Pesë shqetësimet e presidentit Meta në “fermanin” dërguar OSBE - E SHPJEGUAR

Presidenti Ilir Meta i ka dërguar një tjetër letër OSBE-së, ku veç përshkrimit të situatës, evidenton edhe disa shqetësime të tij, disa të shprehura në publik e disa të tjera jo. Kreu i shtetit lë të kuptohet se kriza nuk mund të kalohet pa ndërhyrjen e ndërkombëtareve, siç ka ndodhur në rastet e kaluara, duke treguar kështu mos-besimin te palët politike në vend.

Mesazhin më të rëndësishëm, Meta e ka spostuar në mbyllje të letrës, ku nënvizon se “zgjidhja e vetme e kësaj krize është mbajtja e zgjedhjeve të lira, të ndershme dhe gjithëpërfshirëse, gjithashtu të domosdoshme për kredencialet demokratike të Shqipërisë, të cilës i është besuar kryesimi i ardhshëm i Organizatës sonë”.

Një sinjal i qartë se mbështet organizimin e zgjedhjeve me 13 Tetor, jo vetëm për pushtetin vendor, por edhe të përgjithshme dhe presidenciale, siç u shpreh më datën 2 korrik në konferencën urgjentë në orën 8:00 të mëngjesit.

  1.  I pakënaqur nga pasiviteti i OSBE-së 

OSBE-ja mundet dhe duhet të luajë një rol më aktiv në këtë drejtim. Gjatë takimit tonë të fundit dhe produktiv me Sekretarin e Përgjithshëm të OSBE-së në Tiranë, ramë dakord se stabiliteti dhe uniteti kombëtar janë kyçe për përparimin dhe kryesimin e suksesshëm të OSBE-së më 2020-n nga ana e Shqipërisë”.

  1. Kriza nuk mund të zgjidhet pa ndërhyrjen e ndërkombëtarëve

“Në këtë kuadër dhe në cilësinë e Presidentit të Republikës, institucioni që përfaqëson unitetin e popullit shqiptar, do të doja t’i kërkoja zyrtarisht OSBE-së që të ndërmjetësojë një dialog politik gjithëpërfshirës në Shqipëri, me qëllim arritjen e një zgjidhje të gjithanshme, e cila të parandalojë përshkallëzimin e mëtejshëm e krizës aktuale politike, institucionale dhe sociale në vend. OSBE-ja është institucioni i duhur për ta ndihmuar Shqipërinë në këto çaste kritike”.

  1. Situata e rrezikshme; tendenca për tu përshkallëzuar më tej

“Tensionet politike dhe shoqërore po rriten, ndërsa polarizimi mes palëve kundërshtare po përshkallëzohet gjithnjë e më tepër. Shqipëria aktualisht po përjeton një situatë të rrezikshme dhe të pashembullt politike, ku shumica qeverisëse në pushtet kërkon të shtijë në dorë politikisht të gjitha institucionet e kontrollit dhe balancimit të pushtetit, ndërsa opozita kërkon delegjitimitetin e institucioneve”.

  1. Kriza minimizon ndjeshem shanset që BE të hapë negociata ne Tetor

“Përshkallëzimi i mëtejshëm i krizës ka gjasa të ndikojë negativisht në procesin e integrimit të Shqipërisë në Bashkimin Evropian dhe stabilitetin e Ballkanit Perëndimor e më gjerë. Këshilli Evropian pritet  që të marrë një vendim më 17-18 tetor 2019 për hapjen e negociatave të anëtarësimit të Shqipërisë dhe Maqedonisë së Veriut. Mbetet ende i paqartë nëse do të merret një vendim pozitiv apo jo. Për më tepër, çdo përshkallëzim i krizës do të kompromentonte rëndë kredencialet e Shqipërisë si kryesuese e radhës e OSBE-së dhe aftësinë e saj për të drejtuar këtë organizatë në mënyrë të efektshme vitin e ardhshëm”.

  1. Zgjedhjet e lira, zgjidhja e krizës

“Nga këndvështrimi im, zgjidhja e vetme e kësaj krize është mbajtja e zgjedhjeve të lira, të ndershme dhe gjithëpërfshirëse, gjithashtu të domosdoshme për kredencialet demokratike të Shqipërisë, të cilës i është besuar kryesimi i ardhshëm i Organizatës sonë”, përfundon Meta.