Flash News

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Publikoi tezën e Letërsisë 20 minuta pas nisjes së provimit, përjashtohet maturanti në Kukës

KRYESORE

Prapaskenat e vizës amerikane për Gramoz Ruçin

Politiko 14 Dhjetor 2017, 18:40

Prapaskenat e vizës amerikane për Gramoz Ruçin

Alfred Lela

A e ka vizituar me të vërtetë Gramoz Ruçi, Amerikën? Fotot thonë se po. Në po ato foto gjendet gjithashtu edhe pjesa tjetër e përgjigjes për pyetjen që bëhet në krye: Gramoz Ruçi, kryetari i mvrenjtur i Kuvendit të Shqipërisë, socialisti që 'urren' çdo buzagaz, është parë të formojë trajtat e një qeshjeje. Më në fund.

Alelujah!

Buzëqeshjet e atyre fotove mbanin brenda gëzimin e një fëmije që ka marrë dhuratën që ka dashur për festa, por edhe një shpagim të lehtë për veten dhe të tjerët, që deri dje nuk kishin besuar se mund të shkelte ndonjëherë në tokë amerikane.

Politiko.al ka hulumtuar në prapaskenat e vizitës së Kryetarit të Kuvendit, për të zbuluar se çfarë ndodhi që 'personi i padëshiruar' i amerikanëve, papritur mori një vizë dhe u lejua të udhëtonte drejt Washington-it.

Para se të shkohet te një përgjigje për këtë, duhet ribërë në fakt pyetja e vjetër, që ka marrë përgjigje pohuese, ndihmuar dhe nga mospërgënjeshtrimi i vetë Ruçit apo PS: a ka qenë i ndaluar ish-ministri i Brendshëm për të shkelur në Amerikë? Politiko e ka riformuluar sërish këtë pyetje, dhe ka marrë një 'Po' nga dy burime të ndryshme diplomatike, të cilat preferojnë të mbeten të paidentifikuara.

Gramoz Ruçi ka qenë 'persona non grata' në Amerikë, nënvizojnë burimet. Arsyet? Po ato që janë artikuluar nga burime të ndryshme mediatike dhe politike: përfshirje e politikanit të majtë në aktivitete të paligjshme që bien ndesh me interesa apo vlera amerikane.

Çfarë ndodhi atëherë, pse ky ndërrim i papritur kursi, kur perceptimi ishte se nuk kishte ndryshuar asgjë, sidomos pas dy gjesteve demonstrative të Ambasadorit Lu. Diplomati amerikan nuk shkoi në seancën e parë plenare të Kuvendit të ri, dhe kjo ishte hera e vetme në historinë e pluralizmit, që një Ambasador amerikan sfidonte me një gjest të tillë të fortë mosaprovimi. Lu ishte po aq i ashpër me shfaqjen, sa edhe me mosshfaqjen. Në seancën e votimit të qeverisë, ai hoqi kufjet kur Gramoz Ruçi mori fjalën. Një burim i konfidoi Politiko.al, se në disa qarqe të Ambasadës amerikane, Ruçi është pagëzuar si 'old commie'. Komunisti i vjetër.

Të gjitha këto nuk shërbejnë, megjithatë, si shpërfillje për vizën amerikane që iu dha kryetarit të Kuvendit. Këtu, thekson njëri prej burimeve diplomatike të Politiko.al, kanë bërë punën e tyre dy prerogativa. Për dhënien e vizës janë përdorur ato që mund të quhen 'teknikalitete lehtësuese'.

I pari është ai që quhet 'visa waiver', një procedurë që i lejon Ambasadorit amerikan, të bëjë një përjashtim të përkohshëm (zakonisht 90 ditor). I njëjti burim shton se kjo procedurë, në kuptim simbolik, është paralelja e lejes që i jepet një të burgosuri për 'raste speciale' si një vdekje në familje, etj. Pra është një prerogativë, një lëshim, dhe jo një 'e drejtë e fituar' në mënyrë permanente.

Një lëshim i tipit 'visa waiver' jepet për qëllime jo shtetërore, kryesisht turizëm, vizita personale etj.

Këtë e shpjegon më së miri fakti se Kryetari i Kuvendit nuk pati asnjë ftesë, apo takim, në kapacitete zyrtare në Departamentin e Shtetit. Takimet që ai zhvilloi me kongresmenë dhe senatorë kanë qenë ato që në gjuhën e Washington-it quhen photo opp (foto çasti), dhe që bëhen me politikanë apo individë të ndryshëm bazuar, kryesisht, në lobime të personave apo grupeve të interesit.

Politiko.al