“Në mars u rritën eksportet bujqësore me 18%”, por në Berat tonelata me kastravec po hidhen në kanal

Një ditë më parë, Kryeministri Edi Rama njoftoi me entuziazëm se gjatë kësaj periudhe (në muajin mars) eksportet bujqësore të vendit tonë janë rritur me 18% në krahasim me një vit më parë. Sigurisht, në pamje të parë ky është një lajm pozitiv për ekonominë shqiptare, që bujqësinë e ka një nga sektorët më të rëndësishëm të Prodhimit të Brendshëm Bruto.

Megjithatë, pavarësisht shifrave që deklaron Kryeministri për eksportet e karantinës, fermerët tregojnë tjetër situatë. Emisioni “Fiks Fare” denoncoi mbrëmjen e dy prillit situatën me fermerët e qarkut të Beratit, të cilët po detyrohen të hedhin tonelata me kastraveca në kanal.

Fermerët ankohen se nuk “pika e grumbullimit u ka thënë se nëse do shiten produktet, fermerët do marrin lekët” në të kundërt ato përfundojnë në kanal. Fermerët gjithashtu ankohen se çmimi i shitjes së produkteve të tyre nuk justifikon kostot e prodhimeve. “Ne e ndoqëm kryeministrin që tha  ‘nëse ju ua merr ndonjë grumbullues, ose gjeni mundësi të merrni kredi’ kjo është tallje për ne fermerët”, tha një fermere nga Berati. Fermerët u ankuan gjithashtu se shkak është bllokimi i kufijve nga qeveria.