Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

LEGO

Politiko 7 Tetor 2017, 13:27

Mirela Milori

Me lojrat LEGO (copëzat plastike me të cilat fëmijët ndërtojnë figura e lojëra), nuk kam më lidhje. Lidhja ime me to, është shkëputur vite më parë, kur im bir, hoqi dorë prej tyre dhe vendin e legove që i shtypja padashje nëpër shtëpi (e që dhembin shumë kur nuk e ke mendjen), e zunë dinosaurët e mëdhenj, librat me astronautë etj, etj…Por sot m’u kujtuan legot, ose më saktë filmi me titullin LEGO.

Ngjarja e filmit vendoset në një botë në dukje të përsosur, dhe subjekti zhvillohet në përpjekjet titanike të një grushti njerëzish për të shkundur apatinë e “përsosmërisë”. Çdo gjë në këtë film, nga ndërgjegjësimi i ngadaltë i personazheve e deri te fundi i lumtur amerikan, shoqërohet nën kolonën zanore ”Everything it’s aëesome” – “Çdo gjë është përsosmërisht në rregull”.

Nuk e di përse kam ditë që lajmet më duken si vargje të kësaj kënge. Javën e nisëm me një deklaratë tronditëse të ambasadorit amerikan Donald Lu, i cili na thotë në shqip (gjuhën e tij të tretë ndoshta), se ne kemi një problem të madh, shumë të madh me krimin, se drejtimi i vendit është nën ndikimin e 4 klaneve kriminale, e 20 familjeve mafioze. Kaq tha ambasadori, dhe kori i shqiptarëve që shqipen e ka gjuhë të nënës, nisi pa fund analiza, shfajësime, akuza majtas e djathtas, deklarata e shpjegime, të gjitha si një uturimë, ku flitet, por asgjë nuk kuptohet. Nëpër të, u mor vesh arrestimi i shoferit që nuk iu bind uniformave blu, mbasi goditi makinën e tyre në 18 shtator, dhe disa arrestime të tjera, të bujshme për policinë. Por kaq, java u mbyll siç nisi, me retorikë e kuje nga opozita për lidhjen e qeverisë me krimin, dhe me certifikata online dhe nje teknologji inovatore në marrdhënien qytetar-qeveri, nga ana e ekzekutivit.

Nuk po e quaj ngjarje qëndresën e kryetarit të PD në foltore për orë të tëra dhe ndëshkimin - mosndëshkimin nga kryetari i Kuvendit Gramoz Ruçi, (meqënëse sipas këtij të fundit, Basha është rishtar në parlament).

Po media, do pyesë ciniku i parë që ka shtyrë rreshtat deri këtu në këtë shkrim? Po, edhe media është në të sajën! Nuk raporton dot me emra, sepse gazetarët nga qyteti i heshtur, nuk mund të flasin pasi kanë familje e njerëz nëpër punëra, “analistët” këshillohen njëherë se deri ku mund të flasin, ndërsa ata të vërtetët pa thonjëza, që janë pak e dihet cilët janë, e thanë ç'kishin për të thënë.

Nuk e di si do të reagonte një shoqëri e emancipuar e vitit 2017 për gjithçka më sipër, por jam e bindur që rrugët e çdo vendi perëndimor, do të ishin në protesta e marshime kundër krimit që duket se dublon shtetin në pjesën më të madhe të tij, e kundër atyre që për 27 vjet janë paguar nga taksat tona për të vendosur ligjin e për të garantuar sundimin e tij.

Por kjo mund të ndodhë kudo, në USA, Itali, Francë, edhe Meksikë e Kolumbi, por jo tek ne… sepse ne jemi fiks për kolonën zanore të filmit LEGO, ku secili bën sikur nuk ka ndodhur asgjë shqetësuese, ku të gjithë merren me të gjithë, sepse është stili i kohës, ndërsa personazhi kryesor i filmit - djali i mirë, punëtor, e i buzëqeshur i qytetit, iu mbush mendjen të gjithëvë që “Çdo gjë është përsosmërisht në rregull”.