Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Nata e panikut/ Si ranë njerëzit në grackën e një paralajmërimi të rremë

Politiko 23 Shtator 2019, 12:06

Nata e panikut/ Si ranë njerëzit në grackën e një

Pasditen e së shtunës me datë 21 shtator Shqipëria u godit nga një tërmet 5.8 ballë i shkallës Rihter dhe me intensitet 7.5 ballë. Sipas sizmiologëve, ky ka qenë tërmeti më i madh që ka prekur vendin tonë në këto 30 vitet e fundit. Në të gjithë Shqipërinë u raportuan dëme të shumta dhe mbi 105 të lënduar. Dëmtime të shumta ka edhe në godinën e Fakultetit të Gjeologjisë, ndërkohë që dy pallate një në Tiranë dhe një në Durrës janë ndarë më dysh.

Tërmete më të vogla pasuan pas tij duke krijuar panik tek qytetarët, të cilët dolën në rrugë për t’u futur në shtëpitë e tyre vetëm gjatë mbrëmjes. Por një panik akoma më i madh ishte ai mbrëmbjes së të dielës, ku pas një tërmeti 4.4 ballë, disa media dhanë një lajm të rreme se pas tij, në orën 23.30 do të binte një tërmet tjetër akoma më i madh se ai i së shtunës.

Sipas raportimit të këtyre mediave, tërmeti do të ishte 6 ballë dhe ata i referoheshin në shkrim sizmologut grek, Akis Tselentis.

Këtë lajm e kishte përforcuar edhe një lajmërim i ministres së Arsimit, Besa Shahini që njoftonte se shkollat 9-vjeçare e të mesme në Tiranë, Durrës dhe Elbasan nuk do të zhvillojnë mësim ditën e hënë.

Në mbrëmje ishte ministrja Olta Xhaçka që njoftoi se është marrë vendimi që po kështu të jenë pushim edhe kopshtet dhe çerdhet e qarqeve në fjalë. Gjithashtu, pushim do të kenë edhe punonjësit e administratës që kanë fëmijë në çerdhet, kopshtet dhe shkollat në këto qarqe.

Intervista e sizmologut grek Akis Tselentis për Top Channel

Gjithçka nisi nga një intervistë e sizmologut grek, Akis Tselentis, për televizionin Top Channel, i cili e komentoi veprimtarinë sizmike të së shtunës në Shqipëri me përqendrimin e një sasie të madhe energjie në këtë zonë.

Në vlerësim të situatës, Tselentis tha se tërmeti kryesor kaloi dhe nuk do të ketë të tjerë, por nuk e kundërshtoi mundësinë e lëkundjeve të tjera, të cilat mund të rezultojnë të rrezikshme për banesat që janë dëmtuar nga goditja e tërmetit të parë.

“E konsideroj të vështirë këtë fakt. Por do të ketë vazhdimisht lëkundje për disa kohë. Dhe mundet që një prej këtyre lëkundjeve të jetë edhe me efekte shkatërruese, pasi nëse një shtëpi ose banesë është dëmtuar paksa edhe me një lëkundje me të lehtë mund të shëmbet. Do kujdes të veçantë në orët e ardhshme”, tha sizmologu grek për Top Channel.

‘Syri.net’ dhe gazeta ‘Shekulli’ botojnë lajmin e sizmiologut grek, por me disa 'shtesa'

Kësaj interviste të sizmiologut Akis Tselitis dhënë për Top Channel i është dhënë jehonë edhe nga media të tjera, ndër të cilat edhe portali Syri.net.

Por titulli që këto dy media përdorën për këtë lajm i paralajmëronte qytetarët se në orën 23.30 të mbrëmjes së të djelës do të binte një tjetër tërmet me magnitudë 6 ballë. Një informacion ky që nuk figuronte në intervistën e sizmiologut grek dhënë për Top Channel.

Lajmi krijoi panik tek qytetarët e Tiranës, të cilët dolën menjëherë nga shtëpitë e tyre. Ata përpiqeshin të largoheshin në zona të hapura, larg ndërtesave të larta nga frika e shembjes së këtyre të fundit.

Një nga zonat më të populluara mbrëmjen e së djelës ka qenë ajo e Liqenit Artificial, ndërsa në zonën e ‘Don Boskos’ kisha katolike strehoi banorët e asaj lagjeje në hapësirat e saj sportive, duke ngritur edhe çadra.

Lajmi i përhapur nga 'Syri.net' dhe 'Shekulli' u përgënjeshtrua menjerë duke u cilësuar si një lajm i rremë dhe kriminal.

