Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Dita për të cilën Erion Veliaj është gati të bëjë gjithçka

Alfred Lela 14 Tetor 2020, 20:10

Dita për të cilën Erion Veliaj është gati të

Alfred Lela

Erion Veliaj, kryetari i Bashkisë së Tiranës do të jetë një prej tre eksponentëve të PS që do të koordinojnë fushatën në qarkun më të madh në Shqipëri, që nxjerr 34 deputetë në zgjedhjet parlamentare. Bashkë me Elisa Spiropalin dhe Ervin Bushatin, ata mund të jenë drejtues të lokomotivës së Tiranës që tërheq trenin e Shqipërisë për mazhorancën, ose mund te kthehen në poster të dështimit.

Zakonisht, në zgjedhje, si në shumë gjëra, si shkon Tirana ashtu shkon edhe Shqipëria. Suksesi ose dështimi në prill 2021 do të thotë shumë edhe për fatin e Veliajt, si në zgjedhjet e ardhshme lokale, ku ai do të kërkojë mandatin e tretë, por edhe pretendimet e tij për të marrë drejtimin e Partisë Socialiste, kur Rama të ketë ‘rënë’, apo të jetë tërhequr.

Duke qenë problem kredibiliteti dhe trashëgimie, Veliaj ka nevojën e kësaj beteje, por edhe drojën se mund t’i kthehet në të përpjetën e një lufte, së cilës ai mund t’i heqë shpenzimet, por nuk ia kontrollon dot të papriturat.

Ajo që e shtyn Ramën t’i japë drejtimin e Tiranës Veliajt ka të bëjë edhe me aksesin e pashoq mediatik të kryebashkiakut. Ai kontrollon mediat kryesore kombëtare duke arritur audiencën më të madhe në vend; Veliaj ka një dorë edhe në mediat e reja apo alternative, disa prej të cilave i kanë hapur njerëzit e tij, disa i sponsorizon dhe të tjerat i favorizon.

Nëse Rama është njeriu që merr publicitetin më të madh mediatik, Veaij është politikani që kontrollon dhe akseson drejtpërdrejt më shumë hapësirë mediatike. Interesat e pronarëve të mëdhenj e të vogjël janë të lidhur direkt me kryetarin e Bashkisë së Tiranës dhe ‘bankën e favoreve’ të tij.

Veliaj i shërben gjithashtu Ramës edhe për të vazhduar një kontrast të cilin nuk e mban më dot gjallë vetë. Si kilogramët ashtu dhe thinjat kanë vrapuar kundër fatit fiziologjik të kryeministrit dhe ai nuk ka më përballë ‘plakun’ Berisha, siç i pëlqente ta karakterizonte kundërshtarin e tij politik në fushatën e 2013, por Bashën më të ri se vetja dhe me flokë ku duket së ka rënë kënaja e përjetësisë.

Po të gjurmoni fjalorin e Veliajt do të dëgjoni nota të betejës së tij virtuale me Doktorin. Ky i fundit e quan ‘lal plehu’, por nuk është kjo që e angazhon kryebashkiakun kundër ish-kryeministrit. Ai kërkon të theksojë, për hatër të Ramës, se përballë jemi ‘ne të rinjtë’ dhe ‘ata të vjetrit’.

Edhe pse tingëllon absurd kur hap betejë me dikë që i ka varur dorezat e boksit politik, dhe me të cilin nuk ka garë, Veliaj nuk dorëzohet. Përveç targetimit të Berishës ai i bën diversion edhe Bashës duke mos e njohur si rival. Këtë të fundit para pak kohësh e pat sfiduar duke i kërkuar të kandidonte përballë tij në Tiranë për Bashkinë.

Ajo që dëshiron me të vërtetë Veliaj është që të përballet me Bashën, por në zgjedhje të përgjithshme, kur të dy të kërkojnë postin e kryeministrit. Për atë ditë Veliaj është gati të bëjë gjithçka.