Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Leximi i drejtë i “ndërkombëtarëve”

Politiko 22 Shkurt 2019, 15:44

Stiliano Rushaj

Vendimi politik i djegies së mandateve parlamentare nga Opozita shqiptare e kanë bërë më të dukshme krizën e thellë shumë dimensionale që po përjeton vendi, tashmë prej më shumë se një viti. Kriza institucionale u krijua me zgjidhjen e njëanshme dhe jo kushtetuese të Prokurores së Përgjithshme [të Përkohshme] në Dhjetor 2017 e më pas me mos funksionimin e Gjykatës Kushtetuese për të garantuar rendin kushtetues nën frymën e ligjit themeltar të shtetit shqiptar. Po aq e rëndë është kriza ekonomike dhe sociale e vendit ku barra e korrupsionit dhe zhvillimit të vendit sipas modelit të PPP po varfëron gjithnjë e më shumë konsumin e brendshëm, si dhe po ndryshon në ritme alarmante raportet e grup-moshave nga efektet e një emigrimi masiv të paprecedent në 28 vitet e fundit.

Këto kriza në dukje të veçanta kanë impaktuar në realitet në thellimin e krizës politike duke ndaluar rrjedhën e procesit demokratik të vendit. Sistemi politik në Shqipëri është zhbërë, jo nga akti i djegies së mandateve por nga shembja e sistemit te vlerave liberale ato të zgjedhjeve të lira e të ndershme. Deformimi i vullnetit të qytetarëve, tashmë i dëshmuar botërisht me fakte të paprecedenta ku funksionarë të lartë, kanë ushtruar dhe përdorur mjete financiare në këmbim të votës për subjektin politik Partia Socialiste e Shqipërisë.

Në këtë gjendje ku legjitimiteti i mandatit të maxhorancës duhej hetuar nga Prokuroria, dhe së paku qeveria duhet të kishte dhënë sinjale të para të reflektimit, ka ndodhur e kundërta. Në mënyrë të papërgjegjshme mazhoranca e ka shndërruar tempullin e demokracisë në një parlament mono-partiak. Shteti i së drejtës, respektimi i të drejtave të qytetarëve dhe funksionimi i demokracisë është lënë në dorë të një pushteti që ka kapur të gjitha pushtetet dhe ka zhbërë kontrollin kushtetues të Opozitës për të kontrolluar qeverisjen e vendit.

Në këtë kontekst reagimi i kufizuar i disa partnerëve ndërkombëtarë përgjatë ditëve të fundit kanë qenë nën frymën e përmbajtjes së rendit demokratik në vend. Gjuha e përdorur nga disa përfaqësi diplomatike ka qenë e ngurtë, duke anashkaluar zhvillimet apo kontekstin e tyre. Ato kanë qenë në vijimësi të një axhende formale të komunikimit publik që këto institucione mbajnë me vendin tonë. Ndërkohë disa mediume të lidhura me qeverinë dhe propagandën e saj janë përpjekur të krijojnë një perceptim të shtrembër se si partnerët ndërkombëtarë po i qasen situatës.

Kështu nëse do të shohim deklaratën e Përfaqësueses së Lartë të BE, Federica Mogherini, dhe Komisionerit Johannes Hahn, duken qartazi larg thelbit të krizës në vend, por të përqendruar te një ngjarje që pritej të ndodhte, protesta e 21 Shkurtit. Mesazhet e tyre tregojnë se ata kanë rënë pre e propagandës së qeverisë gjatë takimit të posaçëm me Ministrin në Detyrë z. Cakaj për një gjendje hipotetike që do të ndodhte – një protestë që do nxisi dhunë nga retorika e liderave politikë. Ndërkohë, në faqen e Ministrisë së Punëve të Jashtme dhe Evropës, takimi me Mogherinin është përcjellë në mënyrë rutinore në kontekstin e avancimit të procesit të integrimit të vendit në BE.

Kështuqë, në një lexim të drejtë të ndërkombëtarëve duhet së pari të kuptohet se cilët janë përcjellësit e mesazhit. Partnerët ndërkombëtarë në kontekstin europian janë vendimarrësit kyç në Parlamentin Europian, ku grupi i Partive Popullore Europiane përbën shumicën drejtuese. Po ashtu një reflektim zyrtar do të konsiderohej nga një figurë si Junker, apo dhe personalitete të tjera të shquara si Daul, etj. Po ashtu në raport me partnerin strategjik, SHBA-të, duhet të kuptohet konteksti i mesazhit që përcillet mbi ngjarjen apo situatën për të cilën ai ndërmerret.

Këtë të premte, ishte Grupi i Partive Popullore Europiane pranë Asamblesë Parlamentare të OSBE në Vjenë – EPP_OSCEPA – që mbajti një qëndrim mbi zhvillimet e përkeqësuara të demokracisë në Shqipëri për shkak të qeverisë socialiste, korrupsionit dhe trafikimit të drogës. Këto qëndrime iu përcollën po ashtu Grupit të Partive Popullore Europiane, OSBE dhe GPPE pranë Parlamentit Europian.

Zhvillimet që do të pasojnë do të sjellin po ashtu qëndrime më të konsoliduara, nga ku do të mund të bëjmë një lexim edhe më të drejtë se si ndërkombëtarët po i qasen krizës në Shqipëri. Kështu duhen parë më kujdes qëndrimet politike të vendimarrësve të shteteve antare të BE, po ashtu dhe vetë SHBA-së, të cilat më pas mund të ushtrojnë mbështetjen e tyre për të ndihmuar vendin në daljen nga kjo kllapi e paprecedent. Shqipërisë nuk duhet t’i ndërpritet procesi i integrimit të vendit për shkak të një qeverisjeje që vepron në akte politike të papërgjegjshme. Qytetarët duhet të jenë zot të fateve të tyre, në një moment kaq kyç për demokracinë në Shqipëri, duke i rikthyer proçesit demokratik frymën e kushtetueshmërisë. Në këtë mënyrë zgjidhja do të jetë më e afërt dhe duke patur mbështetjen e drejtë të partnerëve tanë ndërkombëtarë në rrugëtimin tonë demokratik tashmë prej 28 vitesh.