Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Një letër që ende nuk e ka shkruar Edi Rama

Politiko 27 Maj 2019, 18:16

Një letër që ende nuk e ka shkruar Edi Rama

Kim Mehmeti

Kryeministri i Shqipërisë i shkruan letra opozitës dhe duket sa nuk e ka shkruar letrën më të sinqertë që ua ka borxh shqiptarëve, e nëpërmjet të cilës do ua thotë të vërtetën se gjithë këto vite ai është tallur me ta. Dhe, pse të mos shkruajë letra kur kaluan gjashtë vite e shqiptarët nuk ia dolën ta ‘lexojnë’ të vërtetën se vendi ende drejtohet dhe kontrollohet nga ‘mafia’ leniniste e enveriste dhe se Kryeministri i sotëm i Shqipërisë është vetëm i ‘deleguari’ i kësaj ‘mafie’.

Pasi i dështoi copëtimi i vendit, Presidenti i Kosovës vazhdon të tallet me popullin e vet, duke e argëtuar tani me idenë për bashkimin e Kosovës me Shqipërinë. Dhe, pse mos tallet me ne që na ka mbërthye heshtja, me çka i ngjajmë ne mendjelehtë që nuk e kanë kuptuar se kanë rënë në duart e disa ‘komandantëve’ të deridjeshëm, e politikanë të sotëm, që duan t’u takojë edhe lavdia e djeshme edhe pasuria e sotme, e të cilët nuk e kanë kuptuar se kur je injorant dhe i pavlerë, si dhe kur ‘lavdinë’ e djeshme e përdor si ‘kartë-kredie’ për ta mbuluar hajninë dhe për ta blerë të sotmen politike, herdo-kurdo ‘kartela’ të zbrazet dhe përballesh me të vërtetën se nuk ka pasuri apo pushtet, që ta mbulon 'varfërinë' morale dhe njerëzore.

Pas thuajse dy dekadave vasalizëm ndaj partive maqedonase dhe, pas një dekade pjesëmarrje në regjimin antishqiptar VMRO-BDI, Bashkimi Demokratik për Integrim paralajmëron ‘veting’ për funksionarët e saj, me qëllim që të largohen të korruptuarit dhe ata që kanë lidhje me krimin, duke vazhduar kështu me përbuzjen e intelegjencës së shqiptarëve të Maqedonisë! Dhe, mbase ka të drejtë të sillet me mospërfillje ndaj popullit të vet, sepse shqiptarët e këtushëm shkelën mbi çdo gjë të vlefshme që kishim, duke e lënë fatin e vet në duart e banditëve partiakë që lejuan të ndodhë ‘Sopoti’, ‘Brodeci’, ‘Monstra’, likuidimi i Harun Aliut me shokët, rasti i Kumanovës..., e që sot lëvdohen se janë pjesë e ‘qeverisë reformuese’, dhe që paturpshëm shtiren se nuk e dinë se i prodhoi, i forcoi dhe i bëri të pushtetshëm regjimi kriminel DPMNE-BDI!

Po pra, shqiptarinë e kanë ngulfatur politikanët si Kryeministri aktual i Shqipërisë, të cilët posa bëhen burrështetas, e humbin pushtetin mbi vetveten! Dhe si të tillë, çdokund rreth vetes, ata shohin individë me të meta fizike e mendore, me të cilët mund të tallen sa të duan, e kur të duan. Pra, si të tillë ata çdokund shohin kazanë ku kalben kundërshtarët e tyre politikë, si dhe tepsi me bakllava, që u takon vetëm atyre. Politikanët e tillë ia dolën që paturpësinë, papërgjegjësinë dhe krimin t’i ngrenë në ‘vlera’ politike, me çka debatin politik e zbritën në rrafshin e zënkave nëpër plazhet nudistike dhe nëpër bordelle.

Dhe, ndodh që politikanët e tillë të jenë zbavitës dhe ekzotik për perëndimorët, por fatkeqësi e madhe e popullit dhe vendin që drejtojnë, ngaqë kanë tipare të kundërta nga ato të qenit besnik: u lëpihen të huajve dhe e lehin dhe e kafshojnë të vetin!

Shqiptarisë nuk i mungojnë as burrështetas të llojit të Presidentit të sotëm të Kosovës, i cili shtetin e sheh si pronë të veten private. Dhe, duke e konsideruar vendin si pasuri të veten, ata besojnë se edhe kufijtë e tij ndërrohen si ato të livadheve që i ke trashëguar nga të parët e tu! Dhe ndërtojnë shtet të pabanueshëm për popullin, por parajsë për të afërmit e tyre. Nëpër ‘Shqipëritë’ tona ka shumë politikanë, të ngjashëm me drejtuesit e BDI-së, të cilët besojnë se posa e vë kravatën e politikanit, nga injorant bëhesh më i mençuri i botës!

Dhe politikanët e tillë jo vetëm që e marrin në qafë popullin, por duan ta arrijnë të pamundurën: t'u takojë edhe lavdia edhe hajnia! Thënë shkurt e shqip: ‘Shqipëritë‘ tona ende drejtohen dhe kontrollohen nga ‘mafia’ leniniste e enveriste, ato kanë përplot politikanë që duhet mjekuar e jo votuar, që janë fati i fqinjëve tanë dhe i të huajve, por fatkeqësia jonë! Andaj duhet që një ditë e më parë, atyre me ligj t’u ndalohet të merren me politikë!

Dhe, kjo duhet bërë edhe kur kjo nuk u pëlqen miqve tanë perëndimorë, të cilët kanë filluar të besojnë se shqiptaria është një kopsht i mbrojtur nga mjeranë të paaftë ta njohin dhe ta murojnë mirëqenien e vet.