'Lista Trump' nuk gënjen

Alfred Lela

Përtej nevojave bazike si marrja e një vize, udhëtimi te të afërmit, bashkimi familjar, dëshira për punësim në Shtetet e Bashkuara, e me radhë, vendimi i Administratës Trump për të futur Shqipërinë në ‘listën e zezë’ me 175 vende, pret më thellë se aq.

Në këtë listë të refuzuarish, nëse e tejkalon kompleksin etnik, nëse e shmang prirjen për ta përdorur faktin si shigjetë për “qeverinë Rama” dhe, më tej ende, nuk kreshpërohesh me amerikanët që, gjithmonë shohin interesin e vet, gjen lajm diku tjetër.

Në atë listë vendesh të mjera, për të përdorur një shprehje të vjetër te Trump ‘the asshole of the world’, Shqipëria takohet me statusin e vet. Me faktin e ftohtë se, cili është indeksi i saj global, sa e ka temperaturën e trupit gjeopolitik, sa i vlen lëkura në negociatat e mëdha, a i peshon bishti më shumë se sqepari, apo ka një kokë të mbushur me ajër patetizmi që rrotullohet në gjithësi dhe përfundon në vrimën e zezë të hiçmosgjësë, mu si ata satelitët ‘Albania 1’ dhe ‘Albania 2’, që Edi Rama na i hodhi para si lepurin e kapelën e një kurthi, siç bën prej 2 dekadash, ngaqë, fale Zot, aq di të bëjë!

Kjo listë na dëshmon se cila është Shqipëria. Ndajeni si të doni, se kush e ka fajin: qeveria, populli apo e shkreta opozitë, e cila, si prej qeverisë, si prej një pjese të popullit fajësohet kur gjërat nuk shkojnë në Shqipëri, mu siç paraardhësit ideologjikë dhe shpirtërorë të kësaj qeverie, por edhe përdhunuesit e po këtij populli, bënin për 45 vjet. Me kë tjetër, herë me Zogun, herë me klasat e përmbysura, herë me armikun e jashtëm (mos harroni në krye të këtyre të jashtmëve ishte Amerika!).

Kjo listë e hedh në erë pretendimin se ne jemi në Europë, po futemi në BE, do të futemi në BE, herë në 2027 e herë në 2030, datë që ndryshon sipas haluçinancioneve të Ramës me shpurë. Ja ku po ua listoj vendet në Europë dhe Eurorazi që kjo listë përmban: Shqipëri, Armeni, Azerbajxhan, Bjellorusi, Bosnje dhe Hercegovinë, Gjeorgji, Kazakistan, Kosovë, Moldavi, Mal i Zi, Maqedoni e Veriut, Rusi, Uzbekistan. Këto janë vendet gjeografiksht europiane apo kufieuropiane, me një këmbë në Azi dhe tjetrën në prag të Europës. Nuk janë aty as armiqtë tanë, herë imagjinarë e herë realë, grekët e serbët. Për të mos folur për vendet me origjinë të kontrolluar europiane, si Italia e me radhë.

Pra, ne, në gjeografinë euroaziatike të hartës së përjashtimeve amerikane jemi me kinse apo modemek europianët.

Ky është një shpjegim kontekstual dhe faktual i përrallës me Europë që na tregon Rama, ashtu edhe zyrtarët hermafroditë të BE, të cilët busullhumbur, pluskojnë mes Amerikës, Kinës, Rusisë dhe asgjësë, dhe ankorojnë në Shqipëri gjithë këtë pasiguri, duke e bërë edhe më të pasigurt horizontin e një vendi që nuk ka pikë tjetër ‘mjalti’ përveç euroatlantizimit.

Kjo listë dekonspiron edhe rrenën me bisht, jo vetëm të qeverisjes së mirë, të standardeve e blablablave astronomike që Rama, shërbërorët dhe aleatët e tij, na e thonë përditë nga stomet televizive. Por më shumë se kaq, ul në tokë balonën e shtyrë nga ‘retë në pantallona’ të një iluzioni të vjetër riprodhuar ajrit mediatik sipas të cilit ER është brand ndërkombëtar.

Vendimi i Adminsitratës Trump për ta futur Shqipërinë në një listë turpi dëshmon të kundërtën. Rama dhe qeveria e tij nuk kanë fuqi negociuese, nuk gëzojnë respekt në Uashington, nuk kanë akses në war room-in e vendimeve. Nëse e kundërta do të ishte e vërtetë, vendimi amerikan nuk do të ishte i tillë dhe Shqipëria nuk do të klasifikohej si një vend apandesit, si një jovend, si një bezdi migratore.

Lista amerikane është dëmi më i madh në marrdhëniet publike që i është bërë Shqipërisë në 2 dekadat e fundit. Shqipëria drejtohet nga dikush që bredh poshtë e lart si Robert Çamçakëzi, dikur ia mvishte të ndjerit Fatos Nano, duke i pandehur marrdhëniet ndërkombëtare batuta, atlete, poza dhe një rrotë korrupsioni që duhet vajisur.

12 vite nga kjo sjellje, siç po e shihni, nuk kanë prodhuar progres, por të kundërtën.

Shqipëria është, edhe njëherë, në listën e vendeve që nuk i duhen gjë as dreqit. The ‘asshole of the world’ për të riperifrazuar Presidentin Trump.