Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Lapsus apo mashtrim me ‘Paktin për Universitetin’? Rama në konferencë foli për tarifën e regjistrimit dhe jo për tarifën e studimit

Politiko 27 Dhjetor 2018, 23:00

Dje, kryeministri Edi Rama doli në një konferencë për mediat dhe njoftoi ‘Paktin për Universitetin’. Një dokument i miratuar në mbledhjen e qeverisë dhe që, sipas tij, pretendon se i jep zgjidhje kërkesave të studentëve.

“Sidoqoftë, në mbledhje, jo vetëm kemi diskutuar, por kemi marrë edhe disa vendime të rëndësishme që adresojnë kërkesat e studentëve dhe shkojnë përtej tyre”, u shpreh Rama.

Në mbledhjen e qeverisë u miratuan katër VKM që, siç u shpreh kryeministri, shpjegohen konkretisht në këto terma:

“Studentët nga familje në ndihme ekonomike, si edhe të verbrit dhe studentët paraplegjikë e tetraplegjikë përfitojnë financimin 100% të tarifës së regjistrimit.

Po ashtu studentët nga familje me ndihmë ekonomike, të verbër, paraplegjikë e tetraplegjikë përfitojnë bursë 10.000 lekë të reja në muaj.

Dua të theksoj se një bazë për të subvencionuar 100% tarifën ka qenë, por për shkak të shumë devijimeve që janë konstatuar në këshillat bashkiakë është vendosur që kjo gjë të bëhet drejtpërdrejtë nga qeveria për çdo student që ka këto kritere.

Studentët me notë mesatare mbi 9-të në çdo program studimi përfitojnë financimin 100% të tarifës së regjistrimit, nga tarifë e plotë që paguanin përpara këtij vendimi.

E po ashtu, në çdo program studimi përfitojnë bursë 10.000 lekë në muaj. Ndërkohë që deri sot, kjo masë ishte në nivelin 8100 lekë dhe vetëm për studentët me mesatare 10.00. Kjo e zgjeron ndjeshëm gamën, por edhe mbështetjen e qeverisë, drejtpërdrejtë, për studentët më të mirë.

Do t’i japim një mundësi të barabartë të gjithë studentëve të tjerë, duke përfituar 50% të tarifës së regjistrimit, drejtpërdrejtë nga buxheti, për pranimin në universitet, të cilët deri përpara këtij vendimi paguanin tarifën e plotë të regjistrimit. Që do të thotë, të gjithë studentët aktualë për pjesën e mbetur të këtij viti akademik, edhe ata me 4-tër dhe me 5-së, nuk do të paguajnë, por do të paguajë buxheti i shtetit për ta.

Ndërkohë që me vitin e ardhshëm akademik, të gjithë ata që nuk do të jenë me mesatare 6-të e sipër do të humbasin këtë mbështetje nga buxheti i shtetit.”

Gjatë gjithë konferencës, kryeministri Rama foli vetëm për tarifën e regjistrimit dhe jo për tarifën e shkollimit apo të studimit.

Në varësi të universiteve paguhen disa tarifa, siç janë: tarifa e aplikimit; tarifa e konkurrimit; tarifa e regjistrimit; tarifa e shkollimit.

Ekziston edhe tarifa e studimit, që në fakt përfshin tarifën e regjistrimit dhe tarifën e shkollimit.

Midis këtyre dy tarifave, regjistrimit dhe shkollimit, ekziston një diferencë e madhe në aspektin financiar.

Tarifa e regjistrimit është vlera monetare që paguan studenti për t’u regjistruar në një program studimi. Kjo tarifë luhatet nga 16 mijë lekë të vjetra në 30 mijë lekë të vjetra.

Ndërkohë, tarifa e shkollimit është vlera monetare që paguan studenti për ndjekjen e një programi studimi pranë një institucioni të arsimit të lartë. Kjo tarifë luhatet nga 250 mijë lekë të vjetra në 400 mijë lekë të vjetra në vit.

Studentët kërkojnë uljen e tarifës së studimit (regjistrim+shkollim), ndërsa kryeministri Rama foli në konferencë vetëm për tarifën e regjistrimit.

Për këtë vendim ka reaguar edhe Lëvizja për Universitetin: “Rama po tallet me studentët e bachelor-it duke premtuar ulje të tarifës së shkollimit, kur në fakt shpall thjesht uljen e tarifës së regjistrimit? Apo, më keq akoma për një kryeministër, nuk ia ka haberin ligjit që vetë po e mbron nga mëngjesi në darkë?”

Kryeministri Edi Rama është duke zhvilluar gjithashtu edhe një “lojë fjalësh dhe vkm-je” në rrjetet sociale.

Në ‘Instagram’, Rama publikon një foto ku njoftohet se tre kategori do përfitojnë financim 100% të tarifës, por nuk përcaktohet nëse kjo është tarifa e studimit (regjistrim+shkollim), tarifa e shkollimit apo tarifa e regjistrimit.

Ndërkohë për pjesën tjetër (jo pjesë e tre kategorieve) do ketë përgjysmim vetëm për tarifën e regjistrimit, pra nga 16 mijë lekë të vjetra studentët do të paguajnë 8 mijë lekë të vjetra.

Në ‘Facebook’, Rama njofton për ndryshimin e VKM-së Nr. 269, për përcaktimin e kategorive që përjashtohen nga tarifa vjetore e shkollimit, si dhe ndryshimin e VKM-së Nr. 903 për përcaktimin e kritereve për përfitimin e bursave studentore. Por në fund, kryeministri i rikthehet sërish tarifës së regjistrimit.

“Mirëmëngjes dhe me dy nga vendimet e djeshme të Këshillit të Ministrave që adresojnë dhe tejkalojnë kërkesën e studentëve për përgjysmimin e tarifave të regjistrimit në universitet, ju uroj një ditë të mbarë”, shkruan Rama.

Vetë studentët e kanë përcaktuar shumë qartë në pikën e parë të kërkesave se për cilën tarifë kërkojnë përgjysmim: “Rritja e buxhetit me 5% e GDP me qëllim mundësimin e përgjysmimit të tarifës së studimit për çdo nivel studimi, përmirësimin e mësimdhënies dhe infrastrukturës, Universitet/konvikt.” / K.S. - Politiko.al