Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Mos zgjidhni 'të keqen më të vogël'!

Politiko 25 Qershor 2017, 09:22

Alfred Lela

Kur shkohet në votime me psikozën 't'ja japim të keqes më të vogël', gjasat janë që të fitojë e keqja më e madhe.

Sot, shqiptarët nuk zgjedhin dot të keqen më të vogël. Ata u drejtohen kutive të votimit për të gjykuar qeverisjen.

A ka dështuar ajo, apo ka qenë e suksesshme? A është rritur mirëqenia gjatë këtyre katër viteve, apo është shtuar varfëria? A janë shtuar vendet e punës? A ka qenë shkollimi i fëmijëve më i lehtë, më i lirë, dhe më i mirë?

A kanë patur më shumë lekë në xhepat e tyre apo më pak? A kanë qenë më shumë të sigurt, apo më pak të sigurt? A janë dëgjuar më shumë nga vendimarrësit, apo më pak? Si janë ndjerë në raport me pushtetin: të ndrydhur apo të çlirët?

A ju është dëgjuar fjala?

Miti i 'së keqes më të vogël' është një pjellë përtacie e mendjeve në tranzicion. Një 'dikotomi unitare' e cila e përjashton zgjedhjen, edhe pse shtiret sikur ta lejon alternativën `mes së keqes dhe së keqes`. Eshtë, me fjalë të tjera, një fugë pa dalje në rrethrrotullimin politik. Prej saj lind rënia e pandashme në të keqen më të madhe e të pashmangshme.

Shmangia vjen duke bërë ato pyetjet më lart, të cilat lejojnë që, me anë të një krahasimi të thjeshtë, të bëhet vlerësimi.

Sigurisht, këto pyetje nuk janë për të gjithë llojet e votuesve. `Të betonuarit` nuk janë të hapur ndaj argumenteve. Ata as nuk shkojnë deri te guximi i abstenimit. Guxim për ta është, siç kam dëgjuar të thotë një grua në Jug të Shqipërisë, 'të mos e tradhtojmë idealin'.

Ideali nuk kërkon argument, por vetëm bindje.

Pyetjet janë për atë që quhet 'masa gri e votuesve'. Ata që përcaktojnë fatin e zgjedhjeve. Kjo zonë e lëngshme e elektoratit e shfaq 'pabesinë' e vet, ideologjike apo partiake, nëpërmjet inteligjencës.

Këta janë njerëzit që mund t'i bëjnë pyetje vetes, por edhe t'u përgjigjen atyre. 'Ideali' për ta nuk është një rudiment i së shkuarës. Përzierja e së shkuarës së afërt me të tashmen dhe implikacionet e së ardhmes, është idealja për ta.

Shqipëria nuk vuan nga 'e keqja më e vogël`. Vuan nga përsëritja e sindromit të saj dhe rreziku i të shndërruarit, me anë të përsëritjes, në `të keqen më të madhe`.

Votoni duke bërë pyetje! Nëse përgjigjet për to nuk i keni sipas 'idealit të Partisë', i keni rënë në të me votën tuaj.

Dhe, mos e shit votën!

Kjo të klasifikon, menjëherë, si pjesë e `së keqes më të madhe`.