjatë bisedës me një italian të paidentifikuar, i kërkon tjetrit (Moisiut) që të mos flasë shumë ("se mos vjen këtu ai, se i ka mbajtur numrin ky").

Materiali i parë audio hedh dritë edhe mbi debatin se cili është Saimiri i përgjimeve, 'kamionisti' apo ish-ministri i Brendshëm. Me zë e tekst, në audion e siguruar nga Politiko, flitet për një njeri me pushtet që quhet Saimir, që merr dhurata të shtrenjta dhe që është i shqetësuar për zgjedhjet.

Audio e dytë, e cila nuk ka në fakt gjë të re, përveç asaj që Bushati quan 'pigment', zbulon megjithatë diçka që e bën fajtor ish-ministrin po aq sa çdo implikim tjetër. Dialogjet mes anëtarëve të 'bandës Habilaj' në makinën e përgjuar nga italianët, shpalosin psetë e kalimit të Audi-t të famshëm nga Tahiri te Moisiu. Targa e makinës së ministrit, dhe fakti që Audi vinte direkt nga një prej mbajtësve të zyrave më hijerënda të shtetit, përdoreshin hapur si mjet intimidimi për policë e doganierë, në kalimet e shumta të kufirit apo edhe në lëvizjet e tyre në territorin e Shqipërisë.

Kjo del qartë në bisedë siç kuptohet po aq hapur se 'skema' ka funksionuar.

Me këtë vetëdije e këtë shpjegim Politiko.al vendosi publikimin e përgjimeve. Pa qenë nevoja të tregohemi hipokritë, ne e parashihnim efektin kaskadë që do kishin. Qenë të parat materiale audio të dosjes, dhe veç kësaj do bënte efektin e vet edhe kureshtja e njerëzve apo kërshëria, siç e quan kolegu.

Bushati nga ana e tij, duke dashur të tregohet sqimatar i hollë ra në hipokrizi të trashë. Ai i 'përbuz' si telenovela audiot e Politiko, por i ekspozon si të ishin 'Iliada' dhe 'Odiseja' në ballinën e lapsit. E bën këtë, dhe kjo na kthen te fillimi, arsyeja e parë pse e bëj këtë replikë, nëpërmjet një veprimi hileqar dhe që nuk i shkon aspak.

Lapsi e hodhi pa vonuar materialin e Politiko duke marrë të gatshme, si punën ashtu edhe ekskluzivitetin e të tjerëve. Në fillim hodhën audiot në platformën 'vimeo' mbi të cilën kishim punuar ne, pa e ditur se i kishim siguruar me copyright. Pas pak minutash audiot u bllokuan dhe Bushati me të tijtë rendën për të 'kopsitur' një mënyrë tjetër 'marrjeje' duke e rihedhur videon si të ishte e tyrja, dhe duke zhdukur çdo shenjë të medias e cila ishte burimi origjinal. Në këtë formë i gjeni edhe sot po të futeni në faqen e tyre. Pas një reagimi të autorit të këtyre radhëve, ata shtuan në fund të faqes një link të Politiko, por 'ç'merr lumi nuk e zë më gjarpri'.

Bushati, i pamjaftueshëm në hipokrizinë e vet, mbajti edhe qëndrim editorial me anë të një shkrimi ku qortonte ato media (Top Channel dhe Politiko.al) që bënin 'shumë zhurmë për asgjë'. Të tjerëve u lexonte spekullimin, ndërsa vetë, me një laps pa gomë, shkruante vjedhjen.

*Shënim: Këtu gjeni linkun e shkrimit të Bushatit