Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

PD kundër kalimit të vetting-ut për gjyqtaren Ukperaj: ‘Kamikazja’ e Ramës është e korruptuar; do emërohet në KLGJ

Politiko 4 Gusht 2018, 13:49

PD kundër kalimit të vetting-ut për gjyqtaren Ukperaj:

Partia Demokratike ka kundërshtuar vendimin e Komisionit të Pavarur të Kualifikimit për të rikonfirmuar në detyrë Brikena Ukperajn, gjyqtare e Apelit në Vlorë. Zëdhënësja e kësaj partie, Ina Zhupa ka deklaruar se rasti i Ukperajt është tregues se vetting-u ka vepruar me dy standarde, duke ligjëruar pasuri të pajustifikuara.

Pasi renditi tre shkelje të kësaj gjyqtareje, Zhupa theksoi se kryeministri Edi Rama do e përdorë Ukperajn për të kapur Këshillin e Lartë Gjyqësor.

“Brikena Ukperaj është person kyç në skemën e Edi Ramës, dhe po nxitet prej tij të aplikojë për ta zgjedhur anëtarë të Këshillit të Lartë Gjyqësor. Me shumë gjasë, gjyqtarja e Apelit të Vlorës, me pasuri të pajustifkuar, por e konfirmuar në detyrë, do të mbetet e vetmja kandidate potenciale për në KLGj, duke qenë kështu një kamikaze në këtë Këshill dhe zbatuese e qartë e skemës së Edi Ramës për të kapur sistemin gjyqësorë, vecanërisht Gjykatën Antikorrupsion”, u shpreh Ina Zhupa nga selia blu.

Reagimi i plotë i Ina Zhupës:

Prej të paktën një muaji, shqiptarët janë bërë dëshmitarë sesi vettingu është shndërruar në një proces që nuk pastron Pallatin e Drejtësisë, por mban në sistem gjyqtarë dhe prokurorë të korruptuar, të lidhur me krimin e organizuar.

Brikena Ukperaj, gjyqtarja e Apelit në Vlorë është një nga rastet kur vettingu ka vepruar me dy standarde, duke ligjëruar pasuri të pajustifikuara të gjyqtares Ukperaj.

Mosjustifikimi dhe mungesa e një hetimi të thelluar nga organet e vettingut për një shtëpi në emër të bashkëshortit;

Problemet për blerjen e një automjeti, për të cilin organet e vettingut nuk hetuan me vëmendje, si dhe

Mosverifikimi i plotë i ankimit të familjes Bodo kundër vendimit të dyshimtë për aferën e 200 hektarëve tokë në Karaburun, që favorizoi deputetin socialist Fidel Ylli;

Këto janë tre pikat e errëta të vendimit të organeve të vettingut, që po mban në sistemin e drejtësisë gjyqtarë të korruptuar.

Arsyeja përse Brikena Ukperaj ka kaluar shkallën e parë të vettingut, pavarësisht problemeve me pasurinë dhe vendimit për aferën e 200 hektarëve në Karaburun, shpjegohet me skemën e Edi Ramës për të kontrolluar Këshillin e Lartë Gjyqësor.

Që skema e Ramës për kapjen e qeverisë së gjyqësorit të realizohet, gjyqtarja e Apelit të Vlorës duhet të shpallë kandidaturën për në KLGJ.

Brikena Ukperaj është person kyç në skemën e Edi Ramës, dhe po nxitet prej tij të aplikojë për ta zgjedhur anëtarë të Këshillit të Lartë Gjyqësor.

Me shumë gjasë, gjyqtarja e Apelit të Vlorës, me pasuri të pajustifkuar, por e konfirmuar në detyrë, do të mbetet e vetmja kandidate potenciale për në KLGj, duke qenë kështu një kamikaze në këtë Këshill dhe zbatuese e qartë e skemës së Edi Ramës për të kapur sistemin gjyqësorë, vecanërisht Gjykatën Antikorrupsion.

Me një gjyqtare lehtësisht të shantazhueshme për pasuritë e pajustifikuara dhe vendimet e dyshimta, Edi Rama e ka më të lehtë kapjen e Këshillit të Lartë Gjyqësor akoma pa u ngritur, duke e shndërruar reformën në drejtësi në një farsë politike dhe duke shuar shpresat e shqiptarëve për një drejtësi që ndëshkon politikanët e korruptuar dhe të lidhur me krimin e organizuar.

Qytetarët kanë të drejtë të dijnë se nëse procesi i vettingut nuk do të ishte i korruptuar politikisht, sot Brikena Ukperaj do të ishte shkarkuar nga detyra, si një nga gjyqtarët e korruptuar.

Partia Demokratike shpreh edhe njëherë shqetësimin se procesi i vettingut, i diktuar nga Edi Rama, po mban në sistem gjyqtarë e prokurorë të korruptuar, në kundërshtim me pritshmëritë e qytetarëve shqiptarë.