Adele i shpjegon divorcin të birit përmes një këngë prekëse, përfshin dhe regjistrime zanore

Këngëtarja britanike është rikthyer në muzikë me albumin "30", këngët e të cilit po i publikon gradualisht. Kënga e tretë është publikuar dhe mban titullin "My little love" dhe në fakt kjo këngë mbart një mesazh dhe emocion shumë të madh për vetë këngëtaren.

Kjo këngë është në një formë një lloj shpjegimi për të birin, për divorcin e prindërve të tij. Në këngë ka regjistrime zanore dhe Adele shprehet se ndihet pak konfuze në këto mesazhe. “Mami ka pasur shumë ndjenja të forta kohët e fundit,” thotë ajo.

Kur i biri, Angelo, e pyet se pse, ajo i përgjigjet: “Më duket sikur nuk e di vërtet se çfarë po bëj."

“Oh, fare?” pyet ai me theksin britanik. “Fare” përgjigjet Adele.

Më vonë, ajo i shpjegon të birit: "Unë e dua babin tënd, sepse të solli ty tek unë. Ti je gjysma ime dhe gjysma e babit.”

Adele i këndon djalit: "E di që ndihesh i humbur / Është plotësisht faji im".

Disa nga vargjet e këngës:

Nuk e njoh veten në ftohtësinë e ditës
Kështu që nuk jam e habitur që mund të lexosh të gjitha gënjeshtrat e mia
Ndihem shumë keq që gjendem këtu kur jam kaq fajtore
Jam duke ikur aq larg sa ti je i vetmi që mund të më shpëtosh

Adele shpjegoi për "Vogue" vendimin për të përfshirë regjistrime zanore personale në albumin e fundit:

“Mendova se mund të ishte një qasje e bukur, duke parë se të gjithë kanë qenë në derën time për 10 vitet e fundit, si fansa, për të kaluar në 'A do të dëshironit të hyni brenda?'”