Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

“Nuk është e kollajtë të bëhem kurban”, mesazhet e koduara të Saimir Tahirit para ‘dënimit’

Politiko 20 Shtator 2019, 11:34

Përgjatë dy viteve nën hetim, ish ministri i Brendshëm, Saimir Tahiri ka përbërë lajm në çdo dalje të tij për mediat, apo në sallat e gjyqit.

I akuzuar për tri vepra penale: Trafik i narkotikëve kryer në bashkëpunim në formën e grupit të strukturuarat kriminal; Pjesëmarrje në grup të strukturuar kriminal dhe Kryerja e veprës në grup të strukturuar kriminal’ u rrëzuan mbrëmë nga gjykata dhe e dënoi atë vetëm me akuzën ‘shpërdorim detyre’.

Tahiri me këtë vendim nuk bën asnjë ditë burg, por vetëm 3.4 vjet shërbim prove, edhe pse Prokuroria kërkoi 12 vjet burg referuar tri akuzave të mësipërme (8 vjet me gjykim të shkurtuar).

Mes emocionesh që nuk mundi t’i fshehë para medias, Tahiri deklaroi mbrëmë, fill pas procesit maratonë, ku trupës së gjykatësve iu deshën rreth 6 orë për të marrë vendimin final, se do të apelojë vendimin e dhënë për ‘shpërdorim detyre’.

Megjithatë, zhurma mbi dosjen ‘Tahiri’ është komentuar gjerë e gjatë edhe për mesazhet e koduara që ish ministri ka përcjellë përmes medias gjatë këtyre dy viteve. Mesazhe herë indirekte e herë të drejtpërdrejta për ish kolegët e tij në PS, kryesisht kryeministrit Edi Rama, ndërsa ky i fundit e cilësoi para se të nisë betejën me drejtësinë si ‘ministrin kampion të qeverisë’.

Në media, Tahiri është cilësuar shpesh herë edhe si ‘kurbani’ i Ramës për çeljen e negociatave, pas kushteve të ndërkombëtarëve për kapjen e ‘peshqve të mëdhenj’.

E me gjasë, Tahiri nuk e ka zbehur dozën e ‘sinjaleve’ për politikanët.

Cilat janë kodet më të diskutuara që nga tetori i 2017-ës, dita kur Prokuroria e Krimeve të Rënda kishte dorëzuar në Kuvend kërkesën për arrestimin e një prej emrave më të fuqishëm brenda radhëve të partisë së Edi Ramës.

“Nuk keni parë gjë akoma”, u shpreh Tahiri për gazetarët teksa citonte një nga frazat e Edi Ramës në fjalimin e tij të parë si kryeministër në 2013-ën.

“Nëse Qemali nuk e dinte nga i erdhi, unë e di nga e kam. Nuk ka shanse dhe nuk mendoj se do ta kem nga Edi Rama”, tha Tahiri në një emision të Arian Çanit, kur ky i fundit bëri një paralele me Qemal Stafën, i cili sipas tij “e hëngri nga Enveri”.

“Kush e ka marrë heshtjen time për dorëzim, është gabuar. As më mbron njeri dhe as dua të më mbrojë… Për mua ka vlerë e vërteta dhe nuk ka vlerë askush që nuk mund, ose mund të më pengojë në rrugën time për të bërë drejtësi, nuk e besoj që do ketë bir nëne dhe bir k**ve që do të më pengojë”, ishte kjo një nga deklaratat më të forta që Tahiri lëshoi në oborrin e parlamentit.

“Një herë shtyllë e krimit, një herë dru i shtrembër, vrasin natën e të qajnë ditën. Tani janë bërë të gjithë bashkë përballë meje, e pushka top t’u bëhet unë këtu jam e do ia dal”, tha ish ministri në maj 2018, kur la mandatin e deputetit.

“Kam diçka me rëndësi, që dua ta ndaj me ju dhe publikun, sepse besoj se e vërteta nuk rri dot fshehur sado të mundohet e sponsorizojë “dora e zezë” që fshehtas e filloi më mua e po vazhdon më shumë akoma tani e ndoshta më keq pastaj”, tha ai në nëntor 2018 në një dalje për gazetarët.

“Nuk është e kollajtë të jem unë kurban”, tha Tahiri në mars të 2018 për gazetarët pas seancës që zgjati mbi 8 orë në Gjykatën e Krimeve të Rënda, ku mori zyrtarisht statusin e “të akuzuarit” në çështjen “Habilaj”.

“Nëse unë kam harxhuar 20 milionë Euro për fushatë, siç pretendohet, Prokuroria duhet të kishte bërë hatanë dhe hetimi duhet të shkonte deri tek Rama. Ç’është kjo parti që harxhon 20 milionë euro në fushatë”,- tha Tahiri në seancën e para një jave, nisur nga një prej bisedave të përgjuara që pretendohet se implikon Tahirin, ku Habilaj flasin për “20 milionë euro” që kushëriri i tyre ministër ka përdorur në fushatën elektorale, një mesazh direkt për Edi Ramën.

Po ashtu, mesazhe përçoi edhe për zyrtarë të tjerë të PS si për ministren e Drejtësisë, Etilda Gjonaj, kur tha “Unë si ministër asnjëherë nuk kam shpenzuar për dhoma si ministrat e tjerë nga 1000 euro, por në faturat e tij shpenzimet janë nga 150”.

Direkt sulmoi edhe ish ministren e Mbrojtjes Mimi Kodheli për fikjen e radarëve.

Ndërkohë dje, edhe seanca e fundit e tij nuk kaloi pa kërcënime. Madje, me një foto të tij të printuar dhe të Ramës, ai theksoi se “Në krim as unë as Rama nuk jemi shefi i madh, në politikë Edi Rama është shefi i madh”.

Gjithashtu, dje ai sulmoi edhe pasardhësin e tij, Fatmir Xhafaj në sallën e gjyqit kur tha: Unë jam këtu si i pandehur vetëm për shitjen e një makine, ndërkohë ka njerëz që nuk mbajnë përgjegjësi as për vëllezërit trafikantë”.