Rama ia la Zotit, por e mori në dorë Trump

Alfred Lela

Atë që Edi Rama ‘ia la Zotit’, me sa duket e kanë marrë në dorë administrata Trump. Luftar Hysa dhe vëllezërit e tij janë shpallur ‘si të padëshiruar’ në një listë të zezë të Departamentit të Thesarit, duke shenjuar lidhjet e tyre, si pastrues parash të kartelit Sinaloa.

Është kjo pistë që pati hedhur Sali Berisha dhe opozita para 3 vitesh, pas botimit të disa artikujve në gazetat meksikane dhe kanadeze, ku Luftar Hysa ushtronte aktivitetin, dhe kur ky i fundit u kap në një foto duke dalë nga zyra e Kryeministrit Rama në shoqërinë e një deputeti gjerman dhe Dorian Duçkës.

Rama në fillim e mohoi takimin dhe iu kundërvu medias, si zakonisht, duke i qortuar gazetarët se marrin në qafë njerëz të pafajshëm, fëmijë, familjarë etj.

Luftar Hysa në një dalje në emisionin Opinion e pranoi takimin me Ramën, sipas tij si ndërmjetës për ‘një mikun e tij skocez që donte të shkruante një lirër për Shqipërinë.

Kohë më vonë, i cytur nga gazetari i RAI3, Kryeministri dha një variant të ndryshëm, duke pranuar edhe se e kishte takuar Hysën, duke kundërshtuar kështu veten. Rama tha se Hysa kishte ardhur për të kërkuar leje për një kazino në Vlorë për një mikun e vet që kishte një hotel atje.

Çështja u harrua, derikur dje, papritur, një shpallje e administratës amerikane njoftonte se Luftar Hysa, bashkë me disa familjarë, ishin futur në listen e zezë të terrorizmit, ku Presidenti Trump ka klasifikuar kartelet e drogës, si lehtësues të kartelit të Sinaloas. Ishte i njëjti pretendim i medias meksikane, kanadeze dhe opozitës në Tiranë, i hedhur poshtë me përçmim nga Rama kohë më parë.

Luhatjet e kryeministrit në raport me bashkëpunëtorë e tij, në kërkim të një këndi të përshtatshëm për të futur kokën e vet, janë të stërnjohura, që nga Elvis Roshi e Agim Kajmaku e deri te Erion Veliaj e Charles McGonigal. Ndryshon në këtë rast teza e Partisë Demokratike e certifikuar nga administrata Trump. Jo thjesht pretendimi se ka një lidhje mes Ramës dhe Hysës, që shkon përtej një takimi ‘të pafajshëm’ për libra me skocezë apo ‘hatri i një miku gjerman’, por se selia e qeverisë, kabineti, politikat qeveritare janë facilitues (lehtësues) të individëve, grupeve dhe një filozofie që lidhen me një nënbotë të errët të krimit të organizuar ndërkombëtar.

Thënë ndryshe, qeveria Rama u ka dhënë leje dhe hapësirë grupeve dhe individëve ndërkombëtarë të lidhur me elementë shqiptarë të botës së krimit, në ekonominë e vendit dhe rrjedhimisht, nëpërmjet fuqisë financiare, edhe në politikë.

Pretendimi i disa artikujve në mediat kanadeze ishte pikërisht ai që vërteton përcaktimi i administratës amerikane. Luftar Hysa dhe bashkëpunëtorët e tij përdornin kazinotë në territoret indigjene në Quebec për të pastruar paratë e karteleve meksikane. Për arsye që nuk kuptohen, ndoshta nga trysnia e gazetarit të RAI, Giorgio Mottola, ndoshta nga arroganca e atij që e ndjen veten të përjetshëm, Rama u tregua strategjikisht më naiv se Luftar Hysa në intervistën e tij. Duke pranuar se Hysa i kishte ardhur si ndërmjetës për një kazino në Vlorë, ai lejoi bashkimin e fijeve që bënin një lidhje direkte, më parë të pretenduar, se edhe në Shqipëri, janë këto aktivitete tregtare nëpërmjet të cilave Hysa ‘zbardh’ paratë e drogës së karteleve.

Normalisht nuk mjafton kaq për të thënë, dhe vërtetuar tezën e opozitës se Shqipëria është narkoshtet, duke qenë se me këtë logjikë duhet klasifikuar edhe Kanadaja si i tillë, meqenëse të njëjtin aktivitet Hysa e ushtronte në të dy vendet.

Ka një ndryshim rrënjësor ama mes Kanadasë dhe Shqipërisë. Në të parën, Hysa vepron në kundërshtim me ligjin, i gjurmuar nga institucionet dhe nga media. Këtu te ne, dhe ky është ndryshimi thelbësor, aksesi i tij arrin në zyrën më të lartë të vendit, e Kryeministrit. Kjo është çka e bën Shqipërinë (fatkeqësisht!) një narko-shtet. Jo sepse këtu tregtohet drogë me pakicë dhe shumicë, sepse kjo ndodh në çdo vend të botës, përjashto Korenë e Veriut, por se këtu licensat, lejet dhe aksesi rrjedhin nga një linjë qeveritare që përfundon me Kryeministrin e vendit.