Posta e mëngjesit/ Me 2 rreshta: Çfarë pati rëndësi dje në botë

 Mirëmëngjes!

Politiko.al mbështetur në raporte të gazetave amerikane, ju sjell një blic lajmesh nga bota në ‘Posta e mëngjesit’. Për të marrë ‘Postën’ çdo mëngjes me email na shkruani në [email protected]

 

■ Në debatin përfundimtar para zgjedhjeve amerikane, Presidenti Trump dhe senatori Joe Biden ofruan parashikime krejt të ndryshme për pandeminë e koronavirusit. Trump këmbënguli, në kundërshtim me provat, se sëmundja po "zhdukej" dhe Biden paralajmëroi një "Dimër të errët" që mund të kërcënojë jetën e qindra mijëra amerikanëve të tjerë.

 

■ Republika Çeke bëhet shteti i parë europian që ndërpret kampionatin për shkak të rritjes së shifrave me koronavirus. Ky vendim shqetëson edhe UEFA-n, pasi 3 ekipe çeke marrin pjesë në Europa Ligë.

 

■ 100 milionë amerikanë do të votojnë përmes postës në zgjedhjet presidenciale të 3 nëntorit. Posta amerikane njoftoi të enjten se deri më tani ka dorëzuar 100 milionë fletë votimi, dhe është e përgatitur për hapat e mëtejshëm.

■ Gjermania raportoi 11,287 raste të reja të virusit të enjten, hera e parë që ka thyer kufirin e 10,000.

■ Ministri i Shëndetësisë i Rusisë, Mikhail Murashko, do të vetë-karantinohet pasi një anëtar i familjes së tij doli pozitiv, tha një ndihmës.

■ Katër studentë në një universitet në Britani u gjobitën me një total prej 40,000 paund për mbajtjen e një feste shtëpie me më shumë se 30 persona.

■ Zgjedhjet në SHBA: Rusia kohët e fundit ka pushtuar rrjetet kompjuterike të ShBA dhe ka në plan të ndërhyjë në garën presidenciale në ditët e saj të fundit ose menjëherë pas zgjedhjeve të 3 nëntorit, thonë agjencitë amerikane të inteligjencës.

■ Filiali i Malajzisë së Goldman Sachs u deklarua fajtor për një akuzë konspiracioni pasi punonjësit u paguan ryshfet zyrtarëve në lidhje me plaçkitjen e fondit sovran të pasurisë. Banka do të paguajë miliarda në gjobë në Malajzi, ShBA dhe Hong Kong.

■ Kryebashkiaku i Kopenhagës Frank Jensen dha dorëheqjen dhe pranoi se kishte ngacmuar shumë gra gjatë dekadave. Ankesat dhe rënia e tij e papritur kanë tronditur Danimarkën, një komb liberal që rregullisht kryeson masat ndërkombëtare të të drejtave të grave dhe barazisë gjinore.

■ Ghislaine Maxwell: Deponimi katër vjeçar i ish partneres romantike të Jeffrey Epstein u publikua, duke i dhënë zë një figure të heshtur, por qendrore të skandalit. Maxwell akuzohet për komplot me Epstein në abuzimin e tij ndaj të miturve.