Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Negociatat/ Soreca: Tani detyrë e qeverisë të veprojë. BE do të jetë pranë jush

Politiko 24 Mars 2020, 16:34

Negociatat/ Soreca: Tani detyrë e qeverisë të veprojë. BE do

Ambasadori i delegacionit të Bashkimit Europian në Shqipëri, Luigi Soreca përshëndeti vendimin e vendeve anëtare të BE për hapjen e negociatave me Shqipërinë. Nëpërmjet një videomesazhi drejtuar shqiptarëve, Soreca e quan këtë “një ditë historike për Shqipërinë”, ndërsa shton se tashmë “Shqipëria do të ketë një status të ri përballë BE”.

“Sot është një ditë historike për Shqipërinë. Shtetet anëtare kanë marrë vendimin unanim për të hapur negociatat e pranimit. Dëshiroj ta uroj Shqipërinë për hapin e madh të bërë drejt anëtarësimit në BE.

Ajo çka ndryshon nga sot është se Shqipëria ka një status të ri përballë Bashkimit Evropian. Tani e tutje, do të zbatohen një sërë rregullash të reja që do ta ndihmojnë popullin shqiptar që t’i bashkohet, sa më shpejt që të jetë e mundur familjes që i përket”, shprehet Soreca.

https://twitter.com/LSorecaEU/status/1242460914869243904

Sipas tij, metodologjia e re e paraqitur nga Komisioni Europian dhe përparimi i qëndrueshëm i bërë nga Shqipëria, kanë qenë të rëndësishme për marrjen e vendimit të së mërkurës. “Metodologjia e re e paraqitur nga Komisioni dhe përparimi i qëndrueshëm i bërë nga Shqipëria në muajt e fundit kanë qenë të rëndësishme për marrjen e vendimit të sotëm. Dua të theksoj veçanërisht frymën e kompromisit dhe unitetit të treguar nga të gjitha palët politike për reformën zgjedhore”, thotë Soreca.

Megjithatë, duke treguar hapat e ardhshëm, Soreca përmend faktin që “Shqipëria duhet të plotësojë disa kushte të kërkuara nga vendet anëtare me qëllim që të mblidhet Konferenca e parë Ndërqeveritare”, duke u shprehur se kryesisht i përket qeverisë të ndërmarrë veprime.

“Cilat janë hapat e ardhshëm? Shtetet anëtare i kanë dhënë mandatin Komisionit që të fillojë përgatitjen e rregullave të lojës, e ashtuquajtura kornizë e negociatave. Shtetet anëtare kanë kërkuar gjithashtu që Shqipëria të marrë masat përfundimtare në disa fusha të rëndësishme në mënyrë që të mblidhet sa më shpejt që të jetë e mundur Konferenca e parë Ndërqeveritare.

Tani është thelbësore që vendi të bashkohet dhe t’i realizojë këto masa. I takon kryesisht qeverisë të ndërmarrë veprime dhe të përgatisë menjëherë një plan të strukturuar veprimi për muajt e ardhshëm. Por kjo punë është një përpjekje e gjithë shoqërisë, që do të ketë nevojë për bashkëpunimin e të gjitha institucioneve, opozitës dhe shoqërisë civile”, shprehet ambasadori.

Në fund të mesazhit të tij, Soreca flet dhe për rindërtimin nga tërmeti dhe situatën e krijuar nga COVID-19, duke u shprehur se “BE-ja do të vazhdojë të qëndrojë pranë jush”.

“Muajt e fundit kanë qenë shumë sfidues për popullin shqiptar. Tërmeti i 26 nëntorit ju goditi rëndë dhe kriza e tanishme COVID-19 po e trondit vendin. Por ju keni reaguar dhe po reagoni me sakrificë, kurajë dhe angazhim. Edhe në këto çaste të vështira ju vështruat përpara dhe treguat vendosmërinë tuaj për të vazhduar rrugën drejt BE-së. 97% prej jush e bënë këtë të qartë shkurtin e kaluar.

Mesazhi juaj është dëgjuar në BE dhe nga shtetet anëtare, të cilat kanë treguar solidaritetin e tyre në Konferencën e Donatorëve në Bruksel muajin e kaluar. BE-ja do të vazhdojë të qëndrojë pranë jush, si gjithmonë, me mbështetjen tonë politike, financiare dhe teknike, për t’i ndihmuar shqiptarët të përmbushin ëndrrën e tyre për t’u bërë qytetarë të BE-së. Sot, ne kemi hedhur një hap të madh më pranë këtij objektivi të përbashkët”, përfundon mesazhi i ambasadorit Luigi Soreca.