Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Perëndimi e ka braktisur Edi Ramën

Politiko 21 Maj 2019, 12:58

Red Varaku

Edi Rama po përpiqet të japë imazhin e një njeriu të pakompleksuar dhe, madje shpesh, shfaqet cinik me situatën ku ndodhet vendi. Sipas tij, vendi vazhdon 'i qetë' rrugën drejt integrimit europian dhe as që bëhet fjalë për një krizë. E vetmja që po kalon krizë, deklaron ai, është opozita e bashkuar.

E vërteta është se, kriza është ulur këmbëkryq në çdo familje shqiptare prej 2017 dhe që nga momenti i djegies së mandateve, vendi po shkon drejt një përplasjeje të sigurt. Kjo e ka transformuar Ramën tërësisht, sepse e lidh atë pikërisht me atë që nuk do të donte kurrë të lidhej. E lidh me njeriun që është gati të djegë Shqipërinë për pushtet. E lidh pikërisht me mitin e sajuar mjeshtërisht prej tij kundër njeriut që është përpjekur të sfidojë fort gjatë gjithë jetës së tij, Sali Berishën. Por, që kurrë nuk mundi as t’i afrohet sadopak.

Tashmë çdo ditë që po kalon, gjithmonë e më shumë, në sytë e shqiptarëve, po i ngjan portretit të ’Berishës’, që me aq djallëzi e kishte pikturuar në mendjet e njerëzve. Kjo e kompromenton shumë figurën e tij në sytë e socialistëve, opinionit publik dhe atij ndërkombëtar. Karma.

Në çdo konferencë, ai nuk ngurron ta fshehë zemërimin dhe cinizmin për Lulzim Bashën. Ai dinakërisht përpiqet ta shoqërojë emrin e Lulzim Bashës me Monika Kryemadhin, (për shkak se LSI kishte qenë pjesë e koalicionit qeverisës) për ta delegjitimuar sado pak misionin e kryetarit të opozitës në sytë e opinionit publik.

Por, pas çdo përpjekjeje nuk arrin ta fshehë dot nervozizmin e tij, me djaloshin që e mundi kur ai ishte në kulmin e lavdisë së tij, madje edhe në vitin kur në bulevard, si pasojë e papërgjegjshmërisë së tij, mbetën të vrarë katër njerëz, gjakun e të cilëve e përdori për të firmosur kapitullimin e tij përballë LSI në vitin 2013.

Ndërkohë, mesazherët perëndimorë me ç’duket kanë filluar të trokasin në zyrën e Ramës. Ata tashmë e konsiderojnë atë përgjegjësin kryesor për situatën e krijuar si dhe përgjegjësin kryesor për mbajtjen e vendit në një krizë permanente prej zgjedhjeve të vitit 2017. Dështimi i hapjes së negociatave për të disatën herë është një tregues i qartë i qëndrimit kokëfortë të europianëve.

Ajo që është me e dukshme, janë konferencat e njëpasnjëshme për shtyp, takimet e stisura me kandidatët për bashkinë që duam, me të cilat sikur kërkon të shfajësohet para shqiptarëve duke ia hedhur gjithmonë fajin opozitës dhe Lulzim Bashës, për greminën ku po shkon vendi, a thua se ai si kryeministër i vendit është krejt i pastër dhe nuk ka asnjë përgjegjësi.

Pas publikimeve të njëpasnjëshme të mediave më në zë të botës si Zëri i Amerikës, Bild etj., presioni i Perëndimit është shtuar ndjeshëm. Ai ka filluar të japë efektet e tij. Edhe më naivët e kanë të qartë se kush qëndron pas tyre. Vëzhguesit e kujdesshëm të sjelljes së Ramës e kanë vënë re ndryshimin e menjëhershëm në qëndrimin e Ramës, sidomos pas dy protestave madhështore të 11 dhe 13 Majit.

Problemi më i madh i Ramës është se miti që Rama ka mbështetjen e perëndimorëve po bie. Berlini, Parisi, Amsterdami vazhdojnë të godasin pamëshirshëm në fytyrën plastike të qeverisë shqiptare. Është në fakt hera e parë që Berlini ka dalë kaq hapur dhe vendosmërisht kundër qeverisë socialiste.

Nëpërmjet delfinëve të tij, ai po kërkon një marrëveshje tjetër me Bashën, ashtu si në vitin 2017, por kësaj rradhe ai e ka të qartë që presioni ndërkombëtar, do të bjerë mbi të. Sepse, tashmë edhe ndëkombëtarët e kanë të qartë që ai është një partner i pabesueshëm. Ai është në kërkim të një ‘pazari’, por kësaj here jo më për të ruajtur karrigen e tij, por për të ruajtur ‘kokën’ e tij.