Gallata’sarajet e ‘Pyetësorit Rama’

Alfred Lela

Edi Rama ia ka marrë dorën.

Ai e di se stema e qeverisë, riskicuar prej tij, dhe firma në fund, e hedhur si një gur që e lë dorën të fshihet, i huton dhe ngazëllen njerëzit. Ka shumë nga ata që e marrin në dorë atë copë kartë dhe thonë: Më ka shkruar kryeministri!

Por, vetëm kaq sa i takon flirtimit.

Kryeministri është arbitrar në gjithë pjesën tjetër. Arroganca duket qëkur, një term të shpikur prej tij, që e quan ‘fenomenin e njohur si KÇK’ e fut në një pyetësor kombëtar. Pa modesti, na thotë se është ai që e përkufizon fjalorin politik e social kombëtar.

Nëse kjo i mbetet stilit, ai në thelb është edhe më arrogant.

Po në pikën 10 ai propozon ‘pezullimin automatik të gjyqtarëve dhe prokurorëve, vendimmarrjet e të cilëve bien në kundërshtim me ligjin’. Shumë mirë. Po kush e bën përcaktimin e anti-ligjit? Kush e bën pezullimin? Duke qenë se pyetësori është i qeverisë, i bie të jetë Kryeministri. A nuk duhet të jenë pushtetet e ndarë nga njëri-tjetri? A nuk është kjo një nga plagët e drejtësisë, ndërhyrja e politikës?

Në pikën 2 ai propozon dyfishim të dënimeve për autorët përsëritës të krimeve të rënda. Logjika të thotë ‘stop!’: Po pse, autorët e krimeve të rënda nuk janë dënuar aq gjatë që në krimin e pare, sa duhet një krim i dytë? Nëse përgjigjia është drejtësia, atëherë shkojmë sërish te pika 10 dhe pezullimet e gjyqtarëve. Nëse drejtësinë nuk e kemi konsoliduar, atëherë ashpërsimi i ligjeve është nul. Ose është një përpjekje populiste për të fituar pikë politike.

Ka edhe më. Në pikën 11, njerëzit pyeten nëse ‘duhet të ndahemi apo jo nga Maqedonia e veriut’ në aplikimin për në BE. Duke harrura dy gjëra: se Maqedonia e veriut nuk kërkoi të ndahej kur ishim ne guri që e mbanin poshtë përgjatë dy viteve të shkuara dhe, më e rëndësishmja, kush po na pyet ne? Të kish qenë për dëshirën e shqiptarëve antarësimi në BE do të qe mbyllur në korrik ’90, kur u bë futja me forcë në Ambasada.

Në fund, sepse asnjë tortë kryeministrore nuk mund të lihet pa qershi, ka edhe një shënim. Ku thuhet gjithë etiketë demokratike, se të dhënat e grumbulluara nga ky pyetësor do të trajtohen në respektim të ligjit 9887. Atij për mbrojtjen e të dhënave peronale.

A thua të jetë i njëjti ligj që mbronte edhe kartat e identitetit, rrogat dhe adresat që u derdhën rrugëve të internetit për të gjithë shqiptarët, që e kanë sport kombëtar të diturit e pagës së tjetrit?