Mesazhet që Saimir Tahiri transmetoi nëpërmjet veshjes

Asnjë politikan nuk dëshiron të japë përshtypjen sikur është shumë i interesuar në mënyrën se si vishet, ama veshja transmeton mesazhe, e sidomos në politikë. Në botë ka specialistë që studiojnë mesazhet që transmetohen nëpërmjet veshjeve dhe gjuhës së trupit dhe dekodojnë atë që përcillet përmes një tjetër elementi, që nuk është fjala.

Por si e lexojmë ne politikanin sipas veshjes? Të jesh “casual” ose “smart casual” në disa situata e ndihmon kandidatin politik dhe politikanin të duket më i gatshëm për të dëgjuar, e më i arritshëm për t`u kapur. Kur bën fushatë dhe debat, nevojitet veshje e duhur profesionale, por politikanët shpesh dështojnë të kuptojnë se publiku i gjerë vëren gjithçka për veshjen e tyre dhe se si i bën ata të pranishëm për pozicionin për të cilën po konkurrojnë. Por sot, do të diskutojmë veshjen e Saimir Tahirit. Tema e ditës së sotme ishte dorëheqja e Saimir Tahirit i cili nga sot nuk është më deputet. Në një konferencë për shtyp, Tahiri komunikoi dorëzimin e mandatit dhe nga dita e sotme ai rrezikon të arrestohet. Ajo që nuk është diskutuar është veshja e tij, thuajse e njejtë në çdo dalje publike këto 6 muajt e fundit. Me publikimin e përgjimeve të dosjes së Habilajve, u implikua dhe emri i Saimir Tahirit dhe që nga ajo kohë, Tahiri ka pasur disa dalje publike të cilat kanë marrë vëmendje maksimale. Dalja e parë e tij ishte në emisionin “Opinion” të Blendi Fevziut. Tahiri ishte veshur me xhinse, këmishë dhe xhaketë. Duke hequr dorë nga kostumi dhe kravata.

Momenti i dytë i i Tahirit pas skandalit të përgjimeve të Habilajve ishte përballja e tij me tre prokurorët e e Tiranës dhe kolegeve deputet në “Këshillin e Mandateve”. Edhe ky një moment i vështirë për ish-deputetin, ku diskutohej heqja e imunitetit ose jo. Edhe këtu, Tahiri doli me të njejtën veshje si tek Opinion, këmishën e bardhë, xhaketën blu të errët dhe xhinse.

E ktheu në traditë tashmë, me xhinset e famshme, të njëjta si në daljet e mëparshme, por me një xhaketë ndryshe, ngjyrë gri dhe të mbyllur, u shfaq Tahiri kësaj radhe në ambientet e Prokurorisë së Tiranës. Pra, në këto pak dalje që kishte pas publikimit të skandalit, Tahiri si duket kishte zgjedhur “veshjen e tij të shansit” duke mos bërë thuajse asnjë ndryshim.  

Pas një pauzë prej thuajse 6 muajsh, Tahiri u rishfaq sërish për publikun shqiptar në Kuvend. I veshur me një xhaketë të ngjashme, po në ngjyrën blu të errët, me një ‘T-shirt’ të zezë dhe me xhinset “e fatit”, Tahiri zuri vendin e fundit në Kuvend dhe u bë sërish tema e ditës.

Një ditë më pas, Tahiri doli në emisionin “Zonë e Lirë”. Veshja kishte një ndryshim të vogël, bluza e zezë ishte zëvëndësuar me një gri. Pjesa tjetër e veshjes ishte e njejtë. Tahiri tashmë ka krijuar veshjen e tij që pas përfshirjes në skandalin e Habilajve.  

Dhe ditën e sotme, në dorëzimin e mandatit të deputetit, Saimir Tahiri kishte zgjedhur të njëjtën veshje me të cilën shkoi në Kuvend pas 6 muajsh, në datën 19 prill. Me "T-shirt" të e zezë, xhaketën e famshme blu dhe xhinset “e fatit”, Tahiri në një konferencë për shtyp hoqi dorë nga mandati i deputetit. Me po të njejtën veshje u shfaq në mbrëmje në emisionin 'Të Paekspozuarit" në Top Channel.  

Por çfarë mesazhi përcjell Saimir Tahiri me veshjen? Si shpjegohet kjo sipas specialistëve të veshjes? Veshja është shumë e rëndësishme për besimin në vete dhe ndjenjën e ‘vetë-fuqizimit’. Në këtë rast nuk mund të themi se veshja e Tahirit transmeton ‘vetë-fuqizim’ por stili që ka zgjedhur e bën më të thjeshtë dërgimin e mesazheve tek të tjerët. Sipas studimeve, veshja ndikon në mënyrën se si mendoni, rrit mendimin abstrakt dhe u jep njerëzve një prespektivë më të gjerë. Veshja e Tahirit përkthehet si marketim i vetes si një njeri normal dhe i zakonshëm. Sipas specialistëve, kjo lloj veshje: xhinse, T-shirt dhe xhaketë mund të jetë shumë pak e përshtatshme për një njeri që do të merret me politikë. Pra, kjo veshje transmeton pasiguri, ndryshe nga kostumet që tregojnë siguri e pushtet. Ndoshta veshja që ka zgjedhur Tahiri është e rehatshme dhe komforte për ish-deputetin, por në politikë ajo transmeton tjetër gjë, e sidomos në momente të tilla ne të cilat është përballur ai. Ose, Saimir Tahirit tashmë i ka ngelur shpresë vetëm tek “veshja e tij e fatit”. D.Z/ Politiko.al