Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Paja e Gazit

Politiko 29 Korrik 2018, 21:41

Gent Gaba

Miratimi nga ana e mazhorancës, me 75 vota pro i ligjit për shembjen e Teatrit Kombëtar dhe tjetërsimin e pronës publike nga njëra anë, sidhe mosdekretimi i ligjit nga ana e Presidentit të Republikë nga ana tjetër, mbyllën fazën e parë të kësaj përballjeje me një barazim. Në sport, si për shembull në futboll, barazimet vlejnë një pikë, ndërsa në politikë asnjë. Do të jetë muaji shtator ai në të cilin do të njihemi me fatin përfundimtar të Teatrit. Ndërsa numërimi mbrapsht në kalimin e të “dyzetave” që do të rindezin çështjen ka filluar, po ashtu kanë nisur të dalin në pah fakte të reja mbi natyrën e angazhimit të dy nga aktorëve që dolën në favor të shembjes së Teatrit.

I pari është Robert Ndrenika. Aktori i mirënjohur, pas piruetës me të cilën mohoi veten, kolegët dhe historinë e godinës, u kundërpërgjigj nëpërmjet një reagimi në Fejsbuk ndaj deklaratave të kreut të Partisë Demokratike, Lulzim Basha. Ndrenika, në një regjistër tejet politik, midis të tjerash pohonte së kishte marrë “besën e shqiptarit” se Teatri i ri do të bëhet duke mos cenuar asnjë centimetër katror nga territori aktual. Nëse kjo deklaratë ka ngushëlluar fansat e aktorit, dhe fansat e shkeljes së Kushtetuës, ajo ka krijuar një farë angështie te të gjithë ata që, në këtë histori e panë “besën e shqiptarit” të prerë nga vetë Ndrenika i cili, vetëm një muaj më pare, lëshonte romuze kundër qeverisë në mbrojtje të Teatrit. Për të mos përmendur pasandaj se “besën” aktori e ka marrë nga një politikan që në vitin 2015 premtoi, përballë gjithë shqiptarëve, “zero ndërtime në Tiranë”, për t’u shndërruar më vonë në një “betonizator” të pamëshirshëm të Kryeqytetit.

Nëse Ndrenika u mjaftua me “besën e shqiptarit” për të kaluar ylberin; aktori i dytë, Gazmend Paja, duket se nga kjo histori pretendon të nxjerrë diçka më shumë. Sikurse raportoi Politiko.al ditën e djeshme, Paja është shumë pranë një metamorfoze, e cila e shndërron atë nga artist në “investitor strategjik” në brigjet e kristalta të Jugut të Shqipërisë. Duke përfituar nga afria e tij me mazhorancën në qeverinë qëndrore dhe vendore, aktori po kryen një shërbim mjaft të rëndësishëm në çështjen e Teatrit, në këmbim të të cilit i lipset një firmë që vlen jo pak, por miliona euro.

Sigurisht, pozicionet e Ndrenikës dhe Pajës janë krejt të ndryshme në këtë rast, sikurse është e tillë diferenca midis gënjeshtarit dhe të gënjyerit. Megjithatë “paja” që Gazmendi pret të marrë nga krushqia me mazhorancën duhet të shërbejë si leksion për ata që në këmbim presin “besën e shqiptarit”. E cila, si më sipër, duket sërisht e vobektë nëse kuptojmë se qëndrimi i Presidentit të Republikës, me nëntë urdhëresat juridike, ndanë në mënyrë të qartë se cila nga dy palët, pro dhe kundër prishjes, është në krahun e duhur të ligjit themelor të shqiptarëve, pra Kushtetutës. Për më tepër që konfliktet e interest, tashmë aspak të fshehta, apo naiviteti i shtirur përballë makutërisë së kolegëve grabitqarë, tregojnë se ata se s’janë duke shitur vetëm Teatrin, sepse ai nuk i përket aktorëve, por nderin e tyre.

Ndoshta mund të duket pak, përballë një “investimi strategjik”, por disa nuk kanë gjë tjetër veçse atë.