Nuk është naftë, por mut… për të shpëlarë inceneratorët

Redaksionale/ Politiko

Qeveria Rama, me sa duket, është në fund të mjeteve dhe gjetjeve të komunikimit publik. Një syth i ri që i çeli kaktusit të madh të skandalit të inceneratorëve, e ka detyruar kryeministrin, që nga Amsterdami, të njoftojë se, kompania SHELL së shpejti do të shpallë “një zbulim shumë të rëndësishëm për vendin tonë”.

Lajmi është serioz dhe do të gëzonte gjithë shqiptarët, sidomos në kohë të tilla, kur nafta këtu kushton më shumë se në Hollandë. Por, si i thonë shprehjes, nëse tingëllon shumë e bukur për të qenë e vërtetë, nuk është e vërtetë.

Deklarata, siç bënë me dije raportimet mediatike, është rimarrja e një shpalljeje të mëhershme të kryministrit Rama, me po të njëjtën tematikë, naftën, dhe duke përdorur po kompaninë SHELL.

Në postimin e para tre viteve, z. Rama thoshte se, nga viti 2020 do ia shihnim hajrin pellgut naftëmbajtës misterioz të SHELL. Kanë kaluar dy vite që atëherë dhe, i vetmi ndryshim në fushën e naftës është rritja e çmimit me 70-80 lekë për litër.

A janë vonuar, siç edhe mund të ishte, kërkim/zbulimet e SHELL-it, apo ka një arsye tjetër për këtë rimarrje të ‘lajmit të mirë’ të kryeministrit?

Është e dyta. Shefi i qeverisë kaloi në cruise control pasi u duk se e sfumoi tajfunin e parë të skandalit të inceneratorëve. Me një kërcënim të fortë për SPAK-un, ai u duk se bëri kontrollin e dëmit të mundshëm.

Nuk duket se shkoi sipas parashikimeve. Një konferencë për shtyp e kryetares së LSI, Monika Kryemadhi, i dha një kthesë të re të fortë çështjes së inceneratorëve. Partia Demokratike kërkoi sot dorëheqjen e kryeministrit.  

Opozita, në partneritet me segmente të shoqërisë civile, të grumbulluar nën siglën e Frontit të Shpëtimit Kombëtar, kanë thirrur të enjten më 7 korrik një protestë kombëtare me sloganin “Shqipëria në rrezik”.

Kjo e ka shqetësuar Ramën, i cili nga Hollanda riktheu lajmin e vjetër të naftës misterioze mbi të cilën hodhi guaskën emblematike të multinacionales SHELL.

Nuk është sprova e parë e kryeministrit në gënjeshtra të veshura trashë. Para katër vitesh shpalli se Shqipëria kishte çelur negociatat e antarësimit në BE. Para pak ditësh u zu me gjysmën e Europës pikërisht për ate se nuk ia çelën negociatat këtë vit.

Kryeministri është në hall dhe shtrëngesa e bën që të dalë nëpër Europë, si Enver Hoxha dikur me barsolinë - të cilën e hidhte djerrinave të Mallakastrës- me kumtin e një gjysmëzoti: këtu ka naftë!

Nuk ka, në fakt. Është thjeshtë një vrimë e re, hapur në barkun obez të babëzisë qeveritare e cila, si të gjitha glutonitë, nuk nxjerr lëng tjetër, veç mutit.