Reagimet e sizmologut Ormeni, kryeministrit Rama dhe Ministrisë së Mbrojtjes

Pas lajmit të rremë për një tërmet 6 ballësh në orën 23.30 foli për mediat eksperti i Sizmiologjisë, Rrapo Ormeni.

Ai tha se s’ka nevojë për panik sepse tërmetet nuk mund të parashikohen me orar të saktë dhe se rreziku i madh ka kaluar.

“Ja unë përshembull s’kam lëvizur fare nga shtëpia. S’ka asnjë lloj rreziku. Lëkundjet e lehta do vazhdojnë por goditja më e madhe ka kaluar”, sqaroi eksperti duke u bërë apel qytetarëve të rrinë të qetë në shtëpitë e tyre.

I menjëhershëm ka qenë edhe reagimi i kryeministrit Edi Rama dhe Ministrisë së Mbrojtjes, të cilët e pergjenjeshtruan lajmin dhe duke thënë se është një lajm i rremë për të përhapur panik.

“Ky është një fake news kriminal për të përhapur panik dhe çdo idiot që shkruan për parashikime tërmetesh thjeshtë duhet neveritur”, shkruante Rama.

Ndërsa Ministria e Mbrojtjes sqaroi qytetarët se: “Prej disa minutash qarkullon ne disa portale dhe rrjete sociale nje lajm i rreme mbi parashikimin e nje termeti me permasa, ne oren 23.30. I bejme thirrje te gjithe qytetareve, te mos bien pre e njoftimeve te tilla keqedashese dhe perhapese paniku pasi nuk ka asnje parashikim te tille shkencor nga asnje institucion shkencor. Gjithcka po tentohet te behet per te perhapur panik mes qytetareve eshte kriminale.”

Policia bën ndalimin e gazetarëve që përhapën lajmin e rremë

Pas kësaj ka reaguar edhe policia, e cila ka bërë shoqërimin e gazetarëve që përhapën panik me lajmin që detyroi qytetarët e Tiranës të dilnin nga shtëpitë e tyre. Policia shoqëroi gazetarin e portalit ‘Syri.net’, Aurel Rakipllari dhe gazetaren e gazetës ‘Shekulli’, Daniela Grrica.

“Menjëherë pas publikimit të një lajmi të rremë në portalin ‘Syri.net’ dhe më pas edhe në disa portale të tjera, se sipas parashikimeve të një sizmologu grek do të ketë në orën 23.30 një tërmet të fuqishëm, lajm i cili shkaktoi panik të madh tek qytetarët, të cilët braktisën banesat dhe dolën në rrugë, Shërbimet e Drejtorisë Vendore të Tiranës kanë shoqëruar në polici gazetarin e portalit ‘Syri.net’, Aurel Rakipllari dhe gazetaren Daniela Grrica e ‘Shekullit’, për veprime të mëtejshme, të cilët kanë bërë publikimin e këtij lajmi të rremë, me pasoja paniku tek qytetarët”, shkruhet ndër të tjera në njoftimin e policisë.

A mund të parashikohet një tërmet?

Sizmiologu Rrapo Ormeni deklaroi për mediat se tërmeti nuk mund të parashikohet as në Shqipëri dhe as në vende të zhvilluara të botës.

Pas një tërmeti me magnitudë 5.8 ballë si ai që ra të shtunën në Shqipëri, tërmetet 4-5 ballësh që pasojnë më vonë janë normalë dhe nuk ka vend për panik.

Sipas Ormenit, kjo ndodh për të vendosur në ekuilibër zonat sizmologjike ku është ndjerë tërmeti kryesor. Specialistët e Sizmiologjisë thonë gjithashtu se, se nuk ka gjasë që pas një tërmeti të madh, magnituda e tërmeteve pasuese të vijë në rritje.

Referuar tërmeteve që ranë në vend pas atij me magnitudë 5.8 ballë dhe intensitet 7.5 ballë, sizmologu thotë se këto lëkundje janë të lehta dhe nuk shkaktojnë dëm të madh, duke sqaruar se do të ketë edhe pas-goditje.

“Nuk do ketë më lëkundje të madhe 5.8. Lëkundje të vogla do të ketë, por nuk do të ndihen, janë pa rrezik për qytetarët”, tha Ormeni.

Gjithashtu, edhe sipas sizmologut Llambro Duni tha se këto dukuri natyrore nuk mund të parashikohen, duke sqaruar se është normale që pas një tërmeti të madh, të pasojnë lëkundje të tjera më të lehta. “Sa më i fortë tërmeti, aq më shumë zgjasin pasgoditjet”, tha Duni.