Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Ngjarjet që pritet të shënojnë 2018-ën shqiptare. Nga protestat e opozitës te 'bye-bye' Vlahutin & Lu

Politiko 1 Janar 2018, 11:30

Ngjarjet që pritet të shënojnë 2018-ën shqiptare. Nga

Viti që lamë pas ishte i mbushur me shumë zhvillime, kryesisht politike duke qenë se ishte edhe një vit zgjedhor. Çadra, takimi Rama-Basha, qeveria teknike, fushata, zgjedhjet, qeveria ‘Rama 2’, pa shtuar te kjo listë zhvillimet nga fushat e tjera, ishin disa nga ngjarjet që tërhoqën vëmendjen e opinionit publik për javë dhe muaj të tërë.

Por, edhe 2018-ta është një vit i cili parashikon të jetë i mbushur me zhvillime. Më poshtë po bëjmë një listim, të ngjarjeve që pritet të ndodhin në vitin që sapo nisi.

Ngjarjet që pritet të ndodhin gjatë 2018-ës

Protestat e opozitës

Eshte një ngjarje që duket se do të nisë së bashku me 2018-ën. Opozita ka njoftuar nisjen e një vale protestash, që me shumë gjasë do të shtrihen edhe në kohë, duke nisur që nga Janari i këtij viti.

Arrestimi i 'peshqve të mëdhenj'

Në Janar presim arrestimin e 'peshqve të mëdhenj'. Kështu u shpreh ambasadori amerikan Donald Lu në fjalën e mbajtur gjatë një aktiviteti vitin e kaluar. Janari erdhi, dhe tashmë të gjithë presin se kush do të bjerë në 'rrjetën e drejtësisë', siç është deklaruar.

Kryeprokurori i Përgjithshëm

Brenda muajit Prill pritet që KLP-ja (Këshilli i Lartë i Prokurorisë) të jetë konstituuar dhe do të jetë ky organ që do të vendosi emrin e ri të kreut të akuzës në Shqipëri. Do të jetë sërish Arta Marku, këtë herë me një mandat të plotë, apo do të kemi një emër të ri në drejtimin e Prokurorisë shqiptare, këtë do ta zbulojë ky viti i saponisur.

Reforma në drejtësi dhe reforma zgjedhore

2018-ta pritet të jetë vitit kur reforma në drejtësi të marr udhë. Një pjesë e organeve të reja janë ngritur, përfshi këtu edhe nisjen e procesit të ‘Vetting’-ut ndërkohë që organet e tjera do të konstituohen në muajt në vijim (BKH dhe SPAK) në mënyrë që kjo reformë të nis nga zbatimi. Po kështu, gjatë 2018-ës pritet të ketë zhvillime edhe sa i takon reformës zgjedhore. Identifikimi dhe numërimi elektronik janë tezat e hedhura për këtë reformë e cila diskutohet prej vitesh.

Çështja ‘Tahiri’, Dako & Co

Çështja ‘Tahiri’ është një e mbartur nga 2017-ta dhe që me gjasë do të ketë një fund në këtë vit që sapo ka nisur. Po kështu edhe çështja ‘Dako’, e cila u denoncua nga opozita në fund të 2017-ës. Duke ju referuar PD-së, por edhe zërave nga Prokuroria, janë edhe disa zyrtarë të tjerë të lartë të cilët janë nën hetim.

Negociatat me BE

Ashtu sikundër edhe qershori i 2017-ës, edhe muaji qershor i këtij viti pritet të jetë tepër i rëndësishëm për Shqipërinë, pasi do të jetë muaji ku do të vendoset nëse do të hapen ose jo negociatat e anëtarësimit për në Bashkimin Europian.

Largimi i ambasadorëve Lu dhe Vlahutin

Misioni i shërbimit të Donald Lu-së dhe Romana Vlahutin përfundon muajt e parë të 2018-ës. Pritet me jo pak interes se kush do të jetë emri që administrata Trump do të caktojë për të drejtuar diplomacinë amerikane në Shqipëri. Po kështu edhe Bashkimi Europian pritet të sjellë në vendin tonë një përfaqesues të ri.

Ndryshime në qeveri

Vetë kryeministri Edi Rama paralajmëroi se pas 300 ditëve të para do të ketë një analizë të performancës së kabinetit të tij dhe nëse ndonjë prej ministrave nuk ka përmbushur angazhimet, atëherë ai/ajo do të largohet. Edhe nëse 300 ditëshi rezulton i kalueshëm për të gjithë pjesëtarët e kabinetit, lëvizjet në qeveri janë të paparashikueshme dhe mund të ndodhin në çdo kohë.

Ristrukturimi PD

Që prej muajit shtator të 2017-ës, Partia Demokratike është përfshirë në një proces ristrukturimi. Procesi pritet të përfundojë gjatë 2018-ës dhe PD do të ketë emrat e rinj të drejtuesve të departamenteve.

Eliminatoret e Kampionatit Europian

Shqipëria do të mësojë kundërshtarët e saj për ndeshjet e kampionatit Europian që do të mbahet në 2020-ën. Kjo do të jetë edhe prova serioze e trajnerit Cristian Panucci. Kualifikimi në evropianin e kaluar ka rritur pritshmëritë e tifozëve të cilët kualifikimin e shohin si një mision që duhet përmbushur me çdo çmim.

Shqipëria në Eurosong

Edhe këtë viti, ashtu sikundër edhe vitet e mëparshme, Shqipëria do të marrë pjesë në Eurosong. Eugent Bushpepa është emri që do të përfaqësojë vendin tonë në festivalin evropian duke shpresuar për një paraqitje më të mirë se vitet e fundit.

Ismail Kadare dhe çmimi ‘Nobel’

Shkrimtari Ismail Kadare, prej vitesh tashmë, shihet një nga emrat favorit për fitimin e çmimit ‘Nobel’ në Letërsi. A do të jetë 2018-ta viti ku një shkrimtar shqiptar do të nderohet me një vlerësim të tillë?