PD nënshkruan kontratë të re lobimi në SHBA

Sipas të dhënave të bëra publike nga Departamenti i Drejtësisë në SHBA, kontrata midis Partisë Demokratike dhe Sonoran Policy Group kap një vlerë 10 mijë USD në muaj për një total prej 40 mijë USD dhe është nënshkruar me 11 qershor nga Sekretari i Përgjithshëm i PD-së, Gamend Bardhi.

Sipas kontratës, firma armerikane e lobimit pritet të punojë me partinë opozitare shqiptare për të ndërtuar një strategji kundër drogës dhe krimit të organizuar, si dhe të ndihmojë PD-në për të siguruar takime me zyrtarë të administratës në SHBA.

Kontrata e firmosur në 11 qershor, nuk është kontrata e parë e lobimit që Partia Demokratike ka firmosur me Sonoran Policy Group. Në vitin 2018, Partia Demokratike ka pasur një kontratë të ngjashme me këtë firmë lobimi me zyra në Uashington DC.

Kreu i Partisë Demokratike Lulzim Basha, ish-sekretari Ristani dhe financieri i PD, Dervishi më herët janë marrë si të pandehur nga Prokuroria për çështjen e lobimit në SHBA nga një kompani ruse.