Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Ministrat teknikë si avatarë të qeverisë Rama-Basha

Politiko 10 Gusht 2017, 20:48

Alfred Lela

Gushti është një muaj i vdekur politikisht. Gazetarët, më shumë se të gjithë, e dinë këtë. Këtë pranim apo balancë në kalendarin dhe në gjendjen e gjërave, e kanë prishur dy fenomene të reja: Facebook-u dhe portalet. Këta dy përbindësha të rinj në detin e komunikimit (mare monstrum) kërkojnë, medoemos, që gusht të mos ketë.

Komunikimi in perpeturm kërkon ta zhbëjë kalendarin e gjërave: pas julianit dhe gregorianit, ja ku mund të vijë fejsbukiani apo portaliani. Me këtë aht, prej disa ditësh, kur gushti ka hy' e nuk po del, (e kur duket se më shpejt ka me dalë shpirti prej këtij zhegu), është ndezur thirrja, me grushat që i bien gjoksit, për Lulzim Bashën, në mexhlis me dalë.

Një Zot e di ku është Lulzim Basha por, kudoqoftë, mirë ka bërë që ja la veshët rehat dynjasë me tamtamet e një bote të re, që vetëm ai do ta lindte nga gërmadhat e së vjetrës! Nga shtatori e deri në gushtin tjetër, na dalin e teprojnë, rrumbullak 11 muaj, për ta rrotulluar karuselin e fjalëve politike si rropullitë e dreqit të mallkuar.

Po pse e kërkojnë, atëherë, me ngulm, ata që, edhe pse vendi po digjet vape e zjaresh, ju djeg aq shumë xhani për vatanë, sa nuk e lënë një ditë, as atë e as Facebook-un? Cilat janë motivet e tyre?

Nëse heq Fatmir Mediun, shefin e Republikanëve, një aleat i Bashës, pas të tjerëve fshihet, jo meraku për mungesën e Bashës, sesa përpjekja për të bërë me profil lidershipin e ri të Lëvizjes Socialiste për Integrim. Pas ikjes së Ilir Metës në Presidencë, i detyruar me Kushtetutë për të mbajtur një low profile, fusha në partinë e themeluar prej tij i ka mbetur bashkëshortes, Monika Krymadhi, k/parlamentarit Petrit Vaslili, dhe n/Kryetarit, Luan Rama. Kryemadhit dhe Vasilit, të cilët kanë bërë një rokadë si shefa të partisë përgjatë dy muajve të fundit, iu duhet një high profile. (Luan Rama e gjen pak më shpesh dritën e skenës, edhe për shkak të një prirjeje të tij për të qenë kontroversial. Apo 'grindavec', thënë në formë më të thjeshtë).

Po të vini re qarqet politike dhe mediatike që e lëvizin lëmshin e hekurt të zhurmës për mungesën e Bashës dhe ministrat teknikë që nuk ikin, ata janë, jo vetëm të ngarkuar me zemërim ndaj shefit të PD, por edhe shumë të afërt me LSI. Të sponsorizuar prej saj, dhe rrjedhimisht sponsorë apo promotorë të kësaj force. Parabola kryesore e lajmeve apo statuseve të tyre është: Vasili e Kryemadhi po bëjnë opozitë, jo shaka. Basha askund. Hm!

Shpikja e largimit ose jo të ministrave teknikë, është një kalë lufte i cili nuk tërheq dot asnjë karrocë. Ministrat teknikë janë një joçështje. Pas përfundimit të zgjedhjeve, ata nuk janë më shumë se 'dordolecë' në ngastrën e mbuluar nga vrugu, të cilën nuk e rrezikon asgjë. Për faktin e thjeshtë se, çfarë e ka zënë gjarpri nuk e ha më ujku. Hektorizmi apo helenizimi i Gazmend Bardhit dhe Mirela Karabinës, është një pushkë e shkrehur në hava për të mpakur emocionet e vetes, por që nuk i heq as shton gjë gjësë së mbaruar e lavdisë së pafituar.

Të vetmes që 'i ka ra bixha' në marrëveshjen Basha-Rama është Avokatja e Popullit, e cila pa t'i ulej në cv ylli i kaltër i një fati të papritur, i cili, si çdo rrethanë fatlume, gatuar me të shkuar më shumë se me të tashme, përqafohet e nuk refuzohet.

Kështu pra, ministrat teknikë nuk mund të jenë kuaj në një betejë me Bashën. Ministrat teknikë nuk janë ide. Ata, tashmë, janë pothuajse 'sende'. Po të ishin 'njerëz', Rama do i kish 'shkelmuar' me kohë. Mos prisni as atë tjetrën: që Basha të shfaqet nga fundi i gushtit dhe, si në ata filmat e fantashkencës, të shkundë nga supet shend'e'verën e një triumfi, t'u fryjë në gojë a në flegra, dhe ata të ngjallen.

Për t'u bërë avatarë në një qeveri të re, ndërplanetare e ndërideologjike, Rama-Basha.