Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Përplasja në Komision, ISP kërkesë Kuvendit: Penalizoni deputetët Ylli dhe Boçi

Politiko 4 Qershor 2018, 17:41

Përplasja në Komision, ISP kërkesë Kuvendit: Penalizoni

Instituti i Studimeve Politike kërkon që të merren masa ndaj deputetëve Fidel Ylli dhe Luçiano Boçi pas sjelljes së tyre në mbledhjen e sotme në Komisionin parlamentar të Medias. Përmes një letre drejtuar kryetarit të Kuvendit, ISP, një organizatë civile që monitoron Kuvendin, i kërkohet respektimi i Kodit të Sjelljes dhe Rregullores së Kuvendit në marrjen e masave ndaj deputetëve Ylli e Boçi.

“Gjuha e tyre e komunikimit u dominua nga fyerjet reciproke, kërcënime dhe një fjalor të padenjë për zyrtarët publikë e politikë. Praktika të tilla negative kanë ndodhur edhe në të kaluarën, dhe përbëjnë një nga arsyet e rënies së besimit publik tek Parlamenti dhe deputetët si përfaqësues indirekt të qytetarëve”, thueht ndër të tjerash në letrën që ISP i dërgon Ruçit.

Duke ju referuar Kodit të Sjelljes, Instituti i Studimeve Politike, shprehet se “në këtë rast deputetit i ndalohet të marrë pjesë në punimet e Kuvendit në seancë plenare dhe në komisione deri në 10 ditë”.

Në letër thuhet:

I nderuar zoti Kryetar!

Në seancën dëgjimore të zhvilluar me 4.6.2018 në Komisionin për Edukimin dhe Mjetet e Informimit Publik, në prani edhe të medias, ka pasur përdor të një retorike fyese dhe denigruese midis disa deputetëve. Protagonistët kryesore ishin deputetët Fidel Ylli (PS) dhe Luçiano Boçi (PD). Gjuha e tyre e komunikimit u dominua nga fyerjet reciproke, kërcënime dhe një fjalor të padenjë për zyrtarët publikë e politikë. Praktika të tilla negative kanë ndodhur edhe në të kaluarën, dhe përbëjnë një nga arsyet e rënies së besimit publik tek Parlamenti dhe deputetët si përfaqësues indirekt të qytetarëve.

Zoti kryetar!

Kodi i Sjelljes i miratuar në prill 2018 në Kuvend parashikon në nenin 6 se “përdorimi në Kuvend i gjuhës së pahijshme, fyese ose kërcënuese, ofendimet dhe sulmet fizike personale, janë rreptësisht të ndaluara. Deputetit i ndalohet: a) të përdorë një gjuhë të shprehuri, e cila nxit urrejtjen në bazë të racës, gjinisë, moshës, origjinës kombëtare, përkatësisë etnike, besimit fetar, prejardhjes sociale, aftësisë së kufizuar, gjendjes ekonomike, arsimore, shoqërore ose shëndetësore, gjendjes civile, familjare ose martesore, orientimit seksual, identitetit gjinor, përgjegjësisë prindërore, predispozicionit gjenetik, përkatësisë në një grup të veçantë ose për çdo shkak tjetër; b) të shfaqë forma diskriminimi dhe stereotipizimi në komunikimin e përditshëm, në fjalime politike, në veprimtari parlamentare ose jashtëparlamentare ku merr pjesë. Në rast të shkeljeve të parashikuara në pikat 1 dhe 2 të këtij neni, ndaj deputetit zbatohen masat disiplinore sipas procedurave të përcaktuara në Rregulloren e Kuvendit”. Në respekt të këtij përcaktimi, Rregullorja e Kuvendit në nenin 65, pika 3 përcakton se “për ngjarje tepër të rënda që ndodhin jashtë sallës ku zhvillohen punimet e Kuvendit, por brenda mjediseve të tij, Kryetari i Kuvendit merr masën disiplinore të parashikuar në pikën 2 të këtij neni” duke iu referuar masave kur “deputeti përdor fjalë fyese ...provokon rrëmujë në seancë që pengon zhvillimin e saj të rregullt, fyen ose kërcënon deputetët e tjerë...etj”. Në këtë rast deputetit i ndalohet të marrë pjesë në punimet e Kuvendit në seancë plenare dhe në komisione deri në 10 ditë.

Bazuar në pikat e sipërcituara të Kodit të Sjelljes dhe Rregullores së Kuvendit, në emër të ISP, si organizatë civile që monitoron Kuvendin dhe aktivitetin e deputetëve, ju drejtohemi me kërkesën që të ushtroni kompetencën ligjore të marrjes së masave disiplinore për deputetët Fidel Ylli dhe Luçiano Boçi. Praktika e tolerimit të akteve të njëjta në mbledhjet e Komisioneve ka qenë e gabuar dhe rezulton të jetë jo produktive për etikën, aktivitetin, produktin dhe integritetin parlamentar. Marrja e masave në rastin konkret do të ishte edhe një sinjal adresuar deputetëve të tjerë për standarde më të larta sjelljeve, komunikimi dhe aktiviteti institucional, si një detyrim ligjor por edhe detyrim moral të deputetëve përpara qytetarëve votues.