Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Parti e re, inat i vjetër

Politiko 23 Prill 2019, 18:55

Namir Lapardhaja

Një ndër sëmundjet e pashërueshme të politikës shqiptare është krijimi i partive të reja në zgjedhjet e radhës. Parë në këtë këndvështrim, sa herë që ka pasur zgjedhje, aq herë kemi pasur edhe krijim të formacioneve të reja politike. Jo gjithmonë nga një, ngase ka pasur raste nga dy ose më tepër. Në kushte të tjera, krijimi i një partie politike, me politikanë të rinj, të paprovuar më parë në asnjë nivel poltik dhe administrativ, me një të kaluar të vyer akademike, profesionale ose diçka e ngjashme, me diferencë të thellë morale nga klasa aktuale politike, do të ishte mëse e mirëpritur, mirëpo nuk kemi as rastin, as njerëzit, as dallueshmërinë, as situatën e tillë.

Madje, s’kemi asgjë nga këto. Kemi krijimin e një partie të re, e cila mishëron konceptualisht dhe vizualisht të gjithë problematikën e vjetër të politikbërjes në këtë vendin tonë halleshumë dhe inatmadh. Meqenëse jemi tek inati, një tjetër karakteristikë e të gjithë partive të reja politike (përfshi edhe këtë të radhës) është se ato kanë lindur si pasojë e inateve dhe fateve personale. Si të tilla ato kanë qenë të destinuara ta prekin fundin ende pa nisur. Shto këtu situatën e rënduar dhe të ndezur politike, ku njerëzit shpresojnë një zgjidhje dhe dalje nga ngërçi e nuk janë të interesuar për fatet personale të politikanëve të vjetër me parti të reja. Pavarësisht sa më sipër, lëvizjet e reja në këto vite kanë treguar se nuk kanë sjellë asgjë të re.

Elektorati shqiptar është i prirur t’i qëndrojë stoik e besnik partive kryesore dhe historike. Aq më shumë në situatën aktuale ku kemi një pakënaqësi të madhe ndaj mazhorancës qeverisëse dhe kemi përditë e më shumë njerëz që shohin opozitën si mundësi për të ndryshuar diçka, për të realizuar rotacionin politik dhe për të dënuar qeverisjen aktuale. Shqiptarët zakonisht kanë dënuar me votë qeversijen se sa kanë besuar tek ai që do të vijë në pushtet. Gjasat janë që edhe këtë radhë kështu të ndodhë. Po ashtu, ajo pjesë e elektoratit gri, që është target i të gjithë partive që synojnë qeverisjen, janë të lodhur aq shumë nga politika dhe nuk kanë besim se ndonjë individ apo parti do të bëjë ndryshe nga të tjerët, gjë që çon përherë e më pak njerëz për të votuar kur ka zgjedhje.

Dhe, qershia mbi tortë, ndryshimet kushtetuese të vitit 2008 nuk i japin asnjë mundësi partive të reja ose individëve që duan të kenë përfaqësim në zgjedhje. Në këtë kuptim, nëse nuk sjell asgjë të re, nëse je produkt jo cilësor i politikës së vjetër, nëse nuk ke alternativ dhe motiv të qenësishëm për t’u besuar, nëse nuk bind elektoratin gri dhe, nëse mishëron më së miri të gjithë avazet e vjetra, përse të duhet një parti e re?