Hetimi apo arrestimi i Belës, për aq sa vlen…

Armand Maho

Është fakt se Belinda Balluku është aty ku është, si shkak i lidhjeve me krimin e organizuar të Tiranës, i cili me sa duket e mban peng Ramën me muhabetet apo pazaret e vjetra të narkotrafikut, të cilat datojnë që kur ai erdhi në krye të Ministrisë së Kulturës. Ndërhyrja e tij në luftën e bandave të Tiranës dhe nderet që i bënë asokohe eksponentë të ndryshëm, ka ardhur koha t’i lajë sot.

Është rasti tipik se si, një kryeministër i kapur mbahet peng, dhe promovon një përfaqësuese të bandave, apo mbetjeve të tyre, në rangjet më të larta të qeverisë duke i vënë në tavë buxhetin e shtetit dhe bashkë me të edhe taksat e atyre që këpusin rrashtin tërë ditën për të paguar haraçet që ndryshojnë nga muaji në muaj.

E parë në këtë prizëm, hetimi i nisur nga SPAK, që me shumë gjasë mund ta çojë pas hekurave njeriun më të përfolur për korrupsion të këtyre 34 viteve, duhet të ishte një lajm i mirë.

E megjithatë kjo nuk vlen për ne!

Në rast se ikën Balluku, Rama patjetër do ta zëvendësojë me një gur tjetër shahu, nga ato që ai i mban në xhep dhe i teston, jo për besnikërinë, por për kamikazërinë e tyre. Pra, me pak fjalë, arrestimi i Belinda Ballukut nuk do të ndryshojë asgjë.

Fundja çfarë ndryshoi se u fut Ahmetaj në hetim, për të cilin u ngritën jo më pak akuza se për Belën? Po arrestimi i Veliajt çfarë solli? Po ai i Beqes, i Kokës, Tahirit, e më the të thashë... Asgjë!

Kjo ndodh sepse, siç e thamë më lart, ata janë vetëm gurët e shahut, që e shumta mund të përplasen mes veti, por në asnjë rast hetimet nuk shkojnë tek ai që i lëviz dhe harton strategjinë e fushës.

Edi Rama e ka bërë zakon tashmë të sillet sikur nuk di gjë, s’ka parë gjë dhe s’ka ditur se çfarë ka firmosur. Por, sado që ai të fshihet pas paditurisë, s’mund të thotë që nuk e dinte për trafikun e drogës që bënte Saimir Tahiri, për aferat e Ben Ahmetajt, Lefter Kokës apo Erion Veliajt. Ashtu siç s’mund të kalojë pa u vënë re se ne vazhdojmë të paguajmë çdo ditë për energji që nuk e marrim nga anijet e Bangladeshit, “peshqesh” nga Juri Kim, apo për PPP-të, koncesionin e Llogarasë, tenderat e Shëndetësisë e kështu me radhë.

Delegimi i firmës te Balluku, Ahmetaj, Erion Braçe e me radhë, nuk e përjashton nga përgjegjësia, jo vetëm politike e morale, por edhe penale.

Një shef shërbimesh sekrete, i një prej ambasadave të një vendi me rëndësi në BE, po e artikulon gjithnjë e më dendur nëpër tryezat politike dhe mediatike, se Rama nuk e ka të gjatë pas Ballukut. Pra, mos të jetë si ato raportet e ODHIR që evidentojnë pabarazi në zgjedhje, shkrirjen e partisë me shtetin për të manipuluar votën, presionin e bandave ndaj votuesve, përdorimin e parave të drogës, dhe në fund nuk jepet asnjë zgjidhje.

Jo.

Rama nuk ka asgjë më pak se Lukashenko i Bjellorusisë apo Maduro i Venezuelës. Ai thjesht po përdor arritjen historike të anëtarësimit në NATO për të konsoliduar pushtetin e tij, për të pastruar paratë, për të vjedhur qytetarët, për të shembur sistemin demokratik, për të shpopulluar vendin dhe për të shpërbërë opozitën.

Paraja nuk njeh ngjyrë. Në këtë vend është i lirë t’i pastrojë edhe narkotrafikanti, edhe terroristi, edhe mashtruesi. Mjaft që SPAK të hapë regjistrat e QKB-së dhe aty do të shohë lidhjet direkte apo indirekte të atyre që s’kanë lënë resurs të këtij vendi në këmbë, me organizatat kriminale.

Parë në këtë prizëm, hetimi apo arrestimi i Ballukut është një lajm i mirë, por për aq sa vlen. Sepse askush të mos shpresojë se, për sa kohë ky hetim nuk shkon deri te Rama, do ndryshojë diçka, dhe këtë ta kenë të qartë edhe SHBA e BE që e kanë lënë të livadhisë. Ta kenë të qartë se Rama e ka kthyer këtë vend në një “hale” të qelbur, jo për të mbrojtur interesat e tyre, por ato të krimit. Shqipërisë ai tashmë ia ka bërë dëmin e madh, po kur të shohin se çfarë u ka bërë dhe atyre, do të jetë shumë vonë.