Kur regjimi sundon me anë te ligjit!

Nga Irena Beqiraj

Nje debat interesant është xhvilluar pak kohë me parë mbi faktin a kemi një diktaturë liberale në Shqipëri ?!
Une do ta quaja, "diktaturë të Heshtur" .

Në diktaturat e heshtura nuk ka luftë, as grusht shteti ,as revolucion. Ka zgjedhje, ka parti, ka gjykata, ka media, për cfarëdo ndodh në përditshmërinë e nje kombi ka debat në media e rrjete sociale , ka edhe mendime ndryshe .

Asgjë nuk duket e gabuar apo jo normale në sipërfaqe. Ama nën sipërfaqen që duket tërësisht normale, diktatura në emër të sundimit të ligjit, instalon sundimin me ligj . Nëpërmjet kësaj strategjie, regjimi konsolidon pushtetin e tij edhe pretendon para zgjedhësve dhe vëzhguesve ndërkombëtarë se ndryshimet ligjore u janë nënshtruar proceseve të duhura te konsultimit edhe transparencës.

A kemi kërkuar gjithmonë sundimin e ligjit ? Atëherë ligji po përdoret për për e na sunduar!
Fuqia për të përqendruar burimet, si përdorimi i tokës apo të drejtave të tjera në pak duar, bëhet me ligj . Me ligjet e investimeve strategjike , qerave 1 euro, apo ligjet me emra te veçantë U vra liria e tregut edhe konkurenca edhe në vend të lirë u formëzohua oligarkia civile.

Pra,ekonominë që kemi sot ku nga një anë një grusht investitorësh strategjikë ofrojnë resortet , universitetet , shërbimin financiar , tregetinë hidrokarbure transportin ndërkombëtar kullat e larta edhe nga ana tjetër qindra mijëra dyqanxhinj që ofrojnë shërbime me produktivitet të ulët te cilet për sigurimin e jetesës shkelin ligjin duke zënë me tavolina e tenda hapësirat publike.

Po me ligje preferenciale edhe mbi favoret ekonomike të marra nga pushteti lulëzuan mediat e lira, të cilat të zëna ngushtë ne grackën ekonomike të pushtetit bëhen pa turp pro regjimit.

Pra me ligj ngushtohet hapësirat e lirisë së fjalës edhe lirisë ekonomike në atë mënyrë që grupet pro-qeveritare ose ato me synime të lidhura me qeverinë janë të vetmet që mund të lulëzojnë.
Me ligj taksohet më shumë shtresa e mesme , edhe po në emër te ligjit lirohen trotuaret nga tavolinat e bizneseve te vogla , edhe po me ligj na mbahet fryma nga betoni.

E pra me ligj është vendosur te ketë pak ose aspak liri për të njerëzit te cilët detyrohen të braktisin vendin .
E fatkeqësisht as BE-ja, e cila na serviret si testi I fundit I sundimit të ligjit edhe demokracisë nuk është imune nga pandemia e sundimit me anë të ligjit .

Pikërisht mu brenda BE-se ndodhen përkatësisht Polonia edhe Hungaria te cilat listohen ne diktaturat me te heshtura në botë. Pa një sy të kujdesshëm, sundimi me anë të ligjit duket si demokraci , por është pikërisht loja me ligjin e cila konsolidon ne mënyrë të plotë regjimin edhe pasi regjimi konsolidohet ateherë është shumë e vështirë për t'u thyer, aq më pak me zgjedhje.

Diktaturë liberale apo e heshtur pak rëndësi ka emri! Pyetja qe shtrohet është : A është përshembull edhe kodi i ri penal një rast tjetër si ligji kufizon lirinë e fjalës, lirinë zotërimin te pronës ne mënyrë qe regjimi të konsolidojë sundimin tij?!

Nese përgjigja per shume nga ne eshte PO! fatkeqësisht as BE e as opozita nuk janë siguresa të mjaftueshme për mosistalimin përfundimtar te regjimit.

Në këto kushte a do ta,quajmë Diktaturë liberale apo e heshtur pak rëndësi ka !
Nëse me ligj ne privohemi nga liria, edhe nuk kujdesemi qe kjo te mos ndodhe, thjesht nuk e meritojmë lirinë !