Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Me PD/pa PD

Politiko 28 Qershor 2017, 16:18

Mirela Milori

Vapës së qershorit, këto ditë iu shtua edhe lajmi i nxehtë që provokoi humbja e Partisë Demokratike në zgjedhjet e 25 qershorit. Një i nxehtë, që nuk e freskoi aspak vendimi i Lulzim Bashës për të “ngrirë” funksionet e tij si kryetar i PD. Pritej një humbje e Partisë Demokratike në këto zgjedhje, si rezultante racionale e shumë të dhënave parazgjedhore, por nuk pritej se çdo të ndodhte më pas.

Në mbrëmjën e 27 qershorit, deklarata e Anëtarëve të Këshillit Kombëtar, me deklaratën e disa antarëve të tjerë të PD, menjëherë mbas mbylljes së procesit të numërimit të votave në rang vendi, ishin “dorashka” e duelit, që të gjithë hodhën kundër Bashës. Ky i fundit, pasi u konsultua me Sali Berishën në mëngjes, doli dhe deklaroi se “Sa dhe ku kam gabuar nuk e përcaktoj dot sot, por nuk mund t’a përcaktojnë as ata që nuk kontribuan një ditë për fitoren e PD”.

Por, nëse Basha do të ikte, cili do të ishte në vend të tij? Të gjithë mërmërisim gjysma emrash, dhe as vetë nuk e kuptojmë se, përse nuk ka një figurë të plotë për të thënë njëzëri: PO, është kandidatura e mundshme për në krye të PD.

Kjo, sepse ne në analizë, nuk shohim një tjetër anë të PD në vite! Faktin që kjo parti e drejtuar tërë jetën e saj nga Sali Berisha, ka patur në përbërje personalitete të forta, më shumë përjashtues se bashkëpunues me njëri – tjetrin që i mbante në një emërues vetëm një njeri: Sali Berisha! Ai ishte njeriu që zbuti mërinë e “Poseidonëve" të partisë kur solli prurjet e reja në KOP në 2005, ai ishte njeriu që iu doli për zot të gjithëve në punët e tyre në ekzekutiv, kur bënin gabime e gafa të rrezikshme edhe ligjore, dhe ai ishte njeriu që la skeptrin e partisë mbas zgjedhjeve të 2013, duke lënë bosh jo vetëm figurën e liderit autoritar, por duke i lënë për herë të parë të gjithë në gjendje të lirë përballë një lideri të ri, i cili sillte një qasje europiane (ndonëse të pazëshme), dhe një mënyrë komunikimi me fjalë e pa aksion, diametralisht të kundërt me vetë natyrën e partisë. Përzgjedhja e Bashës “për të rinjtë” përballë “të vjetërve”, dështoi, sepse një parti nuk funksionin me moshë biologjike. Por, ky argument do një analizë tjetër!

Ndaj sot PD, nuk duhet të tregojë nëse është ose jo e zonja 'të heqë' Bashën, po sot PD duhet të tregojë që është një organizatë politike e aftë të jetojë edhe pa Berishën; një organizatë që zgjedh të drejtojë edhe me forume, nëse i duhet të rimarrë veten deri në krijimin e një lideri të ri, një parti që ka politikanë profesionistë që dinë të jenë pjesë e politikës së viteve 2017, dhe jo peng i inateve dhe mërive të mbledhura në vite.

Nëse PD do të vazhdojë të jetojë si parti, apo nuk do të jetë më pas kësaj që po ndodh, kjo ndoshta nuk ju intereson shumë shqiptarëve. Por, nëse gara në këtë parti në korrik të 2017, do të riprodhonte fenomenin “Maqo Lakrori” të vitit 2009 në PS, ky do të ishte një sinjal për patologjinë e rrezikshme të një sistemi të infektuar politik majtas e djathtas, ku autoritarizmi do të qëndronte e flinte bukur me politikën për masat, ashtu si trëndafili i PS mes dy gishatev të PD!