Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Mother Jones & motherfuckers

Politiko 9 Mars 2018, 18:53
Mother Jones & motherfuckers

Alfred Lela

Në dy artikuj të publikuar nga revista Mother Jones, një media e krahut të majtë në Amerikë, ku flitet për lobimin e Partisë Demokratike të Shqipërisë dhe përfshirjen e rusëve, bien në sy disa elementë të cilat e kundërshtojnë pretendimin e vetë MJ për gazetari të pavarur.

Shkrimet mundohen të përcjellin idenë se Rusia, ashtu si në zgjedhjet amerikane është përfshirë edhe në ato shqiptare.

Po ashtu, bëhet çmos për të skicuar një hartë të marrdhënieve mes konservatorëve shqiptarë (PD) dhe atyre amerikanë (Partisë Republikane dhe Presidentit Trump). Jo vetë faktin e raportit, por ndjesinë se në këtë marrdhënie ka, medoemos, një gjë korruptive, të prishur, që nuk shkon.

Një nga gërditë më të mëdha, që të majtët me arrogancë ia lejojnë vetes, është se çdo gjë konservatore, apo e së djathtës, është e keqe dhe, në të kundërt, çdo gjë e tyre është e mirë. Ka thuajse një mosdurim dhe përçmim të së majtës liberale amerikane apo europiane për presidentët konservatorë amerikanë. E mbani mend Bushin? Shumëzojeni me dhjetë atë padurim dhe do të kuptoni sa përçmohet Trump prej tyre.

Edhe revista Mother Jones këtë bën. Ajo e citon të plotë deklaratën e kryeministrit shqiptar, Rama, i cili e shihte, atëherë kandidatin amerikan për President, si një kërcënim për Amerikën dhe për botën. Kontrastin me kreun e demokratëve shqiptarë, Mother Jones e bën kështu: Ndërkohë që Basha ngazëllehej nga ngjitja e Trump, Kryeministri mbajti qëndrimin e kundërt.

Në këtë 'internacionale do të jetë bota e re', të majtët amerikanë e tregojnë hapur se me kë e kanë vëllazërimin dhe, qartësisht, aty nuk hyjnë Trump, Basha dhe as konservatorët amerikanë dhe shqiptarë. Ata madje, në sytë e tyre, janë prej një stofi të lirë.

Eshtë, megjithatë, rasti që ta përqeshim ne ngapak qëndrimin naiv të Mother Jones dhe të të majtëve në përgjithësi. Pretendimi i revistës amerikane është se, ashtu si në zgjedhjet amerikane, edhe në ato shqiptare ka patur ndërhyrje ruse. Këtu fillon gallata. Të majtët amerikanë pretendojnë se Trump e mundi Hillary Clinton vetëm nëpërmjet ndërhyrjes ruse dhe manipulimeve që njerëzit e Putinit i bënë zgjedhjeve.

Nëse rusët arritën të mundin makinën e stërmadhe të Klintonëve, një Kamelot i politikës amerikane, a thua nuk do t'ia kishin dalë të mundnin edhe Edi Ramën, Taulant Ballën, Erion Veliajn dhe Endri Fugën?

Logjika të thotë se Mother Jones gabon në njërën prej hipotezave: 1- Trump ka fituar në Amerikë për shkak të ndërhyrjes ruse në zgjedhje; 2- Rusët kanë futur duart në zgjedhjet shqiptare, duke mbështetur Bashën, por ai nuk ka fituar.

Të dyja nuk qëndrojnë, sepse Basha i humbi zgjedhjet dhe Trump i fitoi. 

Si në të gjitha gjërat e kërkuara dhe të sforcuara, edhe këtu njëra gjysmë komploton kundër tjetrës.

Kjo lloj ndeshjeje e pabarabartë, Rama mund Bashën në Tiranë e bashkë me të Rusinë, të kujton 'përplasjen infernale' në Pashaliman, ku marinarët shqiptarë përzënë rusët nga Baza dhe u mbajnë edhe nëndetëset.

Janë të dyja heroizma qesharakë që, pas rënies së Perdes së Hekurt, nuk i beson njeri.

A thua i besojnë reporterët e Mother Jones këto thagma?

Ky është një paradoks po aq i trashë sa edhe tjetri që e pason. Sipas të cilit, të djathtët në Amerikë dhe në Shqipëri, të njohur si anti-komunistë, anti-bolshevikë dhe anti-rusë, aq të dashuruar me projeksionin e rrëzimit të perandorisë sovjetike dhe komunizmit, janë dashuruar me Rusinë dhe Putinin.

Të majtët, ndërkohë, amerikanë dhe shqiptarë, në gjirin e të cilëve ka fjetur gjithmonë një fërgëllimë e socializmit botëror, rrënjtë e të cilit ishin padyshim ruse, kanë ndërruar pozicion dhe, atë që ia duartrokisnin  Stalinit, nuk ia durojnë Putinit.

Të fundit