VideoEditorial nga Alfred Lela/ “Fajin e ka Saliu”, edhe për ligjin 7501…të Ramiz Alisë

Si qarkullon e pakontestuar një gënjeshtër e vjetër që merr lustër të re, sa herë ka një krim apo skandal në Shqipëri që lidhet me pronat. Një ligj i miratuar që në vitin 1991, kur në pushtet ishte ende Partia e Punës, i faturohet prej 30 vitesh Sali Berishës dhe forcës që ai përfaqëson, Partisë Demokratike. Kështu ndodhi edhe kësaj here pas vrasjes së gjyqtarit Kalaja, që u flijua mbi një çështje pronësie mes dy palëve në konflikt në qytetin e Shkodrës.

Në fund të dokumentit të atij ligji qëndron firma e Ramiz Alisë, dhe që prej atëherë e njëjta gënjeshtër firmoset çdo ditë nga pasardhësit e tij në politikë dhe në media.

 

Ministri i Drejtësisë ia hodhi opozitës fajin për vrasjen e gjyqtarit Astrit Kalaja.

Turpin dhe përgjegjësinë e vrasjes në sallën e gjyqit të një gjykatësi, të cilin duhet ta mbante ministria e Brendshme dhe e Drejtësisë, institucionet me lidhje direkte në sektor, Lamallari, siç bën përherë qeveria ku bën pjesë, e gjeti shpëtimin te “fajin e ka Saliu”.

Nuk janë vetëm “pionierët e Edit” që e gjëjnë fajin te Doktori, por edhe “veteranët e Arlindit”.

Edhe zonja ne protestën për statusin e minatorit mbahet fort te “fajin e ka Saliu”. Për ligjin 7501 kësaj here.

E pavërtetë edhe kjo.

Ligji është miratuar nga Ramiz Alia më 19 korrik 1991, siç do ta shihni në dokumentin bashkangjitur, ku është edhe firma e ish-presidentit edhe data, nr dhe titull i ligjit në fjalë.

Ministrit i kuptohen emocionet e rishtarit, dhe zonjës në moshë i kuptohet nostalgjia për kolektivizimin dhe pronën e përbashkët socilaiste.

Por, fakti është se përgjegjës për vrasjet nuk mund të mbahet partia që është në opozitë, dhe aq më pak për ligjin e pronave të vitit 1991. Për faktin e thjeshtë se, si sot, si atëherë, ka qenë në pushtet partia e tyre, sot Socialiste, atëherë e Punës. 

Në fakt, ligji 7501, që shpesh citohet si burim i të gjitha këqijave, nuk ka të bëjë me pronat ‘luksoze’ për të cilat luftohet sot, dhe u jepen falas inevestitorëve strategjikë nga shefi, që aq shumë e emocionon Lamallarin.

Ky ligj parashikonte shpërnadarjen e tokës bujqësore, jo tokave në bregdet, jo atyre në qytete. Pra, as ligji që ia faturojnë Berishës nuk e ka në fakt fajin për vrasjet dhe mosmarrëveshjet për pronat.