Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Posta e mëngjesit/ Me 2 rreshta: Çfarë pati rëndësi dje në Shqipëri

Politiko 31 Korrik 2020, 07:52

Posta e mëngjesit/ Me 2 rreshta: Çfarë pati rëndësi

Mirëmëngjes!

“Posta e mëngjesit” ju sjell një blic lajmesh kryesore ndodhur dje në Shqipëri. Klikoni në hiperlinqet blu nëse doni të lexoni më shumë. Nëse e doni ‘Postën’ në emailin tuaj na shkruani në [email protected]

■ Parlamenti ndryshon Kushtetutën në kohë pandemie dhe pa marrëveshje me opozitën e bashkuar: Lista pjesërisht të hapura dhe koalicione të kufizuara. Në seancën e fundit parlamentare, nisma PS-opozitë parlamentare u votua me 106 vota dhe vetëm 10 deputetë dolën kundër.

Kryeministri Rama mesazh ndërkombëtarëve gjatë seancës: Për sistemin zgjedhor vendosim vetë, jemi shtet sovran

Reagon Basha pas ndryshimeve kushtetuese: Nuk janë të detyrueshme për opozitën, listat të hapura vetëm nga fundi.

E lidhur: Sot votuan pro, ç’deklaronin më herët Majko dhe Xhafaj për ndryshimet kushtetuese: Jo me letra bakalli.

■ Ambasada amerikane ka reaguar ashpër ndaj ndryshimeve kushtetuese në mënyrë të njëanëshme nga shumica parlamentare në Kuvend. Pak orë pas miratimit me 104 vota në kuvend të listave pjesërisht të hapura, ambasadorja e SHBA, Yuri Kim, dhe ambasadori i Bashkimit Evropian, Luingi Soreca, i janë drejtuar selisë së PD për t'u konsultuar me Bashën.

■ Komisioni Europian njeh ndryshimet kushtetuese të miratuara në Parlamentin e Shqipërisë për hapjen e listave dhe kufizimin e koalicioneve parazgjedhore. Reagimi vjen përmes zëdhënëses Ana Pisonero, e cila në Twitter, shkruan se KE njeh miratimin, por shpreh keqardhjen që nuk pati kohë për konsensus me opozitën në Këshillin Politik.

■ Ambasadori gjerman Peter Zingraf duke kujtuar kushtet e vendosura nga BE dhe Bundestagu, ai bëri thirrje që palet të bashkëpunojnë në KP për të implementuar ndryshimet kushtetuese në Kodin Zgjedhor.

■ Presidenti i Republikës, Ilir Meta shkruan se “akti i ndryshimit të njëanshëm dhe me urgjencë të pajustifikueshme të Kushtetutës nga Kuvendi me legjitimitet të cunguar, është antikushtetues dhe i papranueshëm”.

■ Pas deklaratës të presidentit reagoi kryeministri Rama. Në twitter Rama i drejtohet Metës duke i thënë se ai është shkelës i kushtetuetës dhe se nuk u shkarkua vetëm se qeveria respektoi “Venecian”.

■ Kreu i Partisë Demokratike, Lulzim Basha, ka reaguar për votimin në Kuvend të ndryshimeve kushtetuese nga maxhoranca. Ai paralajmëron një konflikt politik, dhe thotë se koston do ta mbajë kryeministri Rama.

■ Ish-drejtori i Institutit për Studimin e Krimeve dhe Pasojave të Komunizmit, Agron Tufa ka publikuar një listë me emra, që sipas tij dikur pjesë e Sigurimit të diktaturës, sot mbajnë poste të larta drejtuese në institucione të ndryshme të vendit.

■ Katër viktima shënohen në më pak se 12 orë/ Krimi tronditi dje Elbasanin dhe Shijakun, një i vdekur edhe në Tiranë. Fillimisht, një 23-vjeçar humbi jetën në orët e vona në Elbasan, pasi u qëllua disa herë me thikë. Viktima ishte mik i Emiljano Ramazanit, i cili u ekzekutua në 20 korrik.

Më pas u qëllua për vdekje me mjete të forta në një lokal Florian Lamçe, rreth 40 vjeç, banues në Elbasan. Një nga autorët, Sokol Sanxhaktari, i cili njihet edhe si dhëndri i ish kryebashkiakut të PS në Elbasan, Qazim Sejdini, u shoqërua në polici.

Në Xhafzotaj të Shijakut u vra edhe një 65-vjeçar dhe u plagos vëllai i tij, kurse në zonën e Farkës në Tiranë u gjet i pajetë një person, që sipas policisë ishte vetëvrarë me armë zjarri.

■ KLP ka votuar në mënyrë unanime me 9 vota pro Aida Hajnajt në krye të BKH-së. Hajnaj bëhet e para drejtuese e 'FBI-së shqiptare', që do të marrë në dorë hetimin e zyrtarëve të lartë.

■ Në 24 orët e fundit, janë kryer 507 testime për të dyshuar të prekur me COVID-19, nga të cilat janë konfirmuar 92 raste pozitive, ndërsa 4 persona kanë humbur jetën.

■ Artan Hoxha ka arritur të sigurojë 54% të votave të pedagogëve dhe studentëve, duke u zgjedhur kështu Rektor i Universitetit të Tiranës. Mësohet se Artan Hoxha ka marrë 348 vota nga pedagogët dhe stafi akademik, ndërkohë që Mimoza Hafizit ka marrë 176 vota, dhe Kozeta Sevranit ka siguruar 122.

■ Ambasada amerikane në Tiranë ka përshëndetur emërimin e Aida Hajnajt në krye të Byrosë Kombëtare të Hetimit. Nëpërmjet një reagimi në faqen zyrtare Ambasada e SHBA thekson se kjo është një piketë historike në zbatimin e Reformës në Drejtësi dhe tani do të fillojë rekrutimin e hetuesve të nevojshëm për të siguruar suksesin e SPAK.

■ Gjykata e Posaçme Antikorrupsion ka shpallur moskompetencë për dosjen ndaj 21 komisionerëve të Durrësit, pjesë e dosjes 339. 19 komisionerët (pasi 2 kishin ndërruar jetë) nuk do të hetohen as nga SPAK-u, dosja i kalon Prokurorisë së Durrësit.