Qilari

Armand Maho

Kur Arben Ahmetaj deklaroi se Edi Rama pinte verë 33 mijë euro me Ergys Agasin në ‘kopshtin e Edenit’ që ka ngritur në Kryeministri, e prita me një fije mosbesimi. Jo se besoj te Rama, jo se besoj që atë e vret ndërgjegjja për barazinë sociale apo për varfërinë që ka ky vend.

Thjesht, sepse mendoja që Ahmetaj mund ta kishte fryrë pak faturën, ose se Rama apo Agasi nuk ishin në atë nivel aristokratik njerëzish sa të vlerësonin një verë të tillë, e cila në vendin tonë kushton sa një garsoniere në periferi të Tiranës, për të cilën një njeriu mesatar do t’i duhej të punonte ndonjë 15 vjet për ta paguar.

Por zhvillimet e fundit treguan se Ahmetaj kishte të drejtë. Rama dhe Agasi, një shumë të tillë e kishin vetëm disa rrufitje, përgjatë kohës kur bisedonin se si të zhvasnin miliona nga paratw e të gjithëve ne.

Qilari në bodrumin e Agasit ishte dëshmia më e fortë për këtë, ndërsa vjedhja që u lejua me qëllim nga Policia tregon qartazi se Rama, për ato taksa që është ngarkuar të administrojë, ka shumë herë më pak respekt sesa për shishet e verës të stivuara aty.

Personalisht s’kam pasur asnjëherë dyshim se Rama dhe të tijtë nuk ngihen së vjedhuri, por ky episod, në një shoqëri me integritet, do të mjaftonte që të mos pritej e hëna për t’i shkulur këta banditë nga zyrat.

Edi Rama, ndërkohë që BKH kërkonte më kot shishet e verës dhe pamjet e serverëve, kishte pacipësinë të dilte në atë llomotitjen e tij javore për të na lajmëruar se nuk do ta lëshonte Ballukun, pronaren e 300 apartamenteve dhe anëtaren e kësaj bande hajdute dhe antishqiptare. Më pas, në atë spektakël bajat, do t’ia jepte fjalën një çupëline, e cila rrekej të na tregonte pse kishte vendosur të mos largohej nga parajsa që na ka servirur njeriu përballë saj, i cili edhe thinjat që e kanë mbuluar i ka të zhytura në turp.

Ky vend ka mbaruar. Për t’u ringritur kërkon qilizëm nga i pari tek i fundit kusar dhe trafikant që na ka mbirë në derë. Prandaj Edi Rama duhet shkulur nga ai post sa më parë; do të ishte një nder që do t’ia bënim vetes, por edhe brezave. Në një vend ku banditët marrin peng njëri-tjetrin dhe pengmarrësit janë miqtë që pinë mijëra euro verë me Kryeministrin, vetëm hajër nuk mund të kesh.

Sepse për krijimin e këtij modeli vjedhës jemi fajtorë të gjithë. Edhe ata që duartrokasin zullumet e tij, edhe ata që presin që luftën ta bëjnë të tjerët, por edhe kundërshtarët, të cilët duhet të ishin më dinjitozë në betejën e tyre, me akte e jo me fjalë.

Sot, në vitin 2025, ne nuk kemi më qeveri.

Jemi një popull i vjedhur, që bëjmë spektatorin teksa Rama mundohet të denigrojë ata pak prokurorë e gjyqtarë me ndërgjegje qytetare që po dënojnë hajdutët e tij. Në fakt, duhej të ishte e kundërta. Sot kjo kastë hajdutësh, që na tregon muskujt me mandatin e Zegjinesë së Roskovecit, Milës së Suelit apo Taulantit të “Toyota Yaris”, nuk duhej lënë të shkonin në Parlament.

Rama duhej sikterisur në përrenjtë e Surrelit, ndërsa imazhi i tyre duhej të vizatohej në tablonë e turpit, për t’ua treguar fëmijëve se si nuk duhet të jenë. Kjo është detyra e një populli. Por ne vazhdojmë të sillemi sikur s’ka ndodhur asgjë, duke pasur mendjen te ahengu qeveritar, ndërkohë që ende nuk po shohim xhenazenë që na ka zënë derën.

Prandaj Rama pi verë 33 mijë euro me paratë e pensioneve dhe prandaj Belinda livadhis me pronat e shqiptarëve. Ndërsa shoqëria është e zënë me dilemën ekzistenciale të saj: “Kë do zgjedhim?”. Njësoj si atëherë kur vdiq diktatori.