Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

OP-ED

Përsiatje Koronaistike

Politiko 16 Mars 2020, 15:48

nga Virgjil Muçi (ose VM-56)

I mbyllur në shtëpi prej tri ditësh, me ethe e një rrufë të lehtë që është më e bezdisshme se ethja dhe që, për hir të transparencës me lexuesin, më duhet të them se nuk ka të bëj me koronavirusin ose Covid-19 – por edhe sikur të kish të bënte dhe, unë, hipotetikisht të jem i infektuar, dëshiroj ta siguroj se, të paktën deri më sot, nuk është vërtetuar shkencërisht të jenë hasur raste infektimi nga leximi – papritur e pakujtuar vura re se koha ime ka përftuar një dimension të ri; dhe kjo nuk ka të bëj me kalendarin Julian – ende në fuqi në Serbi e në Rusi përsa i përket kremetimeve fetare – ose me atë Gregorian në pjesën tjetër të botës – pa dashur dhe pa e vënë re nisa ta llogaris kohën time në para dhe pas Koronavirusit. Pak a shumë siç veprojnë historianët kur e ndajnë epokën në para ose pas Krishtit ose, thënë ndryshe, para dhe pas erës së re.

E keni vënë re se e gjithë kjo po ndodh në një kohë kur Putini, falë ndryshimeve kushtetuese të propozuara nga një deputete – kozmonaute (apo duhet të them kozmonaute – deputete) përgatitet të rrijë në pushtet deri më 2036 kur, siç përllogarisin analistët, i bie të jetë 85 vjeç! S’do mend që është një koincidencë, por, gjithsesi, ashtu si edhe Koronavirusi ka një jehonë të përbotshme. Po atë tjetrën që, politologë të ndryshëm në Lindje e në Perëndim, nisur nga efikasiteti me të cilin Partia Komuniste e Kinës e bëri zap epideminë, i janë përveshur punës dhe po studiojnë modelin kinez për ta përshtatur, jo vetëm e thjesht në fushë të epidemiologjisë, por edhe si sistem politik e shoqëror. Pra, si një vijë të tretë: domethënë as komunizëm, as demokraci liberale.

Dhe tani mbasi mësuam se sa e si duhet të lajmë duart – jo më pak se 22 sekonda – të mos frekuentojmë kafenetë, kinematë, teatrot dhe, për dreq, parqet, shkurt e shkoqur të vetizolohemi në shtëpi, por duke ruajtur një distancë higjenike – dhe këtu ballafaqohemi me një problem klasor do të thosha, si i bëhet kur jetojmë katër veta në një dhomë e kuzhinë, me një banjë të përbashkët dhe nuk ke luksin që e kanë shumë të tjetër të hapësirave të bollshme të përbashkëta e të tjera çështje si këto, më duhet të them se kam disa pyetje që, me sa kam vërejtur, nuk janë shtjelluar nga virologët, ekspertët e mjekësisë, madje as nga politikanët, të cilët, këto ditë, më duhet të pohoj se po shfaqin dije të thella jo vetëm në fushën e epidemiologjisë, por edhe në shumë fusha të tjera. Fjala vjen: duhet apo nuk duhet të pimë birrë Corona? Një tjetër pyetje: Duke pasur parasysh rregullat e reja të sjelljes në publik – domethënë distanca një metër nga njëri-tjetri, mosdhënia e dorës etj., - lejohen njerëzit të bien në dashuri ose ata që janë të martuar, por me sjellje të lira në shoqëri të flirtojnë kur iu jepet rasti apo duhet që, me mirëkuptim të ndërsjellë, ta shtyjnë për periudhën pas Koronavirusit (p.k.) E shtroj këtë gjë, duke qenë se pyetjes, me sa duket naive të një gazetareje lidhur me këtë gjë, eksperti iu përgjigj shpërfillshëm e gati me përbuzje: Ju lutem, mos e ekzagjeroni!

Dhe në fund një vëzhgim disi naiv: Seç kam një ndjesi se Largqofti u bë si i ndërkryer ditën kur burokratët e Organizatës Botërore të Shëndetësisë (OBSH), për një arsye që nuk e mora vesh mirë pse, shkuan dhe ia ndërruan emrin nga Koronavirus në Covid-19. Ndoshta për hir të asaj që sot e gjithë ditën quhet politically correct. Ndoshta!